“Ngaahi Akonaki Kau ki he Fakatomalá mo e Papitaisó,” Aʻusia Fakaako ʻi he Uike Māʻoniʻoní (2026)
Tūsite
Ngaahi Akonaki Kau ki he Fakatomalá mo e Papitaisó
“ʻOku ou fakamoʻoniʻi kuo fekau ʻe he Tamaí ki he kakai fulipē, ʻi he potu kotoa pē, ke nau fakatomala pea tui kiate au. Pea ko ia ia ʻokú ne tui kiate au, mo papitaisó, ʻe fakamoʻui ia” (3 Nīfai 11:32–33).
Lolotonga ʻa e ʻaʻahi ʻa Sīsū Kalaisi ki he ongo ʻAmeliká, naʻá Ne akoʻi ʻa Nīfai mo ha kau ākonga kehe fekauʻaki mo e papitaisó, ʻo Ne folofola, “ʻOku ou tuku kiate koe ʻa e mālohi ke ke papitaiso ʻa e kakaí ni ʻo ka hili ʻeku toe ʻalu hake ki langí” (3 Nīfai 11:21). Naʻe akoʻi ʻe Sīsū ʻoku totonu ke fakahoko ʻa e papitaisó ʻi he fakauku pea mo e mafai totonú. ʻI Heʻene akoʻi ki he kau ākongá ʻEne tokāteliné, naʻá Ne folofola foki fekauʻaki mo e mahuʻinga ʻo e fakatomalá: “Kuo pau ke mou fakatomala, pea hoko ʻo tatau mo ha tamasiʻi siʻi,… pe ʻe ʻikai te mou teitei maʻu ʻa e puleʻanga ʻo e ʻOtuá.” (3 Nīfai 11:38).
ʻI he konifelenisi lahi ʻo ʻEpeleli 2019, naʻe akoʻi ʻe Palesiteni Lāsolo M. Nalesoni ko e fakatomalá ko e founga ia ke liliu ai pea hoko ʻo lelei angé:
Ko e taimi ʻoku kole mai ai ʻa Sīsū kiate koe mo au ke ta “fakatomalá,” ko ʻEne fakaafe ia ke liliu ʻetau fakakaukaú, ʻeta ʻiló, hotau laumālié—pea naʻa mo e anga ʻo ʻeta moʻuí. Ko ʻEne kole ia ke liliu e anga ʻo ʻetau ʻofá, fakakaukaú, ngāué, fakaʻaongaʻi hota taimí, tōʻonga ki hota [malí], akoʻi ʻeta fānaú, pea naʻa mo hono tokangaʻi hota sinó.
ʻOku hala ha meʻa ʻe toe fakatauʻatāina ange, fakaʻeiʻeiki ange, pe toe mahuʻinga ange ki heʻetau fakalakalaka fakafoʻituituí ka ko e tokanga fakaʻaho maʻu pē ki he fakatomalá. Ko e fakatomalá ʻoku ʻikai ko ha meʻa pē ʻoku hoko; ko ha ngāue. Ko e kī ia ki he fiefia mo e nonga ʻo e ʻatamaí. Ko e taimi ʻoku fakatahaʻi ai mo e tuí, malava leva ʻe he fakatomalá ʻo ʻai ke tau maʻu ʻa e mālohi ʻo e Fakalelei ʻa Sīsū Kalaisí. (“Te Tau Lava ‘o Fai Lelei Ange pea Toe Lelei Ange,” Liahona, Mē 2019, 67)
Ngaahi Folofolá mo e Fehuʻí
Kuo akoʻi ʻe Palesiteni Nalesoni ko e fakatomalá “ko e kī ia ki he fiefia mo e nonga ʻo e ʻatamaí.” Kuo ʻomi fēfē ʻe he fakatomalá ʻa e ngaahi tāpuaki ko ʻení ki hoʻo moʻuí?
Vitiō
Hivá
“Akoʻi Au ke U ʻEva he Māmá,” Ngaahi Himí, fika 196
ʻEkitivitī maʻá e Fānaú
Ko e fakatomalá ko e taha ia ʻo e ngaahi meʻaʻofa fakaʻofoʻofa taha kuo foaki mai ʻe he Tamai Hēvaní maʻatautolú! ʻI he taimi ʻoku tau fakahoko ai ha fili halá, ʻe lava ke fakamolemoleʻi kitautolu ʻi heʻetau kole fakamolemolé, ʻi hono fai ʻo e meʻa ʻoku tau lava ke fakatonutonu iá, pea mo hono lotua ha fakamolemolé. Koeʻuhí ko Sīsū Kalaisi, te tau lava maʻu pē ʻo fakatomala pea toe feinga pē. Lau ʻa e talanoa ko ʻení ke ʻiloʻi ʻa e founga naʻe fakatomala ai ʻa Kalolina hili haʻane fakahoko ha fili halá.