Kom kuh in kahsruh orekma luhn God

Moses 1:39

Pahpah Inkuhsrao El luhngse tuhlihk Nahtuhl nuhkwewa. El kena kahsrweltahl in konwacack engan, fohlohk nuh Yohrohl, ac eis moul ma pahtpaht. Pahngpahng ma se inge orekma Lal ke molwelah ac moul ma pahtpaht yurin God, ac El suli kom in kahsruh!

Ma Pwacye Wacngihn Sahflahiyac

Orekma ac wolacna luhn God pa in usot nuh sum mahno kawihl ac moul wacngihn sahflahiyac. Mahno kawihl pa in moul ne tok ma pahtpaht ke sie mahno sifilpac moulyak. Moul ma pahtpaht, kuh moul ma pahtpaht yurin God, pa in eklac oacna God ac weluhl muhta oacna sie sucu. Ma inge nuhkwea kuh in sikyak ke srihpen Jisus Kraist ac Iwacla Lal. Kom kuh in luhlahlfongi Kacl.

Kom kuh in kahsruh orekma luhn God ke kom tuhkuh nuh yurin Kraist ac kahsruh mwet sahyac in oruh oacpacna. Oacna sie pacl kom oruh kuhtwena ma in kahsruh sie mwet in fahsr tukun Jisus Kraist, kom kahsruh orekma luhn God.

Solsol

Moulkihn wosasuc. Muhsahi luhlahlfongi lom ke Jisus Kraist. Auliyak lwen nuhkwewa. Eis akwuck ke pristut luhn God ac liacacng wuhlweacng lom. Oraclah tuh pactuhn sacn ma nuhke lusen moul lom nohfohn.

Karihngihn elos suc enenuh. Konwacack inkacnek in kuhlwacnsuhpuh ac luti nuh sin mwet sahyac, weacng sucu lom an, kawuck lom, ac mwet in acn sum an. Sie ohiyac wo in kahsruh mwet enenuh pa in ahkos masap ke lalo ac sang mwe sang ke lalo.

Suli mwet nuhkwewa in eis wosasuc. Lwelah kahs ac mukuikui lom an in fahkwack luhlahlfongi lom ke Jisus Kraist. Kom in ahkolah in fahk nuh sin oacna sie mwet ma siyuck sum ke finsrak ac engan kom puhlakihn ekihn mwet tuhma lutlut se Lal. Nuh sin mukul fuhsr, kuhlwacnsap ke sie misin fohnlah el ma kunacn pristut se. Nuh sin muhtwacn fuhsr, pacl wolacna se; pruhe in etuh lah Leum El luhngse kom in kuhlwacnsap. Ahkolah in akacsruhi ke wosasuc ke lusen moul lom nohfohn.

Oracni sucu nuh tok ma pahtpaht ke kom oruh sramsram mahtuh luhn sucu ac orekma luhn tempuhl. Lotwelah ke mwet mahtuh somlah lom. Konwacack lah suc enenuh akwuck luhn tempuhl. Som nuh tempuhl in fusus ke pacl kom kuh in pacptaislac ac ahkkweyeyucklac laltahl. Kom fin enenuh kahsruh, som nuhke FamilySearch.org.

Mwe Insewowo Ma Olwelah

Kahsruh luhn God fah oasr yurum. Pahpah Inkuhsrao El tiacna motko kom in muhkwena oruh orekma se inge. El wi kom. Ke kom puhsisacl in sang pacl ac insiom, El ac fah oruh ma usrnguck keim. Jisus Kraist pa kuh lom!

Kom ac fah sesseslah ke engan. Orekma luhn God uh orekma engan se! Ke kom oruh ip kunom kac, kom kuh in puhla engan ma El puhla. Nuhnkuh ke engan se kom ac akacsruhi kac yurin Pahpah Inkuhsrao ac tuhlihk Nahtuhl ma kom kahsruh use nuh Yohrohl!

Kihsensiyuck ac Topukyac

Kuh God El kuh in orekmakihnyuc ke orekma Lal? Ahok! Oasr inkacnek puhs in kahsruh orekma se inge. Sahp mwet sahyac oacna yohk etuh lalos kuh kuh in mukuikui, tuhsruhk Pahpah tomom Inkuhsrao El etuh kuhiyom. El usot mwe sang nuh sum ma kom kuh in orekmakihn in kuhlwacnsap ac oracni nuh sie tuhlihk Nahtuhl. Ac wona fin mwe sang inge sie likina ma oasr yurin mwet sahyac. Pwacyelah, pa oruh mwe sang lom uh sacohk na pwacye uh. Enenweyuck kom!

Liye Matthew 10:39 (fin tuhlac moul lom ke kuhlwacnsuhpuh Mwet Lahngo, kom fah sokwack); Sie Corinth 12:14–27 (mempucr nuhkewa eneneyuck nuh ke mahno luhn Kraist); Philippi 1:6 (in puhlaik na lah God El oruh orekma Lal sum); Jacob 5:72 (Leum luhn imac sac wi kom); Doctrine and Covenants 18:15–16 (enga lom yohklacna kaclos suc kom sang nuh sin Kaist); 64:33–34 (orekma yohk utuftuf se tuhkuh ke ma srihsrihk ac fihsrwacsr); Moses 1:6 (“Oasr orekma Nga ahkolah nuh sum”); 6:31–34 (God El ahkweye elos El pahngon, fine elos puhla tiac ahkola suhfal).

Kihsensiyuck Nuhke Pwepuh In Lwelah Nuh Tempuhl

Kuh oasr luhlahlfongi lom ke Fohlohkyak luhn wosasuc luhn Jisus Kraist?