“Nicodemo: Nagtinguha nga Makahibalo sa Kamatuoran bahin ni Kristo,” Liahona, Peb. 2026.
Nakaila Sila sa Manluluwas
Nicodemo: Nagtinguha nga Makahibalo sa Kamatuoran bahin ni Kristo
Dili gayod kita mahibalo niining kinabuhia kon sa unsang paagi natapos ang istorya bahin ni Nicodemo, apan makakuha kita og mga pagtulun-an gikan sa iyang mga pakig-inter-aksyon sa Manluluwas samtang mangandam kita alang sa Pasko sa Pagkabanhaw.
Paghulagway pinaagi ni Laura Serra
Mahitungod sa sugilanon sa kinabuhi, ang mga detalye mahitungod ni Necodemo dili daghan diha sa Bag-ong Tugon. Nasayod kita nga usa siya ka Pariseo ug “pangulo sa mga Judio” (Juan 3:1). Kwalipikado siya nga moapil sa Sanhedrin ug malagmit adunahan. Kini nga mga kinaiyahan nagpakita og taas nga kahimtang sa kasaysayan sa katilingban sa mga Judeo. Bisan pa, ang kabililhon sa iyang pagkadisipulo padayon nga gitabonan.
Siya ba sekreto nga disipulo o dili? Mituo ba siya nga si Jesus mao ang Mesiyas? Ang lit-ag ba sa gidak-on ug kalibotanong mga kaagabay nagpugong kaniya sa paghangop sa pagkadisipulo? Ang mga kasulatan wala mag-ingon, apan isip modernong mga sumusunod ni Kristo, nga kita maka-angkon og mga panabot gikan sa mga gibuhat ni Nicodemo samtang magtinguha kita kang Jesukristo niining panahon sa Pasko sa Pagkabanhaw.
Ang Pagsugat ni Jesus
Sa unang higayon nga makita si Nicodemo diha sa paghisgot sa Ebanghelyo, siya tago nga nakigkita ni Jesus sa gabii. Naglibog siya sa deklarasyon sa Manluluwas nga “gawas kon ang tawo igaanak pag-usab, dili siya makakita sa gingharian sa Dios” (Juan 3:3). Gisusi ni Nicodemo kini nga pamahayag, nagtan-aw sa pagtulun-an sa literal nga paagi. Si Jesus mainampingon nga mibadlong kaniya, naningkamot nga ikapakita ang esprituhanong kahulogan sa Iyang mga pulong ug tahas isip ang Mesiyas. Ang panagtagbo natapos nga walay pagtug-an kon nasabtan ba ni Nicodemo ang pagtulun-an sa Manluluwas.
Nasayod si Nicodemo sulod sa iyang kasingkasing nga si Jesus gikan sa Langitnong Amahan (tan-awa sa Juan 3:2), tingali siya wala makamatikod sa simbolikanhong mensahe ni Jesus gikan sa kalibotanong mga reyalidad ug sa iyang kaugalingon nga relihiyosong mga gituohan. Kini nga panglantaw tingali maoy resulta sa tibuok kinabuhi nga kontroladong mga tradisyon sa mga Judeo.
Sa atong kinabuhi, unsa ka kasagaran kita mangita og mga tubag gikan sa Langitnong Amahan samtang kinasingkasing nga naghupot sa atong mga gituohan kon sa unsang paagi molihok ang kalibotan? Pila ka higayon nga kita magtinguha sa Manluluwas nga walay pagtinguha nga mag-usab sa atong mga kinaiya o nagpamilegro sa atong pisikal nga pamarog?
Wala kaayo masabti ni Nicodemo ang mensahe sa Manluluwas nianang gabhiona, apan pinaagi sa pakigkita Kaniya, nakahimo siya og lakang padulong sa pagkasabot, ug kana butang nga maihap. “Kita mapanalanginan sa atong tinguha sa pagbuhat og maayo, gani ingon nga kita tinud-anay nga maningkamot sa pagkahimong sama niana,” miingon si Presidente Jeffrey R. Holland, Akting nga Presidente sa Korum sa Napulog Duha ka Apostoles.
Pagbarog alang sa Kamatuoran
Bisan og si Nicodemo tingale wala makasabot sa hingpit sa tanan nga pagtulun-an ni Kristo, padayon niyang gihuptan ang mga kamatuoran nga iyang nahibaloan. Isip resulta, dihang ang punoang mga pari ug mga Pariseo nagpundok ug nanghukom sa Agalon, si Nicodemo mao lamang ang usa nga milaban sa Manluluwas.
“Sumala sa atong balaod dili kita makahukom nga sad-an ang usa ka tawo, ug masuta ang tinuod niyang nabuhat?” Nangutana si Nicodemo. Namulong siya bisan nasayod siyang namilegro sa kasuko gikan sa iyang mga kaubanan. “Taga-Galilea ka ba usab?” namugalbugal sila. “Pagtuon, ug masayran mo nga wala pa gayoy propeta nga naggikan sa Galilea” (Juan 7:51–52).
Sama ni Nicodemo, tingali kita mag-atubang og oposisyon kon mobarog kita sa mga kamatuoran nga nahibaloan natong tinuod. Apan bisan pa mahinungdanon nga kita mobarog, ilabi na mahitungod sa atong mga pagpamatuod ni Jesukristo.
Usa ka Halad sa Pasko sa Pagkabanhaw
Usahay, ang lihok mas lanog kay sa mga pulong. Human sa paghingutas ni Kristo sa Pagkalansang sa krus, mitabang si Nicodemo sa paglubong. Nagdala siya og mahalon nga mira ug sabila sa pagtahod sa napukan nga Manluluwas ug giandam ang Iyang lawas alang sa paglubong (tan-awa sa Juan 19:39–40). Ang mga kasulatan wala maghisgot ni Nicodemo lapas niini nga punto, ug wala gayod kita mahibalo kon siya kinasingkasing ba nga misunod ni Kristo.
Hinoon, samtang mangandam kita niining Pasko sa Pagkabanhaw sa pagsaulog ni Jesukristo ug sa tanan nga Iyang nahimo kanato, makaduol kita Kaniya dala ang mga halad nga atong kaugalingon—andam nga mga kasingkasing ug mahinulsolon nga mga espiritu. Atong mabag-o ang atong mga tinguha sa pagsabot kon si kinsa ang Manluluwas ug mobarog uban sa tanan nga atong naghibaloan nga tinuod. Kon buhaton nato kini, ang Pasko sa Pagkabanhaw mahimo nga usa ka panahon sa paghinumdom ni Kristo isip “ganghaan ngadto sa labing dako nga mga kalipay sa kinabuhi ug sa balsamo ngadto sa labihan nga mga makapasagmuyo sa kinabuhi.”