“Trapped in a Ditch,” Liahona, Peb. 2026.
Mga Tingog sa mga Santos sa Ulahing mga Adlaw
Natanggong sa Lapok
Ang gamay nga kabayo nagdumili sa pagduol ngadto sa iyang inahan hangtod nga dunay usa ka talagsaong butang nga nahitabo.
Paghulagway pinaagi ni David Green
Samtang nagtrabaho isip consultant sa umahan pipila ka tuig ang milabay sa habagatan sa Casa Grande, Arizona, USA, nakakita ko og usa ka baye nga kabayo sa tunga sa umahan sa alfalfa.
“Wala gayod untay bisan unsang kabayo didto,” miingon ko sa akong kaugalingon. Dihang nagpaduol ko, nakita nako ang usa ka nati nga kabayo nga nasangit sa atbang nga sementado nga irigasyon sa lapok. Ang nati nga kabayo, nga usa o duha pa lang ka-adlaw sukad naanak, gamay ra kaayo nga dili siya makalukso pagawas sa lapok. Nalaming siya.
Dihang giduol nako siya, ang baye nga kabayo didto sa umahan nasamok. Milukso ko sa uga nga lapok ug kalma nga nakigsulti sa iyang anak, giapuhap kini, gipunit, ug gibutang dapit sa daplin sa lapok.
Imbis moadto sa iyang inahan, milukso siya og balik ngadto sa lapok. Gigunitan nako ang iyang tuo nga tiil, gibira na usab pagawas sa lapok, ug gipaatubang nako sa iyang inahan. Dali kaayo siyang nituyok ug misulay na usab sa pag-ambak ngadto sa lapok.
Gihakop nako siya sa ikatulong higayon ug nakigsulti na usab og hinay kaniya samtang gikugos nako siya padulong sa iyang inahan. Dihang gibiyaan nako siya ug misugod sa pagpalayo, misunod siya kanako!
“Ayaw,” miingon ko nga nagtudlo og balik ngadto sa iyang inahan, “kinahanglan ka nga moadto sa imong inahan.”
Dayon pipila ka butang nga talagsaon ang nahitabo. Mibahihi ang iyang inahan. Diha dayon, ang gamay nga kabayo nakamatikod sa tingog sa iyang inahan ug miadto dayon kaniya. Silang duha nagdinaganay dayon ngadto sa umahan padulong sa disyerto.
Samtang gipamalandongan ko kini nga kasinatian, naghunahuna ko kon pila kaha kanato ang nahulog ngadto sa lapok nga dili na kita makagawas o magsige lang og kahulog didto. Tingali sa lapok sa sala o pagkaadik o pagduhaduna.
Si Presidente Russell M. Nelson mitudlo, “Kita kinahanglan nga maminaw sa mga pulong sa Ginoo, mopatalinghog niini, ug mamati unsay Iyang gisulti kanato!” Miingon siya nga kita makadungog sa tingog sa Ginoo diha sa mga kasulatan ug sa templo, diha sa mga pulong sa ulahing-adlaw nga mga propeta ug apostoles, ug pinaagi sa mga paghunghong sa Espiritu Santo.
Ang nati nga karnero naluwas dihang ang iyang inahan mitawag kaniya. Nakaila siya sa iyang tingog ug misunod kaniya.
Ang Maayong Magbalantay nagtawag kanato. Kon maminaw kita sa Iyang tingog ug mosunod Kaniya (tan-awa sa Alma 5:37, 41), Siya mobayaw kanato kon kita mahulog, moayo kanato, ug modala kanato pauli.