Ang Labing Maayo nga Mahatag Nato sa Atong mga Pamilya

Ni Elder Sandino Roman

Sa Seventy

Kinahanglan buhaton nato ang tanan natong mahimo aron mapaabot ang kahibalo ug mga panalangin sa ebanghelyo ngadto sa atong mga anak ug sa uban.

paghulagway sa usa ka amahan nga nagkupot sa iyang gamayng bata

Sa sayo nga bahin sa akong kinabuhi, ang akong mga ginikanan naglisod sa ilang kaminyoon, ug kini nakaapekto sa among pamilya. Sa dihang nahibaloan kini sa higala sa akong inahan, siya miingon sa akong inahan, “Unsa kahay maayo og moadto ka ug magkat-on mahitungod sa akong simbahan?” Miingon ang akong inahan nga siya ug ang akong amahan dili pa andam alang niana. Ang iyang higala miingon, “Nganong dili man nimo pakuyogon ngari nako ang imong mga anak?” Singko anyos pa ko nianang higayona. Ang akong igsoong babaye otso anyos.

Kining maayo nga higala midala nako ug sa akong igsoong babaye ngadto sa simbahan sulod sa pipila ka tuig. Nakahinumdom ko nga nakasinati sa hingpit nga kalipay sa gipahiuli nga ebanghelyo ni Jesukristo. Samtang milambo ang akong pagpamatuod, nangandoy ko ug nag-ampo nga ang akong mga ginikanan sa kataposan magkat-on mahitungod sa ebanghelyo. Sa dihang ang akong igsoong babaye nakahukom nga magpabunyag, ang akong mga ginikanan mibati nga kinahanglan silang magkat-on og dugang mahitungod sa Simbahan.

Samtang ang akong mga ginikanan nagsugod sa pagkat-on mahitungod sa kamatuoran sa ebanghelyo, nakita nako ang pagkausab sa ilang kasingkasing. Sila nagmapainubsanon, ug midawat sa ebanghelyo. Usa ka tuig human sila mipasakop sa Simbahan, nag-otso anyos na ko ug ang akong amahan ang mibunyag nako. Ang Langitnong Amahan nakadungog ug mitubag sa akong mga pag-ampo.

Tulo ka tuig human niana, ang Mexico City Temple gipahinungod. Ako adunay kahigayonan nga moadto didto uban sa akong pamilya. Miluhod kami sa matahom nga altar aron maselyo nga mag-uban sa kahangtoran, ug kami nagmaya sa mga saad ug paglaom nga gidala ni Jesukristo ug sa Iyang ebanghelyo. Mga tuig human niana, ang akong asawa ug ako naselyo diha sa sama nga balay sa Ginoo.

Nakahinumdom ko sa dihang natawo ang una nakong anak nga babaye. Niadtong malumo nga mga higayon sa dihang ako siyang gikugos, natandog kaayo ko sa kaputli sa akong gamayng anak nga babaye ug sa natural nga gugma ug tinguha nako isip iyang amahan nga mopanalipod kaniya, mosangkap alang niya, ug motudlo niya sa labing maayo nga mahatag nako niya. Naghunahuna sa mga kahimtang niining napukan nga kalibotan nga bag-o lang gianhian sa akong anak, usa ka lig-on nga pagbati sa paglaom ug responsibilidad ang mitubo diha nako tungod sa mga pakigsaad nga gihimo sa akong asawa ug nako uban sa Ginoo diha sa templo. Naamgohan nako nga ang labing maayo nga posibleng matudlo nako sa akong anak nga babaye—ug, sa umaabot nga panahon, sa tanan nakong anak—mao ang ebanghelyo ni Jesukristo. Kini mao ang eksaktong gibuhat sa Ginoo nganhi nato sukad sa sinugdanan.

Usa ka Sagradong Responsibilidad

Ang Ginoo nagsugo kang Adan sa pagtudlo sa iyang mga anak “aron ang tanang tawo, bisan asa, kinahanglan maghinulsol, o dili sila makapanunod sa gingharian sa Dios. …

“Busa mohatag ko kanimo og usa ka sugo, sa pagtudlo niini nga mga butang sa gawasnon nga paagi ngadto sa imong mga anak, nga mag-ingon:

“… Ikaw kinahanglan nga matawo pag-usab ngadto sa gingharian sa langit, sa tubig, ug sa Espiritu, ug malimpyohan pinaagi sa dugo, gani sa dugo sa akong Bugtong Anak; aron ikaw mabalaan gikan sa tanang sala, ug matagamtam ang mga pulong sa kinabuhing dayon niini nga kalibotan, ug kinabuhing dayon sa kalibotan nga moabot. …

“Ug karon, tan-awa, sultihan ko ikaw: Kini mao ang plano sa kaluwasan ngadto sa tanang tawo” (Moises 6:57–59, 62).

Ang pamilya mao ang labing maayo nga dapit alang sa pagkat-on mahitugod sa ebanghelyo ni Jesukristo. Si Presidente Dallin H. Oaks, Unang Magtatambag sa Unang Kapangulohan, mitudlo, “Sa maayong paagi, ang [amahan ug inahan] anaa, nga adunay managlahing mga gasa sa paggiya sa kalamboan sa [ilang mga anak].” Apan bisan kon ang mga sitwasyon dili mao kon unsay gilaoman, kita makatudlo gihapon sa atong mga anak sa doktrina ni Kristo ug sa kamahinungdanon sa pagdawat ug paggamit sa Pag-ula ni Jesukristo diha sa ilang kinabuhi. Ug, hinaot unta, ang ebanghelyo ilang masabtan ug dawaton.

Ang ebanghelyo motabang nato nga motudlo sa atong mga anak nga makat-on sa kalainan tali sa maayo ug daotan. May mga higayon, sila kinahanglan nga “matilawan nila ang kapait, aron masayod sila sa paghatag og bili sa maayo” (Moises 6:55). Samtang ang atong mga anak makat-on, sila mahimong “tinugyanan sa ilang mga kaugalingon” (Moises 6:56). Sila mahimong mopili nga mosunod kon unsay atong gitudlo o modesisyon nga dili mosunod, apan kita wala mag-inusara samtang atong gituman kining balaan nga responsibilidad.

Ang Gasa sa Espiritu Santo

Kon kita motuo ni Jesukristo, maghinulsol, ug mabunyagan, ang Ginoo miingon, “Makadawat ka sa gasa sa Espiritu Santo” (Moises 6:52). Mao kini ang usa sa labing talagsaong gasa nga atong madawat. Walay mas labaw pa nga kauban nga molimpyo ug mobalaan nato ug mousab sa atong mga kinaiya alang sa mas maayo, “maghimo nato nga mas balaan, mas kompleto, ug mas sama sa Dios (tan-awa sa 3 Nephi 27:20).”

Kinahanglang buhaton nato ang tanan natong mahimo aron matabangan ang atong mga anak ug ang uban nga makahibalo nga ang Espiritu Santo usa ka tinuod gayod nga panalangin ug usa ka bililhon nga gasa gikan sa Dios. Ang Espiritu Santo “gihatag aron magpabilin diha [kanato]; ang talaan sa langit; ang Maghuhupay; ang malinawong mga butang sa imortal nga himaya; ang kamatuoran sa tanang butang; nga nagpalihok sa tanang butang, nga nakapabuhi sa tanang butang, nga nasayod sa tanang butang” (Moises 6:61).

Kauban sa labing maayo nga mga butang nga atong mabuhat alang sa atong mga pamilya mao ang pagtabang nila nga mosalig sa Dios sa tibuok nilang kinabuhi ug ipadayon ang pagpabilin sa kanunay nga pakig-uban sa Espiritu Santo.

Angay Kini sa Matag Paningkamot

Ako mapasalamaton sa akong kahibalo sa ebanghelyo ni Jesukristo. Ako mapasalamaton alang sa responsibilidad ug sa kahigayonan sa akong asawa ug nako nga ipaabot kini nga kahibalo ug ang mga panalangin sa ebanghelyo ngadto sa among mga anak ug ngadto sa uban.

Kini usa ka nagpadayon nga proseso. Ang akong asawa ug ako nagbuhat gihapon sa pagtudlo sa among mga anak, ug sila naghimo sa ilang kaugalingon nga mga desisyon base sa kabubut-on nga gihatag sa Dios alang nila. Ang padayon nga gawasnong pagtudlo niining mga butanga ngadto sa among mga anak mao ang labing maayo nga butang nga among mabuhat alang nila, ug angay kini sa matag paningkamot. Nasayod ko niini gikan sa kasinatian. Nakita nako kon giunsa sa Manluluwas ug sa Iyang ebanghelyo paglimpyo nako ug sa akong mga gana. Dili nako mahunahuna kon asa kaha ko kon wala pa kini. Unsa kaha ang mahitabo sa akong pamilya nga magdako sa usa ka gamay nga lungsod sa tunga-tunga sa Mexico kon wala pa namo makaplagi ang gipahiuli nga ebanghelyo? Sa tinud-anay lang dili nako makita unsa ang akong kaugalingon kon wala ang gipahiuli nga ebanghelyo.

Igo gayod ang matag pagkugi sa pagdawat sa pagdapit sa Manluluwas nga maningkamot nga mahimong hingpit sama Niya ug sa atong Amahan sa Langit (tan-awa sa 3 Nephi 12:48) ug sa pagdasig sa atong mga minahal nga mohimo og sama niini. Kon buhaton nato kini, kita sa kataposan mahimong balaan sama Nila. Ug bisan pa kon nakasinati kita og kapintas, kalisod, ug mga kawalay kaangayan niining kinabuhia, adunay paglaom pinaagi sa Pag-ula ni Jesukristo (tan-awa sa Moroni 7:41). Ang mga ordinansa ug mga pakigsaad sa Iyang ebanghelyo nagbugkos kanato—ug sa atong mga pamilya—ngadto Kaniya ug sa atong Langitnong Amahan, kinsa mihimo sa tanang butang nga posible alang sa atong mahangtoron nga kalipay.

Unta kita maningkamot nga mobuhat sa tanan natong mahimo aron matabangan ang atong mga anak ug kadtong atong gihigugma nga magpuyo sa ebanghelyo ni Jesukristo. Mao kini ang labing maayo nga atong mahatag nila karon ug sa kahangtoran.