“Himoang Mas Makahuloganon ang Inyong Pasko sa Pagkabanhaw pinaagi sa Serbisyo ug Sakripisyo,” Liahona, Peb. 2026.
Himoang Mas Makahuloganon ang Inyong Pasko sa Pagkabanhaw pinaagi sa Serbisyo ug Sakripisyo
Sobra pa sa usa ka semana o tapos sa semana nga kasaulogan, ang Pasko sa Pagkabanhaw mahimong usa ka gilugwayan nga panahon sa pagpakigbahin sa kahayag ni Kristo ug sa hingpit nga kalipay sa pagtabang sa uban.
He Healed Them All [Siya Miayo Kanilang Tanan], ni Michael Malm, dili mahimong pakopyahan
Ang paghimong makahuloganon sa atong mga pagsaulog sa Pasko sa Pagkabanhaw magdala og dugang nga kalipay ug motabang nato nga mas mapaduol ngadto ni Jesukristo. “Kita giawhag nga mouswag ngadto sa usa ka mas halangdon ug mas balaan nga pagsaulog sa Pasko sa Pagkabanhaw,” miingon si Elder Gary E. Stevenson sa Korum sa Napulog Duha ka Apostoles.
Diha sa Ang Simbahan ni Jesukristo sa mga Santos sa Ulahing mga Adlaw, kita gisugo nga mohalad og “usa ka masulub-on nga kasingkasing ug mahinulsolon nga espiritu” isip usa ka sakripisyo (3 Nephi 9:20) ug maningkamot nga maghinulsol, mosunod ni Jesukristo, ug ipahiangay ang atong kinabuhi sa Iyang mga sugo. Ang pagsakripisyo ug pagserbisyo sa uban makatabang nato nga mas masaulog ang Manluluwas atol sa panahon sa Pasko sa Pagkabanhaw.
Pipila ka Paagi sa Pagserbisyo ug Paghatag
Ikonsiderar ang mosunod nga mga sugyot aron mapakaylap ang impluwensiya ni Kristo sa inyong kinabuhi ug mahimong mas makahuloganon ang panahon sa Pasko sa Pagkabanhaw, o pagmugna og inyong kaugalingong plano.
-
Paghatag og oras ug kusog aron moserbisyo diha sa inyong calling. “Kon kamo anaa sa pag-alagad sa inyong isig ka tawo kamo anaa lamang sa pag-alagad sa inyong Dios.” (Mosiah 2:17).
-
Hunonga ang pagreklamo. “Buhata ang tanan sa walay pagbagulbol o pakiglalis” (Mga Taga-Filipos 2:14).
-
Pag-amot og kwarta alang sa maayong katuyoan. “Ug kay kamo mopakigbahin sa inyong mga butang ngadto sa mga kabos, magabuhat kamo niini alang [sa Ginoo]” (Doktrina ug mga Pakigsaad 42:31).
-
Paghatag og pagkaon alang sa usa ka tawo nga nanginahanglan. “Kay gigutom ako ug inyo akong gipakaon” (Mateo 25:35).
-
Sunda ang balaod sa puasa pinaagi sa pagpuasa ug pag-ampo ug paghatag og halad sa puasa alang niadtong nanginahanglan. Mas mapaduol kamo ngadto kang Ginoong Jesukristo. “Kon kamo nagbuhat niini, ang kahingpitan sa yuta mainyo” (Doktrina ug mga Pakigsaad 59:16).
-
Pagpili og usa ka tawo nga serbisyohan. “Pinaagi sa gugma mag-inalagaray kamo sa usa sa usa” (Mga Taga-Galacia 5:13).
-
Pagmugna og playlist sa balaan nga musika ug ipakigbahin kini sa uban. “Tinguhaa hinuon ninyo nga mapuno kamo sa Espritu; ug sa inyong pagsultianay gamita ninyo ang mga salmo, mga himno ug mga balaang awit” (Mga Taga-Efeso 5:18–19).
-
Mas makanunayon nga mosimba diha sa templo. “Kay mopasanay ako ngari kanako og usa ka putli nga katawhan, aron moalagad kanako diha sa pagkamatarong” (Doktrina ug mga Pakigsaad 100:16).
-
Buhata nga makapalambo og bag-o nga Kristohanong kinaiya diha sa imong kaugalingon (gugmang putli, gugma, pagsabot, pailob, mainantoson, kamaluluy-on, impatiya). “Isangon ninyo ang akong yugo diha kaninyo, ug pagtuon kamo gikan kanako; kay ako maaghop ug mapaubsanon sa kasingkasing: ug makakaplag kamog pahulay alang sa inyong mga kalag” (Mateo 11:29).
-
Mopasaylo sa usa ka tawo. “Pasayloa sila ug kamo pasayloon usab” (Lucas 6:37).
-
Pagboluntaryo uban sa lokal nga mga food bank o mga grupo sa komunidad. Bisitaha ang JustServe.org alang sa mga oportunidad. “Buhaton ta ang maayo ngadto sa tanang mga tawo” (Mga Taga-Galacia 6:10).
-
Moabot og sayo sa simbahan aron sa pagpangandam alang sa sakramento. “Mobuhat niini uban sa bug-os nga tinguha ngadto sa akong himaya—maghinumdom sa Amahan sa akong lawas nga gitugyan alang kaninyo, ug sa akong dugo nga gipaagas alang sa kapasayloan sa inyong mga sala.” (Doktrina ug mga Pakigsaad 27:2).
-
Pagtuon kabahin sa Pagkabanhaw. Karon, adunay kamatayon nga gitawag og temporal nga kamatayon; ug ang kamatayon ni Kristo mobadbad sa mga higot niining temporal nga kamatayon, nga ang tanan pagabanhawon gikan niining temporal nga kamatayon” (Alma 11:42).
He Is Risen [Siya Nabanhaw], ni Dan Wilson, dili mahimong pakopyahan
Siya mao ang Hingpit nga Kalipay
Kon kita mosunod sa ehemplo ni Jesukristo sa pagsakripisyo ug pagpakaylap sa kahayag, kita mas mahaduol Kaniya ug mahimong mas malipayon. “Ang kalipay moabot gikan ug tungod Kaniya,” miingon si Presidente Russell M. Nelson. “Siya ang tinubdan sa tanang kalipay.”