“Fekauʻaki mo e Aʻusia Fakaako ʻi he Uike Māʻoniʻoní,” Aʻusia Fakaako ʻi he Uike Māʻoniʻoní (2026)
“Fekauʻaki mo e Aʻusia Fakaako ʻi he Uike Māʻoniʻoní,” Aʻusia Fakaako ʻi he Uike Māʻoniʻoní
Fekauʻaki mo e Aʻusia Fakaako ʻi he Uike Māʻoniʻoní
“ʻOku ʻikai ha tangata ʻe lahi hake ʻene ʻofá ʻi he meʻá ni, ke ne foaki ʻene moʻuí koeʻuhí ko hono kāingá” (Sione 15:13).
ʻOku faʻa ui ʻa e uike fakaʻosi ʻo e moʻui ʻa Sīsū Kalaisí ko e Uike Māʻoniʻoní. ʻOku fakataumuʻa ʻa e tohi fakahinohino ako ko ʻení ke tokoniʻi koe ke ke manatuʻi ʻa e ngaahi meʻa naʻe hoko ʻi he uike ko iá. ʻOku toe fakataumuʻa foki ia ke tataki koe ʻi hoʻo aʻusia ʻa e ʻamanaki lelei mo e talaʻofa ʻo e Fakalelei mo e Toetuʻu ʻa e Fakamoʻuí ʻi hoʻo moʻuí. ʻI hoʻo ako kiate Iá, ongoʻi ʻEne ʻofá, mo muimui ki Heʻene sīpingá, te ke maʻu ai ʻa e nongá, ʻamanaki leleí, mo e fiefiá.
ʻOku makatuʻunga ʻa e aʻusia fakaako ko ʻení ʻi he ngaahi fakamatala mei he uike fakaʻosi ʻo e moʻui ʻa e Fakamoʻuí, ʻo hangē ko hono lekooti ʻi he Fuakava Foʻoú, pea ʻi he ngaahi fakamatala ki Heʻene ngāue fakafaifekau ʻi he ongo ʻAmeliká hili ʻEne Toetuʻú, ʻo hangē ko hono lekooti ʻi he Tohi ʻa Molomoná. ʻIkai ngata aí, ʻoku ʻomi ʻe he tohi fakahinohino ako Toetuʻu Haʻu, ʻo Muimui ʻIate Au ʻo e taʻu ní, ha ngaahi fakakaukau fekauʻaki mo e Fakalelei mo e Toetuʻu ʻa e Fakamoʻuí ʻoku maʻu ʻi he Fuakava Motuʻá.
Ki he ngaahi pōpoaki ʻo e Toetuʻú mei he kau ʻAposetolo moʻuí, vakai ki he ngaahi vitiō makehe ko ʻení. Ki ha ngaahi maʻuʻanga tokoni kehe ʻi he ʻinitanetí fekauʻaki mo e Fakalelei mo e Toetuʻu ʻa e Fakamoʻuí, vakai ki he Easter.ChurchofJesusChrist.org.