“Ko Hono Fakamoʻui ʻo e Kakaí,” Aʻusia Fakaako ʻi he Uike Māʻoniʻoní (2026)
Falaite Leleí
Ko Hono Fakamoʻui ʻo e Kakaí
“ʻOku ʻi ai ha mou niʻihi ʻoku puke ʻiate kimoutolu? … ʻOmi ʻa kinautolu ki heni pea te u fakamoʻui ʻa kinautolu, he ʻoku ou ʻofa mamahi kiate kimoutolu; ʻoku fonu hoku lotó ʻi he ʻaloʻofa.” (3 Nīfai 17:7).
Hili ha ʻaho lōloa ʻo e ngāue fakaetauhí, ʻi he teuteu ʻa Sīsū ke mavahe mei he kau Nīfaí, naʻá Ne ʻafioʻi “ʻoku nau tangi” pea ʻikai ke nau loto ke Ne ʻalu (3 Nīfai 17:5). Naʻe fakaʻaongaʻi leva ʻe he Fakamoʻuí Hono mālohi faifakamoʻuí. Naʻá Ne folofola, “Vakai, ʻoku fonu hoku lotó ʻi he ʻofa mamahi kiate kimoutolu,” (veesi 6), naʻá Ne talaange leva ke ʻomi honau kau fokoutuá kiate Ia. “Pea naʻá ne fakamoʻui ʻa kinautolu kotoa pē ʻi he ʻomi ʻa kinautolu kiate iá” (veesi 9).
ʻOku foaki ʻe Sīsū Kalaisi ʻa e manavaʻofa mo e fakamoʻui tatau kiate kitautolu takitaha ʻi he ʻahó ni. Kuo akoʻi ʻe Palesiteni Lāsolo M. Nalesoni, ko Sīsū Kalaisi ʻa e tali ki heʻetau ngaahi fehuʻí mo e ngaahi palopalemá. ʻI heʻetau talanoa fekauʻaki mo e fakaafe ʻa e Fakamoʻuí ke “tafoki mai, … koeʻuhí ke u fakamoʻui ʻa kimoutolu” (3 Nīfai 9:13), Naʻe pehē ʻe Palesiteni Nalesoni:
ʻOku fakahoko mai ʻe Sīsū Kalaisi ʻa e fakaafe tatau kiate kimoutolu ʻi he ʻahó ni. ʻOku ou kōlenga atu ke mou haʻu kiate Ia ke Ne lava ʻo fakamoʻui ʻa kimoutolu! Te Ne fakamoʻui ʻa kimoutolu mei he angahalá ʻi hoʻomou fakatomalá. Te Ne fakamoʻui ʻa kimoutolu mei he loto-mamahí mo e ilifiá. Te Ne fakamoʻui ʻa kimoutolu mei he ngaahi kafo ʻo e māmani ko ʻení.
Ko e hā pē haʻamou ngaahi fehuʻi pe palopalema, ʻoku maʻu maʻu pē ʻa e talí ʻi he moʻui mo e ngaahi akonaki ʻa Sīsū Kalaisí. Ako lahi ange fekauʻaki mo ʻEne Fakaleleí, ʻEne ʻofá, ʻEne ʻaloʻofá, ʻEne tokāteliné, mo ʻEne ongoongolelei ʻo e faifakamoʻuí mo e fakalakalaká kuo fakafoki maí. Tafoki kiate Ia! Muimui ʻiate Ia! (“Ko Sīsū Kalaisi Maʻu Pē ʻa e Talí,” Liahona, Mē 2023, 127)
Ngaahi Folofolá mo e Ngaahi Fehuʻí
Ko e fē ha taimi kuó ke ongoʻi ai ʻa e mālohi faifakamoʻui ʻo e Fakamoʻuí Ko e hā ha ngaahi founga ʻokú ke fiemaʻu ai Hono mālohi faifakamoʻuí ʻi he taimí ni?
Vitiō
Hivá
“ʻOku Fakaofo,” Ngaahi Himí, fika 102
ʻEkitivitī maʻá e Fānaú
Lau pe mamata ʻi he talanoa fakafolofola kuo tā fakatātaaʻi ko ʻení ke ako fekauʻaki mo e founga naʻe fakahaaʻi ai ʻe Sīsū ʻa e angaʻofá mo fakamoʻui ʻa e kakai naʻe tui kiate Iá. Ko e hā ha meʻa te ke lava ʻo fai ke fakahaaʻi ʻa e angaʻofá ki he niʻihi kehé?