Juan: Ang “Tinun-an nga Gimahal ni Jesus”

Ni Eric D. Snider

Mga Magasin sa Simbahan

Si Juan nga Tigpadayag mipadayon sa pagkat-on kang Kristo human sa Iyang Pagkabanhaw.

Si Juan usa sa Napulog Duha ka Apostoles sa Manluluwas. Siya ug ang iyang igsoong lalaki nga si Santiago ug ang ilang kauban nga Apostol nga si Pedro kabahin sa mga suod sa Ginoo, dinha uban Kaniya bisan nga wala dinha ang ubang siyam. Bisan niining kasuod sa tulo ngadto sa Manluluwas, talagsaon ang relasyon ni Juan uban ni Jesus.

Siya mao lamang ang usa sa mga Apostol nga nahisulat nga nakasaksi sa Paglansang sa Krus. Sobra sa 90 porsyento sa iyang Ebanghelyo naglangkob og materyal nga dili makaplagan sa ubang tulo (lakip sa usa nga nasulat ni Mateo, kauban nga Apostol). Si Juan kadto kinsa milingkod tapad ug mibutang sa iyang ulo diha ni Jesus atol sa Kataposan nga Panihapon (tan-awa sa Juan 13:23). Si Juan kadto kinsa ang gipabuhat sa Manluluwas sa pag-amuma sa Iyang inahan human sa Iyang pagbiya (tan-awa sa Juan 19:26–27).

Ug si Juan kadto kinsa mitawag sa iyang kaugalingon nga ang “tinun-an nga gimahal ni Jesus” (Juan 21:7). Ang mga Kristiyanos nahibulong sulod sa mga siglo unsay gipasabot ni Juan niini; bisan pa man, ang Ginoo nahigugma sa tanan. Si Elder Karl D. Hirst sa Seventy miingon, “Gusto nakong hunahunaon nga tungod kay gibati ni Juan nga gipangga kaayo ni Jesus.” Iyang gitandi kini ngadto sa pakisayran ni Nephi “akong Jesus” (2 Nephi 33:6)—usa ka koneksiyon nga lawom kaayo ug personal nga daw eksklusibo. Gikan niana nga panglantaw, samtang magkat-on kita sa Ginoo ug motubo duol Kaniya, makapaningkamot kita nga mahimo nga “tinun-an nga gimahal ni Jesus.”

Hilabihan nga Gugma

Ang gugma usa ka nagbalik-balik nga tema sa sinulat ni Juan. Sa Iningles, ang pulong nga mahal [gugma] makita 57 ka higayon diha sa Ebanghelyo ni Juan. Sobra pa kana kay sa ubang tulo ka Ebanghelyo nga gitipon, tungod kay si Juan mokutlo og kadaghan sa mga pagtulon-an sa Manluluwas mahitungod sa gugma kay sa gibuhat sa uban. Mahal [Gugma] makita sa laing 48 ka higayon diha sa 105 ka bersikulo sa Unang Epistola ni Juan. Unsa ka angay nga ang “tinun-an nga gimahal ni Jesus” makadawat sa gugma isip ang pinaka-tema.

Ang pagkatinun-an ni Juan nagsugod sa wala pa niya makita si Jesus. Daw siya sumusunod ni Juan nga Magbubunyag ug mituo sa pagpamatuod sa Pagbunyag ni Jesus (tan-awa sa Juan 1:35–40). Si Juan ang Apostol sa wala madugay mao si Juan ang Tigpadayag, na-orden nang daan sa pagsulat mahitungod sa kataposan sa kalibotan (tan-awa sa 1 Nephi 14:20–27). Gipakitaan siya sa mga butang nga pipila lang sa uban ang nakakita ug nagpadayon, uban sa tulo ka disipulo nga Nephita (tan-awa sa 3 Nephi 28:4–10), aron sa pagpangalagad sa katawhan sulod sa hapit 20 ka siglo (ug padayon pa ang ihap). Ang espirituhanong kahibalo ug kasinatian ni Juan hapit seguro walay nakalupig.

Gani kana nga pagsabot nahitabo sa hinayhinay. Sa dihang si Juan mas kusog pang midagan kay kang Pedro padulong sa wala nay sulod nga lubnganan sa Pasko sa Pagkabanhaw, wala siya mosulod og deretso apan “mipaabot sa senior nga Apostol, kinsa misulod og una sa lubnganan.” Si Juan, mitala niining higayona nga siya ug si Pedro “nagtuo” sa Pagkabanhaw: “Wala gihapon sila makasabot sa bahin sa kasulatan nga nag-ingon nga mabanhaw siya” (Juan 20:8–9).

Kon si Juan—usa sa suod kaayo nga higala sa Ginoo ug labing gisaligan nga mga magtatambag, ang “tinun-an nga gimahal ni Jesus”—wala gayod makasabot sa misyon ni Jesus hangtod nga siya nakakita sa wala nay sulod nga lubnganan, kinahanglan kitang maghinay sa atong kaugalingon kon mapakyas kitang makasabot og usa ka butang. Ang kinabuhi ni Juan ug ang iyang walay kinutoban nga misyon nagpahinumdom kanato nga bisan og sa mga tinun-an—ilabi na alang sa mga tinun-an—ang proseso sa paghibalo sa Manluluwas nagpadayon.