L-ordinanzi u l-patti jagħtuk aċċess għal qawwa divina

L-ordinanzi jidderiġukom lejn Ġesù Kristu. Ordinanza hija ċerimonja sagra b’tifsiriet simboliċi li jgħallmu dwar Ġesù Kristu. Per eżempju, is-sagrament mhuwiex sempliċiment ħobż u ilma. Ifakkarna fis-Salvatur.

Il-patti huma sinjal tal-imħabba, tal-fiduċja, u tal-aspettattivi ta’ Alla. Huma jieħdu r-relazzjoni tagħkom ma’ Alla f’livell aktar profond. Li tagħmlu patt juri li intom tħobbu lil Alla u tinsabu impenjati għalih. Intom tistgħu tafdaw fih, u huwa jista’ jafda fikom. B’dak l-impenn aktar profond jasal aċċess akbar għall-qawwa u l-għajnuna tiegħu hekk kif intom tħarsu l-patti tagħkom.

Intom tagħmlu patti ma’ Alla meta titgħammdu u tiġu kkonfermati u meta tieħdu sehem fis-sagrament. Meta titgħammdu, intom twiegħdu li tieħdu fuqkom innifiskom l-isem ta’ Ġesù Kristu, li taqduh, u li żżommu l-kmandamenti tiegħu tul ħajjitkom. Matul is-sagrament, intom twiegħdu wkoll li dejjem se tiftakru fih. Dawn huma l-wegħdiet tagħkom. Peress li intom lesti żżommuhom, Alla jwiegħed li jagħtikom l-Ispirtu s-Santu bħala s-sieħeb kostanti tagħkom.

Ittrattaw is-sagrament bħal rigal sagru. Uru l-impenn tagħkom lejn Ġesù Kristu billi titħejjew għal esperjenza sagra matul is-sagrament. Xtarru x’tistgħu tagħmlu biex din l-ordinanza tagħmluha l-aktar mument spiritwali tal-ġimgħa tagħkom.

Fittxu s-Salvatur fl-ordinanzi. Meta taraw jew tipparteċipaw f’ordinanza, staqsu lilkom infuskom, “X’nitgħallem minn dan dwar Ġesù Kristu?” jew “Dan kif jista’ jressaqni aktar viċin tiegħu?” Oqogħdu attenti għal dak li jgħallimkom l-Ispirtu.

Araw li l-patti tagħkom jiggwidaw l-għemejjel tagħkom. Meta jkollkom għażla li tridu tagħmlu, ftakru fir-relazzjoni tal-patt tagħkom ma’ Alla. Kunu leali lejh. Staqsu lilkom infuskom: Dan jallinja ruħu mal-patti tiegħi? Per eżempju, jiena nħobb u nimministra lil ħaddieħor, infarraġ nies li jeħtieġu l-faraġ, u nieqaf bħala xhieda ta’ Kristu—kullimkien u dejjem?

Jista’ jkollkom il-qawwa li tegħlbu t-tentazzjoni, id-dnub, u l-isfidi tal-ħajja. Li tagħmlu u żżommu l-patti jagħtikom aċċess għall-qawwa ta’ Alla. B’dik il-qawwa, intom tistgħu tiffaċċjaw kull ħaġa b’kunfidenza. Ġesù Kristu huwa s-Salvatur tagħkom!

Intom tistgħu tkunu nodfa u maħfura. Parti mill-wegħda ta’ Alla magħkom talli intom żżommu l-patt tal-magħmudija tagħkom hija maħfra ta’ dnubietkom. Dan ifisser li hekk kif intom tindmu u tħarsu l-wegħdiet tagħkom ma’ Alla, Huwa jaħfrilkom u jgħinkom titjiebu.

Intom jista’ jkollkom l-Ispirtu s-Santu dejjem magħkom. Wegħda oħra marbuta mal-magħmudija u s-sagrament hija s-sħubija kostanti tal-Ispirtu tiegħu u l-ministeru tal-anġli. M’għandkom qatt għalfejn tiffaċċjaw l-isfidi tal-ħajja waħdedkom. Alla qatt ma jabbanduna lil uliedu tal-patt—intom tistgħu sserħu raskom dwar dan.

Intom jista’ jkollkom is-sapport tal-poplu tal-patt ta’ Alla. Intom tappartjenu għal komunità ta’ nies tal-patt fil-Knisja tas-Salvatur. Intom tgħinu u tħeġġu lil xulxin. Intom tibku flimkien u tifirħu flimkien. Intom iġġorru t-tagħbija ta’ xulxin. Il-familja tiegħek, l-isqof, il-mexxejja, u membri oħra tal-Knisja jinsabu hawn biex jgħinuk, u inti tista’ tgħinhom.