Mwet fuhsr
5. Fahsr ke kahlwem luhn God
Jisus Kraist El liacacng sie un sheep

Wangin Ma Nga Ac Kena Kac, sel Yongsung Kim Kuhlwacng luhn Havenlight

5.

Fahsr ke kahlwem luhn God

Galatia 5:25

Kom kuh in orek sulaclah wowo ke kom kuh in liye ma uh kahlwem. Pasis kahlwem el arulacna yohk srihpac uh; kahlwem uh oraclah fihsracsr in liye ke inkacnek pwacye uh. Pahpah Inkuhsrao El usot nuh sum lwelah nuhke sie mwe kahsruh inkuhsrao ke kahlwem—mwe sang luhn Nguhn Muhtahl—in kahsre kom in liye ke ma wo ac koluk, pwacye kuh suhtuhuh.

Ma Pwacye Wacngihn Sahflahiyac

Kom kuh in eis Nguhn Muhtahl lan wi kom pacl nuhkwewa. Ke kom ahkkweyeyucklac sie mempucr luhn Alu uh, tuh suliyuck kom in “eis Nguhn Muhtahl.” Ohiyac wo se ma Nguhn elan wi kom pacl nuhkwewa pa sie mwe sang yohklacna luhn God nuh sum uh.

Orek sulaclah wowo ahkyohkye kuh lom in puhla ke Nguhn. Oasr ma wowo pucspucs ac mwe ahkkweye fin facluh se inge. Oacpacna ke mahno lom an eklac ke srihpen ma kom kang ac nihm, mwe nuhnak lom ac nguhn eklac na pwacye ke ma kom riti, liye, kuh lohng uh.

Solsol

Oracla pacl nuh sin Leum ke lwen nuhkwewa. Lutlut Kacl. Esamuhl pacl nuhkwewa. Pruhe nuh sin Pahpah Inkuhsrao. Lutlut ke ma suhmuhslah muhtahl ac kahs luhn mwet pahluh moul. Tohkoh kom srihke in moulkihn ma kom lotwelah.

Suk mwe ahkkweye, mokle, ac suli Nguhn. Ke kom oruh sulaclah lah mwea kom ac liye, riti, lohng, kuh wi oruh, nuhnkuh lah meac puhla lom an? Kuh el suli nuhnak wowo? Nimet oruh kuhtwena ma ma ahksrucksruckye ma muhtahl kuh ke ma koluk. Nimet wi oruh kuhtwena ma ma ahkmuhnahsyelah nuhnak lom kuh mwe sensen nuhke Nguhn, oacna orek fohs, mwe sruhi, kuh mwe sensen ke drugs. Puhlaik in konwelah video kuh mwe sritacl se, tufoki liki sie petsac muikui kuh dance, ahollah on an, kuh fahlac liki oacna sie ma tiac fal nuhke Nguhn.

Orekmakihn social media in ahkkweye. Social media el kuh in kuhfwen mwe orekma na wowo se nuhke sramsram. Kom fin orekmakihn, lohacng in wo nuhke kahlwem, luhlahlfongi, ac ma pwacye. Nimet kapsruh moul lom an nuhke ma mwet sahyac oacna in puhla uh. Esam lah wolacna tuhkuh ke kom tuhlihk se nuhtin ninac pahpah inkuhsrao, tiac yurun social media.

Suk ke ma wowo ma sikyak ac pwacye, kuhpahsr kawihl. Sensenkihn tuh orekmakihnyen technology and media in tiac aohllah sislah pacl yurin mwet se-angwetwacni kuh yurin sucu ac kawuck. Social media ac kuhtuh pac technology kuh in eslah pacl yohk lom suc srihklac ma sang fohlohkihn. Monglac wihn ke liyeyacn facluh ke internet ac kuhpahsryang nuh sin mwet na pwacye ke moul se inge.

Jisus Kraist El kohllah un sheep se nuhke imac in mah se

Mwe Insewowo Ma Olwelah

Kuh in oasr yurum Nguhn pacl nuhkwewa. Olwelah se inge ipin wuhlweacng kom oruh pacl nuhkwewa kom eis ke kuhfa luhn Leum uh. Nguhn el fah mwet loh nuh sum ke Pahpah Inkuhsrao ac Jisus Kraist. El fah ahkwoye, kol, sensenkackihn, ac ahknwacsnwacsye kom. El fah kahsre kom in akihlen ma pwacye ac liye ma wowo facluh uh.

Kihsensiyuck ac Topukyac

Ngac etuh fuhkah lah nga puhla Nguhn Muhtahl? Lotwelah in esam lah Nguhn el enenuh, ahkpah, ac muhtweng. El sramsram nuh sin kain in mwet ke kain in ohiyac. Nimet pihlesruh ma srihsrihk—puhla mislac se tuhkuh nuh sum ke kom lohng fahkwack luhlahlfongi luhn sie mwet kuh puhla koluk tuhkuh nuh sum tukihn oraclah sulaclah koluk se. Suk ma suhmuhslah ke ohiyac sahyac ma Nguhn el sramsram, pruhe kac, ac sikalweni in suk ma wo in puhla ke Nguhn.

Meac se petsac koluk uh? Efuh kuh nga in kahingkihn? Petsac koluk el ahkkahlwemye, ke petsac kuh kahs, oreklac in ahknuhnakye in ke kosro. Petsac koluk el tuhkuh ke luhmah puhs, weacng petsac mukuikui, petsac, puk, mwe srihtacl, ac on. El kuh pac in sramsram kuh petsac suhpweyuck inmahsrlon kawuck. Petsac koluk el ahkkolukye ma suc muhtahl—mahno lasr uh ac puhla lasr in orekma koluk—ke wacngihn ahkfuhlactyeyac. Kom ac kuh in liyacack petsac koluk kom finne tiac oruh in oacyac. Finne kom liyacack petsac koluk ke kom nuhnkuh in oruh kuh tiac, forlah liki ingena. Kom ac kuh pac in sramsram nuh sin pahpah ninac kuh mwet mahtuh sahyac ma kom luhlahlfongi. Sulaclah in liye petsac koluk el koluk ac ahkmuhnahsyelah kuh lom in puhla ke Nguhn. El eslah kuhiyom ac ekuhllah liye lom keim sifacna ac mwet sahyac. Oasr kuh luhn Jisus Kraist in kahsre kom lain petsac koluk ac auliyak. Forwacng nuh Sel ac forlah liki lohsr uh. Pisap lom an kuh in kahsre kom eis kuh ac nuhnak muhnahs sin Mwet Lahngo. Jisus Kraist pa kuh lom!

Liye Psalm 119:105 (kahs luhn God oacna in kahlwem se nuh ke inkacnek lasr); Amos 5:14 (suk ma wo); Galatia 5:22–23 (fahko luhn Nguhn); Moroni 7:18–19 (kahlwem luhn Kraist); Doctrine and Covenants 6:23 (Leum El sramsram ke mihs); 20:77, 79 (pruhe kuhfa luhn Leum).

Kihsensiyuck Nuhke Pwepuh in Lwelah Nuh Tempuhl

  • Leum El tuh fahk muh ma nuhkwewa in “orek ke nwacsnwacs” ye Muhtahl (Doctrine and Covenants 42:41). Kuh kom kampare nuh ke ohiyac nwacsnwacs ke nuhnak ac elah lom an?