Pagtabang, Pagpanghatag, ug Paghigugma sa Pamaagi sa Ginoo,” Liahona, Dis. 2025.
Pagtabang, Pagpanghatag, ug Paghigugma sa Pamaagi sa Ginoo
Ang mga miyembro sa tibuok kalibotan gawasnong mihatag sa ilang panahon ug mga kapanguhaan, sa pagsabwag sa ebanghelyo pinaagi sa serbisyo ug gugmang putli.
Sa wala: Mga misyonaryo sa Switzerland mitabang sa mga paningkamot sa pagpanglimpyo human sa grabe nga mga unos. Sa tuo: Usa ka tumong sa Simbahan mao ang pagpalambo sa kaayohan sa kababayen-an ug kabataan.
Sa Jordan, usa ka batang babaye gipasukdan para sa pediatric nga wheelchair, usa sa kapin sa 1,000 ka wheelchair ang nadonar sa Simbahan.
Sa Mexico, ang Simbahan nakigtambayayong sa Mexican Red Cross sa pag-update sa mga ekipo sama sa pang-X-ray ug misuporta og usa ka espesyal nga programa sa telemedicine para sa diabetes aron matabangan ang mga tawo nga walay akses sa mga serbisyong medikal.
Sa Liberia, ang mga mag-uuma nakakat-on sa pagpalambo sa ilang mga pananom ug modako ang ilang kinitaan pinaagi sa tabang sa donasyon sa Simbahan ngadto sa Programa alang sa Pagkaon sa Tibuok Kalibotan [World Food Programme].
Sa Nevada, USA, ang kabatan-onan sa Simbahan nakaasembol og 91 ka bag-ong mga higdaanan alang sa Las Vegas Rescue Mission.
Ang mga istorya nga sama niini sa Ang Simbahan ni Jesukristo sa mga Santos sa Ulahing mga Adlaw dili maihap ug nahimong ehemplo sa mga panigkamot nga gihimo sa daghang mga miyembro sa pagtuman sa ilang gipasalig nga pakigsaad sa pag-atiman niadtong mga nanginahanglan pinaagi sa pagserbisyo ug sa mga donasyon.
Kini nga mga paningkamot ihatag pinaagi sa tabang sa emerhensiya sa mga nawad-an og mga kapuy-an, paghalad og mental ug emosyonal nga suporta, o pagserbisyo sa mga komunidad ug mga panimalay. Ang maong mga kontribusyon nga gikan sa mga miyembro sa Simbahan sa tibuok kalibotan gihatagan og espesyal nga pagtagad sa Simbahan pinaagi sa Pag-amuma alang Niadtong Nanginahanglan: 2024 nga Summary, nga gimantala matag tuig pipila ka bulan human sa kataposan sa tuig.
“Kini nga summary nagpakita kon giunsa, natong tanan, pag-atiman ang mga anak sa Dios pinaagi sa mga inisyatibo sama sa pagresponde sa mga emerhensiya, pagpakaon sa gigutom, ug pag-atiman alang sa kaayohan sa kababayen-an ug kabataan,” miingon ang Unang Kapangulohan sa usa ka pasiuna nga report.
Tibuok Kalibotan nga Paningkamot
“Tungod sa makugihong mga paningkamot sa mga miyembro ug sa katambayayong nga mga organisasyon kita nakahimo sa pagsangkap sa lokal nga mga panginahanglan ug nahimo ang malungtaron nga epekto,” miingon si Blaine Maxfield, tigdumalang direktor sa Welfare and Self-Reliance Services. “Sa atong tanan nga paningkamot, naningkamot kita nga makasunod sa ehemplo sa Manluluwas pinaagi sa pag-awhag og kinaugalingong paningkamot samtang mag-angkon sa temporal nga mga panginahanglan ug moserbisyo sama sa Iyang pagahimoon.”
Ang tanan nga kontribusyon ug mga tawhanong paningkamot labihan kadaghan nga ilista, apan sa ubos mao ang pipila ka maayong mga buhat sa mga miyembro, mga higala, ug sa tabang sa Simbahan sa tibuok kalibotan.
Pag-atiman alang sa Kababayen-an ug Kabataan
Ang Kinatibuk-ang Kapangulohan sa Relief Society niadtong 2024 mipalapad sa tibuok kalibotan nga inisyatibo sa pagpalambo sa kahimsog ug kaayohan sa kababayen-an ug kabataan pinaagi sa pagtutok sa nutrisyon sa mga bata, pag-atiman sa nagmabdos ug sa bag-ong natawo, mga pagbakuna, ug literasiya.
“Ang tibuok kalibotan nga paglambo magsugod sa pag-atiman sa mga bata ug paglig-on sa kababayen-an,” miingon ang Kinatibuk-ang Presidente sa Relief Society nga si Camille N. Johnson. “Kon makapanalangin kamo og usa ka babaye, nagpanalangin kamo og usa ka pamilya, usa ka komunidad, usa ka nasod. Kon makapanalangin kamo og usa ka bata, namuhonan kamo sa umaabot.”
Sa pagpakigtambayayong sa walo ka tibuok kalibotan nga makitawhanong mga organisasyon (CARE International, Catholic Relief Services, Helen Keller Intl, iDE, MAP International, Save the Children, The Hunger Project, ug Vitamin Angels), ang Simbahan nakatabang sa pagpalambo sa kaayohan sa kapin sa 21 ka milyon nga kabayen-an ug kabataan sa tibuok kalibotan—midoble kay sa orihinal nga pagbanabana sa maong tuig. Ang Simbahan mihimo og usa ka tahas sa pagpangulo aron mapundok kini nga mga organisasyon ug madala ang ilang mga kahanas ngadto sa upat ka grupo nga magtutok alang sa kaayohan sa kababayen-an ug kabataan.
“Ang pagpakig-alayon padayon nga maoy labing importante niini nga inisyatibo, mahimo nato ang labing dako nga epekto pinaagi sa atong hiniusa nga mga paningkamot,” miingon si Presidente Johnson. “Sa pagtambayayong, atong malantaw ang lahi na usab nga tuig sa pagmugna og mas himsog nga mga kaugmaon alang sa kababayen-an ug kabataan ug sa pagpalig-on sa mga komunidad.”
Sa ubang may kalabotan nga mga paningkamot, ang Simbahan nagsuporta sa grupo sa Caritas Manila sa Pilipinas pinaagi sa paghatag og suplementong mga pagkaon, mga bitamina, ug mga aytem sa kalimpyo sa panglawas aron mabantayan ug matambalan ang kakulangan sa nutrisyon sa kabataan.
Sa pakig-alayon sa Project HOPE, ang Simbahan mitabang sa paghatag og pundo sa neonatal ug maternal nga pagbansay ug ekipo didto sa Colombia ug Venezuela. Ang Simbahan midonar usab aron itukod ang usa ka bag-ong sentro sa pagpanganak [maternity center] ug kompleto sa ekipo nga neonatal ward alang sa usa ka ospital sa Liberia human maguba ang kanhi bilding ug mga suplay tungod sa sibil nga kasungian. Giila sa mga doktor kon pila ka kinabuhi sa mga batang masuso ang ilang maluwas.
Sa Mali, ang UNICEF ug ang Simbahan nagtambayayong sa pagsangkap og mga bakuna alang sa kababayen-an, nagwagtang sa makahulga sa kinabuhi nga neonatal tetanus sa maong nasod. Ang Simbahan misuporta usab sa mga programa sa Pagkat-on sa Kinabuhi didto sa Democratic Republic of Congo, Kenya, Sudan, ug Uganda, nga nagtanyag og edukasyon ug mga serbisyo ngadto sa gibanabana nga 140,000 ka mga bata.
Sa Slovakia, ang Simbahan mitabang sa lokal nga organisasyon sa pagtudlo sa kababayen-an aron makatrabaho sa pagka-caregiver, naghimo kanila nga makasangkap sa ilang mga pamilya ug pagpalig-on sa ilang mga komunidad.
Pagtinabangay aron Makahatag og Kahupayan
Aron makahatag og dakong epekto niadtong nanginahanglan, ang Simbahan nakig-alayon sa daghang organisasyon, lakip sa World Food Programme, sa mga ahensiya sa Red Cross ug Red Crescent, Muslim Aid, Water for People, UNICEF, ug Catholic Relief Services, sa pagngalan og pipila.
“Parehas kita og tumong sa paghupay sa nag-antos nga mga anak sa Dios. Tanan kini usa ka bahin sa buhat sa Dios alang sa Iyang mga anak,” miingon si Presidente Dallin H. Oaks, Unang Magtatambag sa Unang Kapangulohan.
Ang mga miyembro sa Simbahan nakig-alayon usab ug ngadto sa ilang mga komunidad sa pagserbisyo sa mga nagkinahanglan. Mga elders quorum man nga pag-garden alang sa naangol nga miyembro sa ward, mga young single adult man nga namutos og mga pagkaon alang sa mga gigutom atol sa komperensiya, o mga batan-on nga nanghimo og mga higdaanan alang sa kasilongan sa walay nga balay, ang hiniusang mga paningkamot maghatag og kahupayan sa kadaghanan.
Pagpakaon sa Gigutom
Natawo si Julio nga kulang pa og buwan didto sa Guatemala. Gidala siya sa iyang inahan ngadto sa kalihokan sa Simbahan sa pag-screen sa nutrisyon, ug nakadawat siya og mga suplemento sa nutrisyon alang sa iyang paglambo. Si Julio, sama sa daghan pang uban napanalanginan pinaagi sa boluntaryong mga miyembro sa Simbahan nga nagtutok sa paningkamot sa nutrisyon sa mga bata, sukad niadto nakabuntog sa grabe nga pagkakulang sa nutrisyon.
Suporta sa Kapuy-an
Si Kaltoumi ug ang gagmay pa niyang mga anak milayas gikan sa ilang panimalay alang sa kaseguroan taliwala sa kasamok sa katilingban nga dala lamang ang mga sinina nga ilang naputos. Human miabot sa Minawao Refugee Camp sa Cameroon, si Kaltoumi nakadawat og tolda alang sa iyang bag-o pa nga pamilya gikan sa ShelterBox ug sa Simbahan.
Pagsuporta sa Talandogon nga mga Populasyon
Usa ka babaye nga Taga-Syria nagluto og pagkaon sa gawas sa iyang temporaryong pinuy-anan. Ang Simbahan nagsuporta og mga programa alang sa kahupayan nga makatabang nga mapahimutang ang mga tawong nawad-an og mga panimalay.
Litrato sa maayong kabubut-on sa ShelterBox
Ang kababayen-an ug kabataan sa Yemen, Syria, ug Lebanon gipugos sa pagpalayas gikan sa ilang mga panimalay niadtong 2024. Ang Simbahan nagsuporta og managlahing mga programa alang sa kahupayan sa pagdasig niining mga indibidwal ug sa lokal nga mga organisasyon.
Pananglitan, ang Simbahan midonar og 150 ka karnero ngadto sa Al Jahuth aron makamugna og usa ka gatasan sa mga kanero sa Jordan. Ang organisasyon nagtudlo sa katawhan ngadto sa mga kampo nga kapuy-an kon unsaon sa paghimo og mga produkto nga gatas ug makakwarta aron iatiman sa ilang mga kaugalingon. Ang Simbahan nakigtambayayong usab sa Rahma Worldwide sa Lebanon, sa Coptic Orthodox Church sa Egypt, ug sa uban pang mga organisasyon aron motanyag og dinaliang suporta sa pagkaon sa mga talandogon nga mga komunidad.
Pagresponde sa Emerhensiya
Dihang giigo sa pipila ka katalagman ang Pilipinas niadtong 2024, lakip sa kusog kaayo nga bagyo, pagbuto sa bulkan, mga sunog, ug sa huwaw, ang mga serbisyo sa emerhensiya sa Simbahan ug sa nasod nakahatag og kahupayan. Ang lokal nga mga miyembro sa Simbahan mipahinungod og panahon ug paningkamot sa pagpamutos, pag-organisar, ug pagpanghatod sa mga panginahanglan.
Ang mga misyonaryo mitabang sa pagdiskarga sa pang-emerhensiya nga mga suplay gikan sa usa ka eroplano human sa grabe nga pagbaha sa Rio Grande do Sul, Brazil.
Litrato sa maayong kabubut-on sa Divulgação Azul
Ang Simbahan ni Jesukristo mihatag og mahinungdanon nga tabang ngadto sa mga biktima sa baha sa Rio Grande do Sul, Brazil, diin ang grabe nga pagbaha nakapugos nga mobalhin ang 200,000 ka tawo ug miresulta sa labaw sa 90 ka kamatayon. Ang Simbahan mitukod og 21 ka lokal nga mga dangpanan, miapod-apod og mga pakete sa pagkaon, ug mihatod og unom ka toneladang mga suplay nga pang-emerhensya,. Ang mga miyembro ug mga misyonaryo miapil usab sa pagpanglimpyo nga mga paningkamot.
Human giguba sa Bagyong Beryl ang daghang dapit sa Caribbean, ang mga miyembro sa Simbahan mibiyahe ngadto sa Union Island sa paghatod sa gikinahanglan kaayong mga suplay, sama sa pagkaon ug mga kit nga panglimpyo sa lawas, ug mitabang sila sa paghawan sa mga nakaali sa mga karsada.
Kaseguradoan sa Pagkaon
Sa Nicaragua, ang Simbahan mitampo ngadto sa paningkamot sa World Food Programme nga mihatag sa mga bata og pagkaon diha sa eskwelahan. Ang proyekto naglakip usab og mga imprastraktura ug pagpalambo sa kusina sa mga eskwelahan sa tibuok nasod.
Suporta sa Edukasyon
Sa Argentina, ang Simbahan misuporta sa Caritas’s Plan Emaus sa paghatag og mga scholarship alang sa mga estudyante. Kini nga mga scholarship makaabag sa daghang mga estudyante nga nanginahangaln sa tibuok nasod, nagdugang sa ilang mga oportunidad sa pagpanarbaho sa umaabot ug nagtabang nila nga makabarog pinaagi sa kinaugalingong paningkamot.
Ang Simbahan mitabang sa paghatod sa 1,000 nga mga computer ngadto sa mga estudyante sa Mongolia.
Sa Mongolia, ang Simbahan nakigtambayayong sa Ministry of Education sa paghatod sa 1,000 ka computer ngadto sa mga eskwelahan sa sekondarya. Makapanalangin kini sa gibanabana nga 43,000 ka estudyante nga adunay mga oportunidad sa pagpalambo sa edukasyon.
Daghang miyembro ang migamit sa mga kurso sa pagbarog piaagi sa kinaugalingong paningkamot [self-reliance] nga gipahigayon sa mga bolunter sa ilang mga ward ug mga dapit sa pagpalambo sa ilang kinabuhi. Daghan usab ang nakadawat og mga loan ug mga scholarship aron itabang sa pagbayad sa pag-eskwela pinaagi sa Perpetual Education Fund sa Simbahan.
Paghigugma sa Atong Silingan
Ang atong Manluluwas, si Jesukristo, nagtudlo kanato sa pagsunod sa duha ka dagko nga sugo: sa paghigugma sa Dios ug sa paghigugma sa atong mga silingan (tan-awa sa Mateo 22:37–39). Sama sa giingon ni Presidente Russell M. Nelson, “Kon higugmaon nato ang Dios sa tibuok natong kasingkasing, Siya mopabalik sa atong mga kasingkasing ngadto sa kaayohan sa uban diha sa matahom, mahiyason nga paagi.”
Karon, ang Simbahan ug ang mga katawhan niini naningkamot sa pagsunod sa mga lakang sa Ginoo pinaagi sa pag-atiman sa mga tawo nga nagkinahanglan pinaagi sa welfare ug sa mga inisyatibo sa pagbarog pinaagi sa kinaugalingong paningkamot, sa tibuok kalibotan nga makitawhanong mga paningkamot, ug mga bulontaryo nga serbisyo. Sama sa giingon ni Presidente Oaks, “Ang Simbahan ni Jesukristo mapasaligon alang sa pagserbisyo niadtong nanginahanglan, ug kini mapasaligon usab nga mokooperar sa uban niana nga paningkamot.”