“Maria Magdalena: Gugma ug mga Pangutana,” Liahona, Peb 2026.
Nakaila Sila sa Manluluwas
Maria Magdalena: Gugma ug mga Pangutana
Isip unang narekord nga saksi sa nabanhaw nga Kristo, si Maria nagtakda og usa ka sundanan sa mahigugmaon nga pagkadisipulo.
Paghulagway pinaagi ni Laura Serra
Unsang mga emosyon ang gidala ni Maria Magdalena sulod sa iyang kasingkasing dihang miadto siya sa gilubngan sa Manluluwas, sayo sa buntag, sa ikatulong adlaw human sa Iyang pagkamatay? Unsay iyang nahibaloan, unsa may wala pa niya hisabti?
Labing seguro nga dili kita mahibalo. Apan adunay mga timailhan diha sa yano, malumo nga asoy sa iyang kasinatian diha sa Juan kapitulo 20. Ug kon unsay atong makat-onan gikan ni Maria—niining maunongon nga disipulo ni Kristo—ang ikapahibalo ug ikadasig sa kaugalingon natong pagkadisipulo.
“Samtang Ngitngit pa”
Usa sa unang mga butang nga himatikdan dinhi niini nga asoy mao nga si Maria miadto og “sayo” sa lubnganan “samtang ngitngit pa.” sa wala pa mosidlak ang adlaw (tan-awa sa Juan 20:1). Wala mosulti si Juan nganong didto si Maria. Ang mga asoy ni Marcos ug ni Lucas nagpasabot nga si Maria ug ang pipila sa ubang mga babaye gusto nga dihogan og pahumot ang lawas ni Jesus apan kinahanglan nga maghulat hangtod human sa Dominggo (tan-awa sa Marcos 16:1; Lucas 23:55–56; 24:1). Si Mateo yanong miingon nga miadto sila “sa pagtan-aw sa lubnganan” (Mateo 28:1).
Bisan unsa man ang rason, ingon og si Maria ug ang iyang mga kauban gusto nga moabot dayon didto dihadiha dayon. Nagtan-aw nga nag-antos ug namatay sa krus ang iyang hinigugma nga Ginoo, mga adlaw pa lang ang milabay, seguradong sakit kaayo. Ang kaugmaon tingali maingon og walay kaseguroan, ngitngit, ug makahadlok. Apan si Maria wala magpabilin sa iyang kangitngitan. Nasayod siya nga si Jesus mahimo niya nga kahayag—Siya miluwas kaniya gikan sa kangitngit kaniadto (tan-awa sa Lucas 8:2)—mao nga mahinamon niyang giadto ang bugtong kalibotanong butang nga iyang gibilin mahitungod Kaniya: Iyang lubnganan. Ug, sa mahulagwayon nga pagkasulti, wala siya maghulat sa kangitngit nga mobiya ug sa kahayag nga molamdag sa iyang dalan. Gihimo niya ang mga pagtikang gamit ang pagtuo didto sa kangitngit.
“Wala Kami Masayod”
Sa una, ang pag-adto sa lubnganan wala maghatag kang Maria ug hingpit nga panabot. Gani, unsay iyang nakita didto nagdala og dugang nga mga pangutana, dugang nga kalibog. Sa unsang paagi ang bato nakuha? Nganong wala ang lawas ni Jesus sa lubnganan? Hain Siya?
Ngari kanato, karon, ang mga tubag tin-aw ug mahimayaon. Apan alang ni Maria dili—dili pa. Sa gihimong pagsulay nga mahimong makahuloganon ang unsay iyang nakita, nakaingon si Maria nga, “Gikuha nila sa lubnganan ang Ginoo ug wala kami mahibalo kon hain nila ibutang siya” (Juan 20:2). Midagan dayon siya paingon ni Pedro ug Juan aron ireport ang pagpangawat.
Uban nianang kalibog nga diha pa sa iyang hunahuna, mibalik si Maria sa lubnganan. Didto nakita niya ang duha ka anghel nga naglingkod diin gipahimutang si Jesus—klarong ebidensya nga adunay langitnong butang nga nanghitabo. Sa gihapon padayon si Maria sa pagpahayag sa iyang sayop nga mga pangagpas nga ang lawas ni Jesus gikawat. (Tan-awa sa Juan 20:11–13.)
“Apan si Maria Nagtindog”
Sa madanihong paagi, hinoon, si Maria wala mobiya sa lubnganan. Bisan sa iyang kalibog, bisan sa tanan niyang wala matubag nga mga pangutana, nagpabilin siya—nagbakho, nagtan-aw, padayong nagpangutana (tan-awa sa Juan 20:10–11). Nagpabilin siya, dili tungod kay nasabtan niya ang tanan apan tungod kay gihigugma niya ang Ginoo. Bisan sa iyang pagkadili segurado, nagpabilin ang kamatuoran nga gipangga ni Maria ang Manluluwas. Ang gugma kadto, dili kahibalo, ang nagdala kaniya ngadto sa lubnganan, ug ang gugma nagpabilin kaniya didto.
Ug kay siya nagpabilin, didto siya sa eksakto nga dapit sa eksakto nga panahon aron makadawat sa mga tubag nga iyang gikinahanglan dihang sa kataposan miabot kini.
“Maria”
Anam-anam nga miabot ang panabot. Nakita ni Maria ang nabanhaw nga Manluluwas nagbarog sa tanaman, namulong siya Kaniya, ug Siya namulong kaniya. Apan sa una wala siya makaila Kaniya. Hangtod nga si Jesus militok sa ngalan ni Maria iyang namatikdan kon si kinsa Siya. (Tan-awa sa Juan 20:14–16.) Ngano man kaha? Unsa diay kaha ang anaa sa pagtawag sa Manluluwas kang Maria sa iyang ngalan nga, tataw, nga usa ka labaw nga gamhanang saksi kainya kay sa unsay nakita sa iyang mga mata ug unsay nadungog sa iyang mga dunggan? Nahibalo si Maria unsay hitsura ni Jesus. Nahibalo siya sa tunog sa Iyang tingog. Apan ang iyang relasyon sa Manluluwas mas halawom pa kay sa niana. Siya nakaila Kaniya. Nakatukod siya og personal nga koneksiyon ngadto Kaniya sulod sa mga katuigan—sa pagsunod Kaniya, pagpaminaw Kaniya, nga naayo pinaagi sa Iyang gahom. Kadto, ingon og, maoy hinungdan nga sa kataposan Siya iyang nailhan.
Tingali tanan kita kinahanglang mahimong sama ni Maria. Tanan kita nagkinahanglan sa kaisog sa paghimo og mga lakang samtang “ngitngit pa.” Kon makasinati kita og mga butang nga makalibog, kon ang mga pangutana mohatod hinoon og mas daghang pangutana, kon ang atong yutan-ong mga pagpangagpas maghimo kanatong padayon nga buta sa espirituwal, mahimo kitang mohupot sa atong gugma alang ni Jesukristo, sama ni Maria. Makatukod kita og usa ka relasyon ngadto Kaniya nga labihan kalig-on nga kita makasalig Kaniya labaw pa kay sa atong pagsalig sa atong pisikal nga mga balatian. Tingali niana ang atong gugma sa Manluluwas maghimo kanatong haduol Kaniya, bisan unsay mahitabo—hangtod nga ang adlaw sa kataposan mosubang ug ang atong mga mata, sama ni Maria, mabuka.