“Ko e Fakafeʻiloaki ʻo e Sākalamēnití,” Aʻusia Fakaako ʻi he Uike Māʻoniʻoní (2026)
Sāpate Toetuʻú
Ko e Fakafeʻiloaki ʻo e Sākalamēnití
“Pea kapau ʻoku mou manatu maʻu ai pē kiate au te mou maʻu ʻa hoku Laumālié ke ne ʻiate kimoutolu” (3 Nīfai 18:7).
Naʻe fakafeʻiloaki ʻe Sīsū ʻa e sākalamēnití ki he kakai naʻe fakataha mai ke fanongo kiate Ia. Naʻá Ne tāpuakiʻi ʻa e maá mo e uainé pea fakahinohinoʻi ʻEne kau ākongá ke nau tufaki ia ki he fuʻu kakai tokolahí. Naʻá Ne akoʻi leva, “Pea kapau te mou fai maʻu ai pē ʻa e ngaahi meʻá ni ʻoku mou monūʻia, he kuo mou langa ʻi heʻeku maká.” (3 Nīfai 18:12). Neongo naʻe taimi nounou pē ʻa Sīsū mo e kau Nīfaí, ka naʻá Ne tuku ha taimi ke toe tāpuakiʻi ʻa e sākalamēnití maʻá e kakaí ʻi he ʻaho hono hokó, ʻa ia ʻokú ne talamai ʻa e mahuʻinga ʻo e ouau ko ʻení.
Naʻe akonaki ʻa ʻEletā Kēleti W. Kongo fekauʻaki mo e mahuʻinga ʻo e manatu ki he Fakamoʻuí ʻo fakafou ʻi he ouau ʻo e sākalamēnití:
ʻOku tau fuakava ʻi heʻetau maʻu e sākalamēniti he uike takitaha, ke manatu maʻu ai pē kiate Ia. ʻOku tau maʻu ha ngaahi potufolofola ʻe meimei 400 tupu nai kau ki he foʻi lea ko emanatú, pea ko ha ngaahi founga ʻeni ʻe ono ʻe lava ke tau manatu maʻu ai pē kiate Ia.
ʻUluakí, ʻe lava ke tau manatu maʻu pē kiate Ia ʻi heʻetau loto falala ki Heʻene ngaahi fuakavá, talaʻofá mo e fakapapaú. …
Uá, ʻe lava ke tau manatu maʻu ai pē kiate Ia ʻi heʻetau fakahaaʻi ʻi he loto houngaʻia ʻa Hono toʻukupú ʻi heʻetau moʻuí. …
Tolú, te tau lava ʻo manatu maʻu ai pē kiate Ia ʻi heʻetau falala ki he fakapapau mai ʻa e ʻEikí, “Ko ia ia kuó ne fakatomala mei heʻene ngaahi angahalá, oku fakamolemoleʻi ia, pea ko au ko e ʻEikí, ʻoku ʻikai te u toe manatu ki ai” [Tokāteline mo e Ngaahi Fuakava 58:42]. …
Faá, ʻokú Ne fakaafeʻi kitautolu ke tau manatu ʻokú Ne talitali lelei maʻu pē kitautolu ki ʻapi. …
Nimá, te tau lava ʻo manatu maʻu pē kiate Ia ʻi he Sāpaté ʻi he sākalamēnití. …
Fakaʻosí, ko hono onó, ʻoku fakaafeʻi kitautolu ʻe hotau Fakamoʻuí ke tau manatu maʻu ai pē kiate Ia ʻo hangē ko ʻEne manatu maʻu pē kiate kitautolú. (“Manatu Maʻu Ai Pē Kiate Ia,” Liahona, Mē 2016, 108–10)
Ngaahi Folofolá mo e Fehuʻí
Ko e fē ʻi he ngaahi fokotuʻu ʻa ʻEletā Kongó ʻokú ke ongoʻi ʻe ʻaonga taha kiate koe ke ke ʻuluaki feinga fakahokó?
Lekooti ʻa e Ngaahi Ongo ʻOkú ke Maʻú
Vitiō
Hivá
“Naʻe Lahi Fau ʻa e ʻOfa,” Ngaahi Himí, fika 105
ʻEkitivitī maʻá e Fānaú
Naʻe fakahoko ʻe Sīsū Kalaisi ʻa e sākalamēnití ke tokoni ke tau manatu kiate Ia. Faʻu ʻa e kiʻi tohi ko ʻení ke tokoni atu ke ke ʻapasia mo fakakaukau ki Heʻene ʻofá ʻi he taimi ʻokú ke maʻu ai ʻa e sākalamēnití ʻi he uike takitaha.