Pagserbisyo: Among Labing Dako nga Kalipay

Atol sa COVID-19 nga pandemya, kadtong adunay permanenteng mga trabaho sa Peru duna gihapoy kinitaan, apan daghan nga taga-Peru mga negosyante nga mamaligyaay og mga butang diha sa kadalanan. Ang mga tawo dili angay nga mobiya sa ilang mga panimalay tungod sa kwarantina, mao nga labihan ka daghang tawo ang dili makatrabaho.

Usa ka adlaw ang grupo sa mga mananayaw nga may banda nangabot sa among dalan ug nagsugod sa pagpasundayag. Ang mga kasilinganan miitsa og mga sensilyo kanila gikan sa ilang mga pultahan. Kadtong walay mga kwarta nanghatag kanila og pagkaon.

Sakit kaayo sa akong kasingkasing nga makakita og ingon niana nga mga tawo nga nanginahanglan. Ang akong pamilya wala kaayoy daghan, apan mas daghan kini kay sa ilaha. Gitabangan namo sila kutob sa among mahimo.

Kadto nga kasinatian nagtudlo kanako nga ang Ginoo nakakita kanamo ug sa among panginahanglan, ug nakaserbisyo kini og maayo kanako ingon man sa akong calling isip bishop. Uban sa maayo kaayong responsibilidad sa pag-atiman sa mga anak sa Dios, aduna akoy gibati niana nga calling nga wala pa nako mabatyagi sukad samtang nagserbisyo ko sa ubang mga calling.

Dihang nagpadayon na ang akong trabaho human sa pandemya, sa kasagaran mauli ko sa balay mga alas 8:00 sa gabii. Dayon moadto ko sa chapel sa pagpahigayon og mga interbyu sa mga tawo nga nagkinahanglan sa akong tambag ug pangalagad. Ang mga interbyo usahay madugay.

Samtang nangalagad, mibati ko sa talagsaong gugma sa Ginoo alang sa Iyang mga anak. Usa kadto ka labihan ka talagsaon nga pagbati nga wala nako mabati kaniadto. Usahay mouli ko nga magbakho.

Sa ubang panahon, mobati og kaluya ug kahuyang, apan ang Ginoo nagsuporta kanako atol sa akong panahon isip bishop. Ang akong asawa usab nagsuporta kanako, ug mapasalamaton ko nga ang akong mga anak makakita kanako nga nagserbisyo sa Ginoo.

Nagtubo usab ako nga nakasabot sa talagsaong gugma sa atong mga lider alang kanato. Mapasalamaton ako sa unsang paagi kana nga kahibalo nakatabang sa akong pagpamatuod nga motubo. Ug mapasalamaton ako nga ang Ginoo mipanalangin kanako og gasa sa gugmang putli (tan-awa sa Moroni 7:46–48).

Mibati ko nga ang Dios mihatag kanako og oportunidad nga makaserbisyo nga dili angay kanako. Sa kasagaran mangutana ko sa akong kaugalingon, “Nganong ako?” Akong nasabtan nga ang Ginoo nahigugma kanako ug nakakita og butang ngari kanako nga wala nako makita sa akong kaugalingon.

Walay mawala kanato sa pagserbisyo sa Ginoo. Sa tanan nga kalihokan nga among maapilan pinaagi sa Iyang Simbahan, nasayod ko nga ang pagserbisyo, pagpangalagad sa uban, ug pagkahimong mga kamot sa Ginoo atol sa lisod nga mga panahon magdala ngari kanato og talagsaong kalipay (tan-awa sa Mosiah 2:17).