Ako Wala Nay Laing Gikinahanglan

Paghulagway pinaagi ni Caitlin Droubay

Sa Disyembre sa dihang ang akong inahan nuybe anyos pa, ang iyang ama-ama mibiya sa pamilya aron mangita og trabaho. Siya mibiya sa akong lola, akong inahan, ug manghod nga lalaki sa akong mama nga walay kwarta, walay pagkaon, walay Christmas tree, walay mga regalo. Sa mga pulong ni Mama, “Kami walay bisan unsang butang.”

Ang akong inahan migawas aron maglakaw-lakaw nianang gabii sa Pasko. Nahinumdom siya nga mitan-aw sa bintana sa balay sa silingan ug nakakita sa malipayon, nagpahiyom nga mga bata nga nag-alirong sa Christmas tree, adunay mga regalo ug mga sakop sa pamilya sa palibot. Mihilak si Mama samtang mipakigbahin niana nga panumdoman sa wala pa ang Pasko pipila ka tuig sa wala pa siya mamatay. Kadto mao ang usa sa daghang Pasko nga siya walay bisan unsa nga butang.

Padayon ngadto sa 1969, 14 ka tuig human sa kaminyoon sa akong ginikanan. Nagpuyo kami sa usa ka gamayng lungsod sa central California, USA. Kana ang higayon nga ang full-time nga mga misyonaryo nanuktok sa among pultahan ug nagdala kanamo sa gipahiuli nga ebanghelyo ni Jesukristo. Paglabay sa usa ka tuig, ang akong mga ginikanan naselyo sa usag usa sa Oakland California Temple, ug ang akong duha ka igsoong lalaki ug ako naselyo ngadto nila.

Alang sa akong mga ginikanan, ang mga katuigan sa pagkadisipulo misunod, lakip na sa pagserbisyo sa daghang calling sa Simbahan, dili maihap nga pagpangalagad ngadto sa uban, pagpalig-on sa ilang mga pagpamatuod sa pagmisyon sa Florida, pagmaya sa ilang nagkadaghan nga kaliwatan, ug pagtagamtam sa mga panalangin nga nagagikan sa “kalipay diha ni Jesukristo” ug sa pagkamiyembro diha sa “simbahan sa hingpit nga kalipay.”

Wala madugay human nga ang akong amahan namatay niadtong 2018, ang akong inahan misulat og usa ka sulat sa Pasko ngadto sa iyang mga anak, naglista sa mga panalangin nga nakapahimo sa iyang kinabuhi nga puno ug adunahan.

“Kon ako adunay hilom nga mga gutlo, ang mga hunahuna ug mga panumdoman moabot nako—unsa ang gihatag kanako,” siya misulat. Usa sa mga gasa nga iyang nadawat, iyang ginganlan “usa ka mahangtoron nga bana” ug usa ka pamilya nga mahimong magkauban sa kahangtoran diha sa presensya sa Amahan ug sa Anak; ang gipahiuli nga ebanghelyo; buhi nga mga propeta ug mga apostoles; mga kasulatan sa ulahing mga adlaw; ang gasa sa Espiritu Santo; usa ka pagpamatuod bahin sa Manluluwas nga si Jesukristo; ug “kining espesyal nga panahon sa pagsaulog sa Iyang pagkatawo.”

Sa bata pa ang akong inahan, siya walay bisan unsa nga butang. Sa panahon nga siya namatay, siya aduna sa tanang mahinungdanong mga butang.

“Kamo ug ang ebanghelyo mao ang akong kinabuhi,” siya mitapos. “Ako wala nay laing gikinahanglan. Malipayong Pasko. Ako nahigugma kaninyo sa kahangtoran.”