Pag-alim sa mga Kasingkasing Tadlas sa mga Henerasyon: Mga Saad sa Buhat sa Family History

Nganong magbuhat kita og pagsiksik sa family history? Si Presidente Dallin H. Oaks, Unang Magtatambag sa Unang Kapangulohan, mitudlo nga, “Ang atong Langitnong Amahan nagtinguha sa Iyang tanan nga anak nga makabalik sa celestial nga gingharian, diin ang Dios ug ang atong Manluluwas nagpuyo.” Nagtabang kita nga mahitabo kini pinaagi sa pagkuha sa mga ngalan sa pamilya ug pagpahigayon og mga ordinansa alang sa atong mga katigulangan.

“Kon sugoon kita sa Dios og usa ka butang, sa kasagaran daghan Siya og tuyo sa paghimo niini,” nakamatikod si Elder Dale G. Renlund sa Korum sa Napulog Duha ka Apostoles. “Ang buhat sa family history ug sa templo dili lang para sa mga patay apan mopanalangin usab sa mga buhi.” Dunay daghang saad nga may kalabotan sa paghimo sa buhat sa family history nga makaapekto sa atong mortal nga kinabuhi. Naglakip kini sa nagtubo nga pagpamatuod kang Jesukristo, mas dako nga gahom sa pagbatok sa mga tentasyon, pag-ayo alang sa imong kaugalingon ug sa imong pamilya, ug mas daghan pa (tan-awa diha sa gipauban nga sidebar “Makaayo nga mga Panalangin nga Gisaad sa mga Propeta ug mga Apostoles”).

Kon ikaw nagkinahanglan og mga milagro o mga panalangin, ang family history makatabang kanimo. Si Sam ug Betsy (ang mga ngalan giusab) nakasinati niana nga milagro sa ilang pamilya. Duna silay anak nga nahilayo kanila sulod sa mga katuigan. Nadasig sa pakigpulong nga “Buhat sa Family History ug sa Templo: Pagselyo ug Pagkaayo” ni Elder Renlund, nakahukom sila nga mopahinungod og panahon matag Dominggo sa buhat sa family history. Human sa daghang mga bulan, nahiusa sila og balik sa ilang anak ug napalig-on og balik ang ilang relasyon. Ang Espiritu mikompirma kanila nga kini nga milagro miabot tungod kay gisunod nila ang pagdapit ni Elder Renlund sa paghimo og buhat sa family history.

Ang ilang kasinatian maoy usa sa daghan nga nagpamatuod sa hilom nga mga milagro nga nagsumpay sa buhat sa templo ug sa family history. Ang imong mga kasinatin tingali dili sama sa ilaha. Ang Ginoo, sa Iyang kaalam, mopanalangin kanimo diha sa eksakto nga dalan sa eksaktong panahon.

Litrato gikan sa Getty Images

2. Molakang og Ginagmay alang sa Dagkong mga Ganti

Ang mga saad sa family history wala magkinahanglan og advance nga mga kahanas o daghang oras sa pagtrabaho. Magsugod sa yano ug palamboa gikan diha. Maghisgot mahitungod sa kinabuhi sa imong mga ginikanan o mga apohan atol sa panihapon. Magbasa og mga handomanan sa mga katigulangan diha sa FamilySearch.org o sa mobile app. Maghimo og usa ka handomanan nga basahon mahitungod sa imong mga anak, sa imong kinabuhi, o sa kinabuhi sa uban.

Ang pagkat-on mahitungod sa mga sakop sa pamilya makausab kanimo. Bag-ohay lang nagbasa ko og mga sugilanon gikan sa kinabuhi sa mga katigulangan sa akong bana ug sa ilang mga panlimbasog sa pagpakabuhi samtang nagmina og asin didto sa central Utah. Migahin ko og daghang oras nga nakatutok sa kasaysayan sa ilang kinabuhi. Akong naamgohan nga mas daghan ang ilang gibuhat sa paghimo og mga asoy [accounts] mahitungod sa kinabuhi sa mga katigulangan. Mga leksiyon kini mahitungod sa kalig-on. Ang ilang kalig-on atubangan sa kalisdanan nakatuhop og pipila ka butang sa akong kahiladman, nagpuno kanako og pagpasalamat sa mga pagsulay nga akong giatubang sa kaugalingon nakong kinabuhi. Ang ilang dili mapaling nga pagtuo milig-on sa akong pagpamatuod. Ang ilang mga sugilanon nagpahinumdom kanako nga tanan kita usa ka bahin sa pipila ka butang nga mahangtoron, butang nga mas labaw kamahinungdanon kaysa atong kaugalingon.

Si Elder Neil L. Andersen sa Korum sa Napulog Duha ka Apostoles mitudlo: “Kining [mortal nga panaw] kabahin lamang sa mahangturon nga panaw, ug kadtong nanagpuyo kauban kanato kaniadto, sila buhi sa gihapon. Ug kadtong nanagpuyo mga siglo ang milabay, sila buhi sa gihapon. Ug sila nga moabot human kanato, sila mabuhi.”

Dihang nanagko na ang akong mga anak ug nagsugod og ilang kaugalingong mga pamilya, sa kasagaran maghunahuna ko unsaon sa pagpakigbahin sa akong gugma sa family history—ilabi na ngadto niadtong ingon og dili interesado. Gusto kong masinati nila ang kalig-on, kusog, ug kalipay nga nahatag kanako tungod sa family history sulod sa mga katuigan. Usa ka tuig, mitambong ko og RootsTech ug nakadungog sa hugpong sa mga pulong nga “pagkaila sa atong mga katigulangan sa personal [putting flesh on the bones]”. Kadto ang labing importante nga akong gikinahanglan. Nianang tuiga miapil ko og mga klase diin nakakat-on ko og mga paagi ug mga teknik alang sa pakigkita sa mga sakop sa akong pamilya sigon sa ilang interes.

Ang Rootstech.org nagtanyag og gatosan ka libre nga pagbansay nga mga bidyo. Ang mga klase magsukad sa pagkat-on sa mga sukaranan [basics] ngadto sa advance nga pagsiksik. Mahimo kang motan-aw og mga klase kabahin sa piho nga hiyograpikanhong mga lokasyon, pagsulat og personal nga kasaysayan, pagsiksik sa DNA, ug daghan pa. Magdugang og nangagi nga mga sesyon diha sa imong iskedyul ug tan-awon kini bisan kanus-a.

Kon moapil ka sa buhat sa templo ug family history imong makita nga mopanalangin kini og daghan pa kay sa imong mga katigulangan. Makahatag kini kanimo og kahupayan atol sa mga panahon sa kasubo ug kaluya, molig-on sa imong pamilya, ug mopalawom sa imong pagpamatuod sa Langitnong Amahan ug ni Jesukristo.