Kahupayan Pinaagi ni Jesukristo: Ang Gahom sa Puasa

Ni Sister Kristin M. Yee

Ikaduhang Magtatambag sa Kinatibuk-ang Kapangulohan sa Relief Society

Kita makakat-on kabahin sa Ginoo, mas makapaduol Niya, ug makaangkon sa Iyang gahom pinaagi sa mainampoong pagpuasa.

Usa ka paagi nga kita isip mga babaye sa pakigsaad makatabang nga makaatiman alang niadtong mga nagkinahanglan ug makatuman sa mga pakigsaad nga atong gihimo sulod sa templo ug sa bunyag mao ang mainampoong pagpuasa “uban ang tinuod nga katuyoan” ug sa paghalad og madagayaon nga halad sa puasa aron makatabang niadtong mga nanginahanglan. Ang balaod sa puasa usa ka karaang sugo nga gihatag sa Ginoo aron mopanalangin nimo ug nako—ug sa tanan nga anak sa Dios.

Ako sa personal nga paagi makapamatuod sa gamhanang mga panalangin sa pag-ayo sa balaod sa puasa diha sa akong kaugalingong kinabuhi. Ang pagpuyo niining maluluy-on nga balaod nakahatag kanako og dako nga kahupayan ug naghatag og abag sa langitnong mga panalangin nga makasangkap sa dagko nga mga panginahanglan.

Sa pag-andam niini nga mensahe, naghunahuna ko kon ang akong mga kasinatian nga may kalabotan sa puasa angayan ba nga ipakigbahin. Dayon ang Espiritu mipakalma sa akong hunahuna ug hinay nga mihunghong sa akong kasingkasing nga tungod niining regular ug maanindot nga sakripisyo sa akong kinabuhi, ang Espiritu sa Ginoo nagbantay nako sa daghan nga higayon ug naghatag nako og pagkaayo ug kalig-on nga lapas sa akong kaugalingon [nga kalig-on]. Mura og hapit na nako madungog ang pangutana, “Sa imong hunahuna diin kaha ang kalig-on sa pagbuhat sa imposible nagagikan niining tanang katuigan?” Nianang higayona, akong naamgohan nga ang mga panalangin sa balaod sa puasa lawom na ang pagkakonektar sa tanang aspeto sa akong kinabuhi, ug ang pagpuyo niini nga balaod nakahatag nako og dugang nga sukod sa gahom sa Dios sa pagbuhat sa Iyang kabubut-on ug mahimong sama Kaniya. Ang pagpuasa diha sa pamaagi sa Ginoo makadugang sa atong pag-angkon sa mga panalangin sa gahom sa Dios diha sa atong kinabuhi.

Usa ka Pribilihiyo ug Panalangin

Sa dihang bata pa ko, ang akong pamilya naglisod sa pagsangkap sa mga panginahanglan, ug nakahinumdom ko nga nagdawat og mga grocery gikan sa tipiganan sa bishop. Kini mahimong makuha pinaagi sa madagayaon nga halad sa puasa sa ubang Santos. Ang ilang sakripisyo nakatampo aron sa pagpanalangin nako ug sa akong pamilya atol sa lisod nga panahon. Mibati ko nga bulahan nga adunay kahigayonan karon nga makapuasa ug makatampo ngadto sa uban nga nanginahanglan.

Kini usa ka pribilihiyo ug panalangin nga kita makahatag og usa ka butang, bisan unsa pa ka gamay, aron makatabang sa uban nga nanginahanglan. Ug diha sa proseso, atong makaplagan ang atong kaugalingong kahupayan diha ni Jesukristo.

Ang Manluluwas nagtudlo kanato pinaagi sa Iyang propeta mahitungod sa gamhanang mga katuyoan ug mga panalangin sa puasa:

“Dili ba mao kini ang pagpuasa nga akong napili? ang paghubad sa mga higot sa kadaotan, ang pagtangtang sa mga bugkos sa yugo, ug ang pagpagawas sa mga dinaogdaog, ug nga inyong bunggoon ang tanang mga yugo?

“Dili ba mao ang pakigbahin sa imong tinapay uban sa gigutom, ug imo nga dad-on ang kabos nga sinalikway ngadto sa imong balay? kon ikaw makakita sa hubo, nga imo siya nga tampian; ug nga ikaw dili matago gikan sa imong kaugalingon nga unod?”

Kita adunay kahigayonan nga magpuasa sa regular nga paagi, matag bulan sa Dominggo sa puasa, ug mohatag og halad sa puasa aron tabangan kadtong mga nanginahanglan. Kita mahimong “[mo]hatag og halad nga dili moubos sa bili sa duha ka kan-anan nga wala kan-a.” Kita usab “giawhag nga magmadagayaon ug mohatag og sobra pa kay sa kantidad niini nga mga kan-anan kon mahimo [nato].”

Si Elder Joseph B. Wirthlin (1917–2008) sa Korum sa Napulog Duha ka Apostoles mitudlo: “Ang mga halad sa puasa gigamit sa usa lamang ka katuyoan: aron panalanginan ang mga kinabuhi niadtong mga nanginahanglan. Matag dolyar nga nahatag ngadto sa bishop isip halad sa puasa maadto sa pagtabang sa kabos. Kon ang mga donasyon mosobra sa lokal nga panginahanglan, kini gipasa ngadto sa pagtuman sa panginahanglan sa laing dapit”

Magpaduol ngadto sa Manluluwas

Kon kita magpuasa, kita mainampoong mipaubos sa atong kaugalingon sa atubangan sa Ginoo ug mipili nga molikay sa pagkaon ug pag-inom sulod sa duha ka kan-anan o 24 oras. Kon ang kahimtang sa panglawas sa usa ka tawo dili makahimo sa naandan nga pagpuasa, si Presidente Nelson mitambag nato nga “modesisyon kon unsay maglangkob og sakripisyo alang [kanato] samtang maghinumdom [kita] sa labing dako nga sakripisyo nga gihimo sa Manluluwas alang [kanato]”

Si Kristo nga nag-ampo didto sa Getsemani

Ang pagpuasa may kalambigitan sa sakripisyo, ug ang sakripisyo nagsimbolo sa atong Ginoo ug Manluluwas, si Jesukristo, ug sa Iyang Pag-ula. Kita adunay kahigayonan nga ikonsiderar sa matinahorong paagi ang Iyang sakripisyo samtang kita mangita og pagdasig nga makahibalo unsa ang tuyo sa pagpuasa ug unsa ang angay nga likayan. Mahimo usab kitang maghunahuna sa Manluluwas sa tibuok natong pagpuasa. Ako nagkat-on nga gusto sa Ginoo nga kita magkat-on kabahin Niya ug mas magpaduol Niya pinaagi sa mainampoong kasinatian.

Pagpahiuli sa mga Agianan

Diha sa Simbahan sa Ginoo, kita giawhag nga magpuasa kon kita nagkinahanglan og balaanong tabang.

Nakahinumdom ko usa ka panahon sa ting-init nga nabalaka kaayo ko ug nasakitan tungod sa usa ka panaglalis sa usa ka sakop sa pamilya. Pipila ka sakop sa pamilya, lakip na ang usa nga nakahasol nako, midesisyon nga magpundok ug magtinambagay mahitungod niini. Hugot ko nga nag-ampo ug nagpuasa aron makahibalo unsa ang angay nakong isulti o buhaton. Nagkinahanglan ko og dugang nga kaalam ug gugma kay sa unsay naa nako.

Sa dihang nagpundok kami nianang pagka-gabii, ang Espiritu sa Ginoo maluluy-ong mipahumok sa among mga kasingkasing. Nakahinumdom ko nga gitudloan pinaagi sa mga pulong nga akong gisulti; murag dili sila akong kaugalingon. Kini puno sa gugma, kaklaro, gahom, ug sa Espiritu. Mihilak ko sa dihang bug-os nakong gibati nga ang Dios nahigugma sa akong pamilya ug gusto nga moayo namo. Nasaksihan nako ang gahom sa Ginoo, pag-ayo, ug pagpadayag nga miabot pinaagi sa hugot nga pag-ampo ug pagpuasa. Ang mga bintana sa langit dako kaayo ang pag-abli nianang gabhiona.

Kini nga kasinatian nagpahinumdom kanako sa mga panalangin sa puasa nga atong nakat-onan diha sa Isaias:

“Unya ikaw motawag, ug ang Ginoo motubag; ikaw motu-aw ug siya maga-ingon: Ania man ako. …

“Ug ang Ginoo maggiya kanimo sa kanunay, magtagbaw sa imong tinguha, … ug ikaw mahimong sama sa usa ka tanaman nga gipatubigan, sama sa usa ka tubod sa tubig, nga ang mga katubigan walay paghubas.

“Ug sila nga mahaanha kanimo mopatindog sa karaang mga dapit nga biniyaan: ikay mopatindog sa mga patukoranan sa daghan nga mga kaliwatan; ug ikaw pagatawgon, Ang mag-aayo sa nangatumpag, Ang mag-uuli sa mga alagianan aron pagapuy-an.”

Si Jesukristo mao “Ang mag-aayo sa nangatumpag, Ang mag-uuli sa mga alagianan.” Siya naghimo og agianan aron ayohon ang matag kasubo ug kasakit sa kasingkasing ug buntogon ang matag kahuyang ug sala. Siya mopahiuli, moayo, ug molig-on samtang kita modangop Kaniya sa kusog nga pag-ampo ug pagpuasa.

Adunay daghang dako nga mga panginahanglan sa kalibotan, daghan kaayo nga tingali mura og makapakurat. Tingali maghunahuna ka, unsa ang akong mabuhat aron makahimo og tinuod nga kalainan isip babaye sa pakigsaad? Usa ka butang nga atong mabuhat mao ang pagpuyo nga adunay katuyoan ug gani mohigugma sa balaod sa puasa ug mohatag og madagayaong halad sa puasa alang niadtong mga nanginahanglan.

Kon ato kining buhaton, nakahibalo ko nga ang Ginoo mopadala sa Iyang temporal ug espirituwal nga kahupayan ngadto nimo ug nako—ug ngadto sa Iyang mga anak nga nanginahanglan. Ug kita molambo sa atong kahibalo sa Iyang mga pamaagi ug sa atong gugma alang sa Dios ug sa atong silingan. Unta kita magtinguha nga makahimo og gibag-o nga pasalig nga mopuyo niining bulahan ug gamhanan nga sugo.