“Ngaahi Akonaki Kau ki he Fono Māʻolunga Angé,” Aʻusia Fakaako ʻi he Uike Māʻoniʻoní (2026)
Pulelulu
Ngaahi Akonaki Kau ki he Fono Māʻolunga Angé
“Ko ia, ʻoku ou fakaʻamu ke mou haohaoa ʻo hangē pē ko aú, pe hangē ko e haohaoa hoʻomou Tamai ʻa ia ʻoku ʻi he langí” (3 Nīfai 12:48).
Hangē ko e kau ākonga ʻa Sīsū naʻe fakataha mai ke fanongo ki he Malanga ʻi he Moʻunga ʻi Kālelí, naʻe moʻui ʻaki ʻe he kakai naʻe fakataha ki he temipale ʻi Mahú ʻa e fono ʻa Mōsesé. Ka ʻi he akonaki ʻa Sīsuú, naʻá Ne fakaafeʻi ʻa e kakaí ke nau moʻui fakatatau mo ha fono māʻolunga ange, ʻo Ne folofola: “Ko e ngaahi meʻa ʻa ia naʻe ʻo e kuonga muʻá, ʻa ia naʻe ʻi he fonó, kuo fakakakato kotoa ia ʻiate au. Kuo fakangata ʻa e ngaahi meʻa motuʻá, kae hoko ʻo foʻou ʻa e ngaahi meʻa kotoa pē” (3 Nīfai 12:46–47).
Lolotonga ʻa e konifelenisi lahi ʻo ʻEpeleli 2023, naʻe poupouʻi kitautolu ʻe Palesiteni Lāsolo M. Nalesoni ke tau moʻui ʻi ha founga māʻolunga mo māʻoniʻoni ange. Naʻá ne akonaki ʻo pehē:
ʻI heʻetau hoko ko e kau ākonga ʻa Sīsū Kalaisí, kuo pau ke tau hoko ko e sīpinga ʻo e founga feohi mo e niʻihi kehé—tautautefito ki he taimi ʻoku kehekehe ai ʻetau fakakaukaú. Ko e taha ʻo e ngaahi founga faingofua taha ke ʻilo ai ha tokotaha muimui moʻoni ʻo Sīsū Kalaisí, ko e manavaʻofa ʻa e tokotaha ko iá ki he kakai kehé.
Naʻe fakamahinoʻi ʻeni ʻe he Fakamoʻuí ʻi Heʻene malanga ki he kau muimuí ʻi he ongo hemisifiá fakatouʻosi. Naʻá Ne folofola, “ʻOku monūʻia ʻa e faʻa fakaleleí,” [Mātiu 5:9]. …
ʻOku mahino ʻa e pōpoaki ʻa e Fakamoʻuí: ʻOku langaki, hiki hake, poupouʻi, fakalotoʻi, mo ueʻi fakalaumālie ʻa ʻEne kau ākonga moʻoní —neongo pe ko e hā hano faingataʻa ʻo e tūkungá. Ko e kau ākonga moʻoni ʻa Sīsū Kalaisí ko e kau faʻa fakalelei. …
… ʻOku mahuʻinga moʻoni ʻa e founga ʻetau fetauhiʻakí! ʻOku mahuʻinga ʻaupito ʻa e anga ʻo ʻetau talanoa ki he niʻihi kehé pea fekauʻaki mo kinautolu ʻi ʻapi, ʻi he lotú, ʻi he ngāué, pea ʻi he ʻinitanetí. ʻI he ʻaho ní, ʻoku ou kole atu kiate kitautolu ke tau feohi mo e niʻihi kehé ʻi ha founga māʻolunga mo māʻoniʻoni ange. (“Fiemaʻu ha Kau Faʻa Fakalelei,” Liahona, Mē 2023, 98–99)
Ngaahi Folofolá mo e Fehuʻí
Lolotonga hoʻo lau ʻa e ngaahi akonaki ʻi ʻolunga ʻa Sīsuú, ko e hā naʻá ke fakakaukau ki ai pe ongoʻi ʻoku ueʻi koe ke ke fai ke muimui ʻia Sīsū Kalaisí?
Vitiō
Hivá
“Muimui ʻIate Au,” Ngaahi Himí, fika 57.
ʻEkitivitī maʻá e Fānaú
Naʻe akoʻi ʻe he Fakamoʻuí ʻoku totonu ke tau ʻofa ki he niʻihi kehé. Ko e hā te ke lava ʻo fai ke fakahaaʻi ai hoʻo ʻofá ki ha taha ʻi he uiké ni? Fai ha lotu pea faʻu ha palani ke tokoniʻi kinautolu. Ko ha ngaahi fakakaukau ʻeni ʻe niʻihi!
-
Vahevahe ha kiʻi meʻakai maʻamaʻa pe fakaneifua manako.
-
Fakaafeʻi kinautolu ke nau vaʻinga pe feohi mo koe.
-
Hiki pe tā ha kiʻi tohi ʻofa maʻanautolu.