Nganong Ingon Niini ang Pag-aghat?

Paghulagway pinaagi ni David Green

Didto sa Concord, California, USA, nagtudlo ko og biology sa high school, mga siyensya sa kinabuhi, ug art, lakip ang advanced art nga kredit sa klase sa kolehiyo human sa eskwela. Naghimo usab ako og mga field trip kauban sa akong mga estudyante aron makatan-aw og pipila ka bahandi sa art sa San Francisco Bay Area.

Sa usa ka field trip, among giplano nga mobisita sa usa ka koleksiyon sa Rodin nga bronse nga mga kinulit ug ubang mga buhat sa art sa usa ka museyo sa San Francisco ug dayon maniudto sa Golden Gate Park. Mahinamon kaayong gipaabot sa mga estudyante kini nga trip.

Giplano namo nga mangadto pagka-Oktubre 17, 1989, apan nianang pagkabuntag duna koy dili komportableng makahahadlok nga pagbati. Akong gibati nga dili lang gyod unâ mi mangadto sa San Francisco, apan wala ko makasabot kon ngano. Ang espirituhanong impresyon kusog kaayo ug padayon sa tibuok buntag. Gisulayan nako sa pagbaliwala kini, nag-ampo sa hilom aron masayod basin nagsinati lang ko og walay hinungdan nga kahadlok o normal nga kabalaka isip tinugyanan sa daghang mga tin-edyer sa bag-o nga palibot.

Apan ang usa ka panghunahuna miabot kanako gikan sa mga kasulatan nga dili nako ikabaliwala:

“Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo, nga moabot diha kanimo ug nga mopuyo diha sa imong kasingkasing.

“Karon tan-awa, mao kini ang espiritu sa pagpadayag” (Doktrina ug mga Pakigsaad 8:2–3).

Kadto nga hunahuna nagkompirma nga dili gayod nako idayon ang byahe. Dihang gisultihan nako ang mga estudyante nga dili mi mangadto, ang pagpanghupaw ug pagbagulbol sa kasagmuyo madungog sa tibuok campus. Giingnan nako sila nga pasayloa ko apan akong gibati nga dili ta mangadto. Hinoon, maghimo kami og advance nga klase sa art human sa kasagaran nga klase. Misaad ko nga buhaton namo ang field trip sa laing higayon.

Kaysa diha ra sa sulod sa klase nianang hapona, mihukom ko nga mangadto mi sa parke nga tupad sa nataran sa eskwelahan, mga 150 ka yarda gikan sa klasrom, ug mag-drowing. Naglingkod ko sa bangko sa konkreto nga lamesa nagpakita og pipila ka teknik alang sa mga estudyante dihang nabatyagan nako nga natay-og ang lamesa.

Sulod sa usa ka segundo nagtuo ko nga may estudyante nga nipatid sa lamesa, apan sa kalit ang mga kahoy sa parke grabe ang pagkauyog. Nangalungi ang mga sanga. Ang nataran sa parke nangatay-og sama sa trapo nga giwarawara. Ang terible nga pagtay-og nahimong usa ka pag-ugong. Pipila sa mga estudyante nagsugod sa pagbakho ug pagdanguyngoy. Human sa 20 ka segundo, ang hilabihan nga kahilom maoy misunod.

Dihang ang kasaba ug pagtay-og nahunong, sa hilom namalik kami sa klasrom. Ang nagkatag nga mga art sa kwarto nagsusapinday. Ang kuryente sa eskwelahan napalong, ug ang kwarto ngitngit. Gipamalhin nako ang mga materyal ug gisultihan ang mga estudyante nga modiretso na sa pag-uli, gikandadohan ang kwarto, ug mibiya.

Dihang padulong ko nga mopauli, ang radyo sa sakyanan nagreport nga usa ka linog nga dunay 6.9 nga gikusgon sa Richter scale miigo sa Bay Area. Liboan ang naangol ug dinosena ang nangamatay. Sa San Francisco, daghan nga bilding nangasunog o nangahagsa. Ang mga karsada ug mga tulay gipangsirad-an. Hapit dangti og kapin sa usa ka semana una pa ang pipila ka tawo nga natanggong sa siyudad nakapauli. Midangat og mga katuigan ang pag-ayo sa mga bilding nga hilabihan ang pagkadaot, lakip ang museyo diin ang akong mga estudyante ug ako nagplano nga mogahin didto niana nga hapon.

Mapasalamaton ko nga mahibalo nga ang atong Amahan sa Langit nahigugma kanamo ug nga Siya mahunahunaon ug nagbantay kanamo sumala sa Iyang kabubut-on. Mapasalamaton ako nga pinaagi sa mga paghunghong sa Espiritu Santo, Iya kitang gipasidan-an sa pisikal ug sa espirituwal nga mga peligro kon kita adunay mga dalunggan nga maminaw.

“Makaampo kita sa atong Langitnong Amahan ug makadawat og giya ug direksiyon, mapahimangnoan mahitungod sa mga kakuyaw ug sa mga makabalda, ug makabuhat og mga butang nga dili gayod nato mahimo kon kita lang,” si Presidente Russell M. Nelson mitudlo. “Kon kita tinuoray nga modawat sa Espiritu Santo ug magkat-on sa pag-ila ug pagsabot sa Iyang mga pag-aghat, magiyahan kita sa mga sitwasyon nga dagko ug gagmay.”

Nasayod ako nga tinuod kana.