Kom ahkinsewowoyeyuck ke ki ac wal luhn pristut

Mattew 16:18–19

Ke Jisus El lotwel Peter ke wal luhn pristut, El sramsram ke ki. Ki uh orekmakihnyuck in tuhlahlah ac ikacslah ma. Ki luhn pristut kuh in tuhlahlah kuh luhn God, mwe sang, ac mwe insewowo ke moul lom.

Ma Pwacye Wacngihn Sahflahiyac

Ki luhn pristut nuhkwewa ac wal tuhkuh ke Jisus Kraist. Mwet sruok pristut nuhkwewa kuh in ukwaclah wal lal fohlohklac ne Yohrohl. Mwet Lahngo El otwelah lah suc ac eis wal se inge ac suc eis ki luhn pristut. Kuht luhlahlfongi etuh wolacna Lal.

Jisus Kraist El fohlohkuhnma pristut Lal ke pacl lasr uh. El akiac lah pristut ac orekmakihnyuck fuhkah. Adam, Moses, Peter, ac kutuh pac mwet pahluh sahyac ke sramsram mahtuh nuhkwewa eis ki luhn pristut. Ke pacl lasr uh, Joseph Smith el eis ki luhn pristut sel John Pacptist,, Peter, Moses, Elias, Elijah, ac kuhtuh sahyac. Mempucr ke Prestuhnsi Se Met ac U luhn Mwet Sap Singucul Luo sruok ki luhn pristut nuhkwewa fin facluh mihsenge. Mwet kol ke pristut fin acn uh ac u luhn prestuhn oacyacpac sruok ki luhn pristut nuhke pahng lalos. Ki luhn pristut karinhgihn orekma luhn God. Eltahl sang lwelah ac ahkkweye mukul ac muhtwacn in kahsruh orekma sac.

Wal luhn pristut ahkinsewowoye tuhlihk nuhkwewa nuhtin God. Ke srihpen pristut fohlohkihnyuckme, kom kuh in eis akwuck ac orek wuhlweacng yurin God. Kom kuh in oruh ke inen God ke kom eis sie kunohkohn kuh pahng sin sie mwet ma oasr wal yohroh.

Solsol

Insese nuhke pahng sin Alu ac kuhlwacnsap ke pwacye. Ke kom eis pahng sin Alu uh, kom sriyucklac ke wal sin God in kuhlwacnsap ke kunohkohn sacn. Kom kuh pac in eis kolyuck sin God nuhke kuhlwacnsap lom an. Ke kom kuhlwacnsap, kom aholuhl Jisus Kraist. Sang nuh Sel kuhiyom nohfohn.

Ahkkweye elos suc God El pahngon in kuhlwacnsap. Kalmen ahkkweye yohk likina in sralwack paho ke ine se ritiyuck ke sie toeni ke Alu uh. Kalmac pa in ahkkweye ac kahsruh. Suk inkacnek in ahkkahlwemye lah kom ahkkweye mwet ma Jisus Kraist El pahngon in kuhlwacnsap ke Alu Lal.

Ahkfalye kunohkohn sin mwet kol luhn Alu uh—weacng pac yurin u kuh prestuhnsi luhn klahs. Oasr wal yohrohltahl sin God, suc eltahl usot nuh sum nuhke kunohkohn sacn. Sahp kom ac kuneyuck in luti sie mwet, paing mwet ke elos tuhkuh nuhke toeni ke kuhfa luhn Leum, kuh kahsruh ke sie mukuikui. Lah kunohkohn fuhkah se, oraclah in oacna pacl wowo se in ekihn sie mwet tuhma lutlut luhn Jisus Kraist ac kuhlwacnsuhpuh tuhlihk nuhtin God.

Jisus Kraist El tuh pacptaislac sel John Pacptist ke Infacl Jordan.

Mwe Insewowo Ma Olwelah

Kom kuh in luhlahlfongi muh akwuck kom eis tuh ahkkweyeyucklac sin Jisus Kraist. Pa inge sie ma ma oruh Alu luhn Jisus Kraist in siena uh. Ke akwuck luhn pristut, kuh luhn God uh ahkkahlwemyeyuck.

Kom fah eklac sie kuhfwen mwe orekma ke poun Leum. Ke kom kuhlwacnsuhpuh Leum ke wal Lal ac ye kolyuck luhn mwet kuhlwacnsap Lal suc sruok ki luhn pristut, El fah kahsrwe kom in etuh lah kom ac kuhlwacnsuhpuh fuhkah mwet sahyac ke orekma Lal. Jisus Kraist pa kuh lom! Kuhlwacnsap lom ac kahsrwe kom in tuhkuh fototoyang nuh Yohrohl ac usot engan nuh sum.

Kihsensiyuck ac Topukyac

Suc ke ward luhk uh sruok ki luhn pristut? Pisap ac prestuhn luhn elder, mwet luti, ac u luhn dikin sruok ki luhn pristut. Kalmac pa Leum El kuneyac eltahl in ahkkahlwemye lah orekmakihnyuck fuhkah pristut in kuhlwacnsuhpuh ac ahkinsewowoye mwet nuhkwewa ke ward uh.

Ki luhn pristut ac ahkinsewowoyeyuc fuhkah? Akwuck oacna pacptais ac kuhfa luhn Leum eltahl ahkkweyeyucklac ke ki luhn pristut. Ke kom eis sie pahng ke Alu uh, kom sriyucklac ye kolyuck luhn mwet se ma sruok ki ac. Ma se inge ahkinsewowoye kom ke wal in kuhlwacnsuhpuh pahng sacn. Mwet kol luhn Alu ac mwet luti ma kuhlwacnsuhpwe kom eis pac wal luhn pristut tuhkuh ke ki.

Mukul ac muhtwacn kuhlwacnsap fuhkah ke wal luhn pristut? Mukul wowo tuh ituckyang pristut nuh faclos ac elos akmuhsralah nuhke ohfuhs luhn pristut oacna dikin, mwet luti, prist, ac elder. Kwewana muhtwacn ac mukul ma sriyucklac in kuhlwacnsap ke sie pahng ituckyang nuh selos wal luhn pristut sin God in akfalyelah pahng sac. Ma se ine oacpacna nuh sin muhtwacn ac mukul ma eis kunohkohn sin mwet kol luhn Alu uh.

Liye Doctrine and Covenants 35:24–27 (Alu uh kolyuck ke ki ma Leum El fihliyac); 107:18–20 (ki luhn Melchizedek Pristut ac Aaronic Pristut); 110:11–16 (Moses, Elias, ac Elijah fohlohkohnwack ki).

Kihsensiyuck Nuhke Pwepuh In Lwelah Nuh Tempuhl

Kuh kom ahkkweye tuh Prestuhn ke Alu luhn Jisus Kraist luhn Mwet Luhlahlfongi ke Lwen-sahflah elan ekihn mwet pahluh, mwet liyactwen, ac mwet eis fwackyuck ac el muhkwena fin facluh suc sruok ac ituckyang suwohs la in orekmakihn ki nuhkwewa luhn pristut?
Kuh kom ahkkweye tuh mempucr ke Prestuhnsi se Met ac U luhn mwet Sap Singucul Luo in ekihn mwet pahluh, mwet liyactwen, ac mwet in eis fwackyuck?
Kuh kom ahkkweye Mwet Kol Luhlahp sahyac ac mwet kol fin acn sum ke Alu uh?