“Ngaahi Kikite ki hono ʻAloʻi ʻo Sīsū Kalaisí,” Aʻusia Fakaako ʻi he Uike Māʻoniʻoní (2026)
Sāpate Pāmé
Ngaahi Kikite ki hono ʻAloʻi ʻo Sīsū Kalaisí
“Kae vakai, ʻoku hanga ʻe he toetuʻu ʻa Kalaisí ʻo huhuʻi ʻa e faʻahinga ʻo e tangatá, ʻio, naʻa mo e faʻahinga ʻo e tangatá kotoa pē, pea fakafoki mai ʻa kinautolu ki he ʻao ʻo e ʻEikí” (Hilamani 14:17).
Fakafuofua ki he 6 BC nai, naʻe tokolahi ha kakai naʻe nofo ʻi Seilahemala ʻi ʻAmelika ʻi he kuonga muʻá naʻe mole ʻenau tui kia Sīsū Kalaisí. Ko ia naʻe fekauʻi ʻe he ʻOtuá ʻa Samuela ko e palōfitá ke fakamoʻoni ki he ʻaloʻi, pekia, mo e Toetuʻu ʻa e Fakamoʻuí pea fakaafeʻi ʻa e kakaí ke nau fakatomala mo tui kia Sīsū Kalaisi. Naʻe kikiteʻi ʻe Samuela ʻa e ngaahi fakaʻilonga ʻo e ʻaloʻi mo e pekia ʻa Sīsuú koeʻuhí “ʻilo [ʻe he kakaí] ʻa … ʻene hāʻele maí” pea “tui ai ki hono huafá” (Hilamani 14:12).
ʻOku tau moʻui ʻi he ʻahó ni ʻi ha kuonga naʻe kikiteʻi ai ʻe he kau palōfita ʻo onopōní ʻa e Hāʻele ʻAnga Ua Mai ʻa e ʻEiki kuo toetuʻú. Kuo pehē ʻe Palesiteni Lāsolo M. Nalesoni:
Siʻoku kāinga ʻofeina, ʻoku ʻi muʻa ha ngaahi meʻa fakaʻofoʻofa lahi. ʻI he ngaahi ʻaho ka hoko maí, te tau mamata ai ʻi he ngaahi fōtunga maʻongoʻonga taha ʻo e mālohi ʻo e Fakamoʻuí kuo faifaiangé pea mātā ia ʻe māmani. Mei he taimí ni ki he taimi ʻo ʻEne liuaki mai “ʻi he mālohi mo e nāunau lahí,” [Siosefa Sāmita—Mātiu 1:36], te Ne foaki ha ngaahi faingamālie, ngaahi tāpuaki, mo ha ngaahi mana taʻefaʻalaua ki he kau faivelengá. (“Ikuʻi ʻa Māmani mo Maʻu ha Fiemālie,” Liahona, Nōvema 2022, 95)
Ngaahi Folofolá mo e Fehuʻí
Ko e hā ha ngaahi aʻusia kuó ke maʻu naʻá ne fakamālohia hoʻo tui ki he Tamai Hēvaní mo Sīsū Kalaisí?
Lekooti ʻa e Ngaahi Ongo ʻOkú ke Maʻú
Vitiō
Hivá
“Fanongo ki he Palōfita,” Ngaahi Himí, fika 13
ʻEkitivitī maʻá e Fānaú
Ngāueʻi ʻa e peesi ʻekitivitī ko ʻení ke ako fekauʻaki mo e kau palōfita kehekehe mei he Tohi ʻa Molomoná pea mo e founga naʻa nau kikiteʻi ai ʻa Sīsū Kalaisí. Ko e hā kuó ke ako fekauʻaki mo Sīsū Kalaisi mei he Tohi ʻa Molomoná?