Mwet fuhsr
11. Ma pwacye ac oruh kom sukohsohklah
Sie mukul fuhsr ke pacl met ah riti sie puk lihmlihm

Mongo Ke Kahs Inge, sel Liz Lemon Swindle. Kuhlwacng luhn Havenlight

11.

Ma pwacye ac oruh kom sukohsohklah

John 8:32

Pahpah tomom Inkuhsrao El God luhn ma pwacye. El etuh-ma nuhkwewa. Ma pwacye nuhkwewa tuhkuh Sel me ac kol nuh Yohrohl. Kom ahkkahlwemye lah kom sacohkihn ma pwacye ke kom suk in lutlut kac, moul suwohs, ac puhlaik in tuyak ke ma kom etuh muh pwacye—finne kom muhkwena tu.

Ma Pwacye Wacngihn Sahflahiyac

Pahpah Inkuhsrao El luhngse mukul ac muhtwacn Nahtuhl in lutlut pacl nuhkwewa. Oasr yurum kwewana srihpac luhn mahno ac nguhn in suk ac luhngse lutlut. Lutlut el tiac ma nuhke orek mani muhkwena. El ipin finsrak wacngihn sahflahiyac se lom in eklac oacna Pahpah Inkuhsrao.

Moul suwohs kalmac pa kom luhngse ma pwacye ye muhtuhn God—yohkl ikina in wo nuh sum, pwengpweng, kuh fihsracsr nuh se. Kalmac pa oruh na ma wo mweyen pa wo uh.

Oasr ma sacohk se sum kom luhngse akacsruhi kac. Wosasuc luhn Jisus Kraist sruok top nuhke kihsensiyuck ke moul. El pa inkacnek nuhke mislac ac engan. Sahp kom ac tiac etuh ma nuhkwewa, tuhsruhk kom etuh tari in luhngse mwet tuhlan lom, akacsruhi ke ip yohk yohrohlos, ac solwacltahl in sulpac luti kuhtuh pac.

Solsol

Sikalweni in lutlut. Suk ke pacl wowo in ahkyohkye etuh lom ac ma kom lotwelah in oruh. Pacl wowo inge kuh in weacng lutlut luhlahp kuh lutlut in ahkpac, oacpacna lutlut luhn mwet se sifacna tuhkuh ke mwe kahsruh ma kom luhlahlfongi. Sang Leum Elan oasr ke ma kom srihke in oruh an, ac El fah kol kom.

Lutlut ke ma pwacye luhn wosasuc. Ke kom lutlut ke facluh se raunikomlac uh, lutlut pac ke Mwet Lahngo, suc tuh oraclah facluh. Lutlut ke moul Lal ac mwe luti. Oruh seminary, lutlut, ac sifacna lutlut ke wosasuc in ip se ke lutlut lom ke lusen moul lom. Ac kuh in ahkwoekomlac in kuhlwacnsap ke sie misin ac akacsruhi ke wosasuc ke lusen moul lom nohfohn.

Moulkihn suwohswohs. Nimet pihsrapasr, kikiacp, kuhtasrihk, kuh kiacpwelah ke kuhtwena ohiyac—ke lutlut ac, ke orekma ah, ohnlain, yen nuhkwewa. Kom in srackna mwet luhlahlfongi se ma fahsr tuhkihn Jisus Kraist ke acn mwet uh oasr we kuh muhkwena uh.

mwet ah sikuck muhtuhnte ye muhtuhn Jisus Kraist suc sifilpac moulyak

Mwe Insewowo Ma Olwelah

Lutlut uh ahkyohkye kuh lom in kuhlwacnsuhpuh Leum, weacng ekihn sie misineri. El usot kuh nuh sum in ahkinsewwowoye mwet sahyac, yohkna sucu lom an. Ke kom lutlut yohk liki met ah, kom kuh in kahsruh yohk liki met ah in muhsahi tohkohsrahi luhn God ac ekuhllah facluh nuhke ma wo.

Suwohs el use mislac ac fahkkomyak-sifacna. Ke kahs ac mukuikui lom wi ma pwacye, kom ahkkahlwemye lah kuh in luhlahlfongiyuck kom sin mwet sahyac ac Leum.

Ke kom tuyak nuhke luti luhn Jisus Kraist, El wi kom tu. Jisus Kraist pa kuh lom! Mwet sahyac sahp tiac insese ke luhlahlfongi lom an, tuhsruhk puhlaik ac suwohs lom an fah ahkihlenyuck. Lah mwet sahyac ingacn ukwoe srihkasrak lom an kuh tiac, fahkwack luhlahlfongi lom, etuh na pwacye, ac luhlahlfongi ke Kraist ac kapkapwack.

Kihsensiyuck ac Topukyac

Kuh ma koluk se in kihsensiyuck ke Alu uh? Ngwac konwacack fuhkah topukyac? Oasr luhn kihsensiyuck uh tiac akucl in muhnahs kuh srihklac luhlahlfongi. Ma pwacye uh, siyuck kihsensiyuck kuh in muhsaheack luhlahlfongi. Fohlohkyak luhn wosasuc uh muhtwacwacack ke yac 14 matwac Joseph Smith el tuh siyuck kihsensiyuck se wi luhlahlfongi. Suk top an ke ma suhmuhslah, ke kahs luhn mwet pahluh luhn God, yurin mwet kol lom ac mwet in sucu lom, ac yurin God sifacna. Fin top an tiacna sa in tuhkuh, luhlahlfongi lah kom ac lotwelah lain nuhke lain. Muhtana ke ma kom etuh tari an, ac sikalweni in suk ke ma pwacye.

Ngac tuyak fuhkah ke ma pwacye uh ac in tiac ahksuhpwacryelah mwet ma siena luhlahlfongi la uh? Muhtwacwacack ke kom etuh na pwacye muh kahs lom ac mukuikui lom an mokleyuck ke luhngse God ac tuhlihk Nahtuhl. Akacsruhi ke wosasuc tiac enenuh in orek ke sie nguhn fohs tuhsruhk ke kahlwem, puhsisacl. ac kuhlwacng. Kom kuh in oruh luhngse nuh sin mwet sahyac kom finne tiac insese nuhke liye lalos uh. Kom in srihkasrak wowo se luhn mwet fahsr tukihn Jisus Kraist ke ohiyen moul lom uh.

Liye Matthew 5:14–16 (lwelah etuh lom in kahlwem); John 14:6 (Jesus pa pwacye); Sie Peter 3:15 (ahkolah pacl nuhkewa in akacsruhi finsrak lom ke Kraist); Doctrine and Covenants 88:77–80 (ma Leum El luhngse kuht in etaclah); 88:118 (suk lahlmwetmwet eislah ke puk wowo); 93:36 (wolacna luhn God kahlwem lahlmwetmwet); 124:15 (suwohs pa in luhngse ma pwacye); 130:18 (lahlmwetmwet lasr uh e wi kuht pacl se kuht sifwil moulyak).

Kihsensiyuck Nuhke Pwepuh In Lwelah Nuh Tempuhl

  • Kuh kom srihke in suwohs ke ma nuhkwewa kom oruh?

  • Kuh kom ahkkweye kuh pahtok kuhtwena luti, mukwikwi, kuh mwe luti ma siena liki ma ke Alu luhn Jisus Kraist luhn Mwet Luhlahlfongi ke Lwen Sahflah?