E finagalo le Atua e fesootai ma oe

E taitai atu oe e le Agaga i le Tama Faalelagi ma Iesu Keriso. O se matafaioi taua lea a le Agaga Paia. O le a Ia musuia foi oe e salamo ma mulimuli ia Iesu Keriso ina ia mafai ona e maua faamanuiaga o Lana Togiola. A e salamo, e faamama oe e le Agaga ma fesoasoani ia e suia.

E tautala mai le Agaga Paia i lou mafaufau ma lou loto. O savali mai le Agaga e mafai ona oo mai i lou mafaufau i le tele o auala—e ala i mafaufauga musuia, lapataiga, malamalama manino, ma manatuaga faaleagaga. E mafai e le Agaga Paia ona talanoa atu i lou loto e ala i lagona faagaeetia e pei o le mafanafana, mautinoa, filemu, alofa, olioli, lotomaualalo, lotofaafetai, ma le onosai.

“Talia le Agaga Paia.” O nei upu sa tautalagia ina ua faamauina oe o se tagata o le Ekalesia a Keriso. E faapefea ona e talia le Agaga Paia? E ala i le usiusitai i aoaoga a Iesu Keriso. O Ia o lou malosiaga. O le mulimuli ia te Ia e valaaulia ai le Agaga Paia i lou olaga.

Saili lou Tama Faalelagi i le tatalo. Sasaa atu lou loto ia te Ia. Faafetai ia te Ia mo le tele o faamanuiaga matagofie ua Ia tuuina atu ia te oe. Faasoa atu ia te Ia ou olioliga, popolega, ma fesili. Ia filemu ma faalogo mo Ana tali, lea e mafai ona oo mai o ni lagona o le filemu, mafaufauga i lou mafaufau, po o uunaiga e fai se mea.

Faalogo i le siufofoga o le Atua i tusitusiga paia. O tusitusiga paia o upu a le Atua ia te oe! Aoao mai ia i latou i aso taitasi ia iloa Lona siufofoga ma lagona Lona alofa. A o e faitau, mafaufau loloto i mea atonu o loo Ia aoaoina ai oe, ma tusi i lalo uunaiga e oo mai. Ia avea o se mausa i aso taitasi le suesue i tusitusiga paia—aemaise lava le Tusi a Mamona—i lou olaga atoa.

Ia faatino soo se uunaiga faaleagaga e te maua. Afai e i ai sou manatu po o se uunaiga e fai se mea agalelei o le a manuia ai se tasi, fai! O mea lelei uma e mai le Atua. Faaali atu i lou Tama Faalelagi e mafai ona Ia faatuatuaina oe e mulimuli i uunaiga mai ia te Ia.

O le a faamafanafana ma taiala oe e le Agaga Paia. Ua lauiloa o Ia o le Faamafanafana. O le a Ia lagolago oe i taimi o tofotofoga. O le a Ia fesoasoani ia te oe ia iloa upu e fai atu po o mea e fai. Faatasi ai ma Lana faatosinaga, e mafai ona e iloa ai le eseesega i le va o le mea moni ma mea e sese. E mafai ona fesoasoani o Ia ia e iloa le lelei i isi ma ia te oe lava ia. E mafai foi e le Agaga ona lapataia oe i mea matautia. O le a Ia taiala oe agai atu ia Iesu Keriso ma aluese mai le agasala.

E mafai ona e maua meaalofa faaleagaga. E tele meaalofa e tuuina mai e le Atua i Ana fanau e ala mai i Lona Agaga. O nisi o loo ta’ua i tusitusiga paia e aofia ai faaaliga, talitonu ia Iesu Keriso, aoao atu, iloatino, ma le poto. Tatalo e ole atu i le Tama Faalelagi e uiga i meaalofa faaleagaga ua Ia tuuina mai ia te oe, auala e mafai ona e atiina ae ai, ma po o a auala e finagalo o Ia e te faaaoga ai e faamanuia ai isi.