Propesiya ug Pagpailob: 100 ka Tuig sa Simbahan sa Habagatang Amerika

Apil sa mga mitambong kauban sa Propeta nianang adlawa sa 1834 mao ang Apostol nga si Parley P. Pratt. Sa ulahing bahin sa 1851, siya mihimo sa usa ka ambisyosong misyon kauban sa iyang mabdos nga asawa, si Phoebe, ug misyonaryo nga kompanyon, si Rufus C. Allen. Naikag sa tinguha nga makakita sa saad ni Propeta Joseph nga matinuod, ang grupo miabot sa Valparaíso, Chile, aron sugdan ang pagsangyaw sa gipahiuli nga ebanghelyo ni Jesukristo sa Habagatang Amerika.

Ang komplikado nga ekonomikanhon ug politikal nga sitwasyon nianang higayona, inubanan sa wala mahubad nga Basahon ni Mormon sa Kinatsila, nakapahimo sa misyonaryo nga buhat nga lisod. Dugang pa gyod, ang bag-ong natawo nga anak nga lalaki sa mga Pratt, si Omner, nga natawo sa Chile, namatay wala madugay human sa ilang pag-abot. Human sa pipila lang ka bulan, si Parley mihukom nga kana nga higayon dili pa sakto aron ang Simbahan maestablisar sa Habagatang Amerika. Apan nagpabilin siyang kumbinsido nga sa umaabot ang mga pulong sa Ginoo tanan matuman.

Samtang si Parley wala na gayod makabalik sa Habagatang Amerika, ang iyang apo nga lalaki nga si Rey L. Pratt dako kaayo og tahas sa pag-establisar sa Simbahan didto. Siya ug si Rulon S. Wells mikuyog ni Elder Melvin J. Ballard sa Korum sa Napulog Duha ka Apostoles ngadto sa Argentina niadtong 1925 aron mag-abli og misyon. Pipila ka tuig sayo pa niana, ang mga miyembro gikan sa Germany nga mipuyo sa malamboon nga siyudad sa Buenos Aires ug nagsugod sa pagtudlo sa ilang mga higala ug mga silingan.

Sulod sa usa ka semana sa pag-abot ni Elder Ballard ug sa iyang mga kauban sa siyudad, ilang gibunyagan ang mga unang kinabig sa kontinente. Dayon, sayo sa buntag sa Pasko, sila nagpundok sa ilawom sa willow nga kakahoyan sa usa ka parke. Ubos sa direksyon ni Heber J. Grant, ang Presidente sa Simbahan, ug pinaagi sa apostolikanhong awtoridad nga iyang gihuptan, si Elder Ballard mihalad og pag-ampo aron ipahinungod ang Habagatang Amerika alang sa pagsangyaw sa ebanghelyo.

“Ako motuyok sa yawe, mobukas, ug moabli sa pultahan alang sa pagsangyaw sa ebanghelyo ngadto niining tanan nga nasod sa Habagatang Amerika,” siya nag-ampo, “ug badlongon, ug mandoan nga mohunong, ang matag gahom nga mosupak sa pagsangyaw sa ebanghelyo niini nga mga yuta.”

Ang pagpangita og dugang nga mga tawo nga interesado sa ilang mensahe, hinuon, lisod kaayo. Ang mga misyonaryo naggahin og dili maihap nga mga oras sa pagkontak sa mga tawo diha sa kadalanan ug pagpang-apod-apod og liboan ka materyal sa pagtudlo, naglaom nga makakuha og atensiyon ngadto sa ilang mga panagtigom.

Adunay limitado lamang nga kalamposan, si Elder Ballard militok og talagsaong propesiya mahitungod sa kaugmaon sa Simbahan sa Habagatang Amerika sa wala pa siya mopauli. Sa gamay nga pundok sa mga Santos siya mipamatuod nga “ang buhat mohinay sa makadiyot, sama sa tugas nga hinay nga nagtubo gikan sa liso sa bunga niini.” Kini dili motuybo sa usa ka adlaw ingon sa sunflower nga “daling motubo ug busa daling mamatay,” ang ebanghelyo hinay-hinay nga mokatap. “Liboan ang mopasakop dinhi,” siya nanagna. “Ang buluhaton dinhi mao ang labing gamay nga sukad mahitabo.” Si Elder Ballard midugang pa sa pagpanagna nga ang misyon “mabahin ngadto sa labaw sa usa ka misyon ug mahimong usa sa labing malig-on diha sa Simbahan.”

Nianang panahona, ang deklarasyon ni Elder Ballard mahitungod sa padulngan sa Simbahan sa Habagatang Amerika mura og hapit dili katuohan sama sa panagna nga gisulti ni Joseph Smith mga dekada ang milabay. Bisan pa man, sama sa gipanagna ni Elder Ballard 100 ka tuig ang milabay, ang Simbahan sa paglabay sa mga dekada milambo latas sa kontinente sa panahon sa Ginoo.

Gikan sa Argentina, ang mga misyonaryo sa kataposan milabang ngadto sa kasilinganan nga mga nasod sa Brazil, Chile, ug Uruguay. Gikan didto ang buluhaton milambo ngadto sa ubang nasod. Sa mga lokasyon sama sa Guyana, Paraguay, ug Venezuela, ang mga Santos sa Ulahing mga Adlaw gikan sa langyaw nga mga yuta nahimong instrumento sa pagpaila sa pagtuo. Apan sa uban pa nga mga dapit, ang mensahe sa gipahiuli nga ebanghelyo miabot mga tuig pa sa wala pa ang mga miyembro o mga misyonaryo.

Kana mao ang nahitabo sa pamilyang Fandiño, kinsa nagpuyo sa baybayon sa Caribbean sa Ciénaga, Colombia. Usa ka adlaw samtang nagbisita sa lokal nga merkado, si Margarita Fandiño nakakita ug mipalit og ginamit na nga kopya sa Basahon ni Mormon. Midawat niini isip kasulatan, ang pamilya mibasa ug gilinyahan ang makahuloganon nga mga bersikulo hangtod nga ang anak nga babaye ni Margarita nga si Kelly mipakigbahin sa basahon sa iyang lokal nga grupo sa kabatan-onan sa pagtuon sa Biblia. Sa iyang kahingangha, gikuha sa pastor ang Basahon ni Mormon ug gisunog kini. Mga tuig lamang human niana nga ang mga misyonaryo miabot sa siyudad sa Ciénaga ug nagtudlo ni Margarita ug sa iyang pamilya mahitungod sa ilang pinalangga nga basahon ug sa Pagpahiuli.

Sa pikas nga tumoy sa kontinente, sa labing habagatang bahin sa siyudad sa Ushuaia, Argentina, ang saad sa mahangtorong pamilya nakakuha sa atensiyon ni Amanda Robledo ug sa iyang bana, si Ricardo. Human sa kamatayon sa iyang inahan, si Amanda mibisita og nagkalain-laing denominasyon, naglaom nga ang mga pagtulun-an ni Jesukristo moayo sa iyang kasingkasing. Sa dihang nakaplagan sa mga misyonaryo sa wala madugay ang magtiayon ug gitudloan sila nga ang pamilya mahimong maselyo, gibati ni Ricardo ang Balaang Espiritu ug nagtinguha nga mabunyagan. Si Amanda natandog usab apan nagpabilin nga dili segurado tungod sa mga tabi-tabi nga iyang nadunggan. Sa kataposan, ang iyang gugma alang sa iyang pamilya ug tinguha nga makauban sila sa kahangtoran ang nakakumbinser niya nga mopasakop sa Simbahan ug mabugkos nila pinaagi sa mga ordinansa sa templo.

Bisan kon ang gipahiuli nga ebanghelyo mikatap latas sa kontinente, ang mga panalangin diha sa balay sa Ginoo nagpabilin nga dili makab-ot alang sa kadaghanan nga mga miyembro sa Habagatang Amerika. Hangtod sa pagkakompleto sa São Paulo Brazil Temple niadtong 1978, kadto lamang nga makabiyahe sa Estados Unidos o Uropa ang adunay kahigayonan nga maghimo og mahangtorong mga pakigsaad ug moapil sa buluhaton sa ordinansa alang sa uban. Ang mga Santos sa Habagatang Amerika nakatampo sa pagtukod sa templo pinaagi sa pagtrabaho diha sa dapit, pagbaligya og mga kabtangan, ug pagdonar sa mga tinigom.

Wala madugay human sa pagpahinungod sa templo, sila si Efraín ug Maria Ondina Rodríguez gikan sa Arequipa, Peru, mihimo a biyahe ngadto sa São Paulo. Ang mga komplikasyon sa mga pagtabok sa internasyonal nga utlanan ug ang pag-ulbo sa usa ka rebolusyon nakahimo sa ilang biyahe ngadto sa hapit usa ka bulan nga panaw. Bisan pa man og nakasugat og daghang kalisod, pinaagi sa pagtuo ug determinasyon sila nahiusa isip mahangtorong managkauban. Alang sa uban, ang pagtambong sa templo nagkinahanglan nga motabok sa kusog og bul-og nga mga sapa ug molatas sa kabukiran sa Andes aron maselyo sa kahangtoran isip mga pamilya.

Ang pagbiyahe ngadto sa balay sa Ginoo nagkinahanglan usab og dako nga mga sakripisyo alang sa mga Santos sa Ulahing mga Adlaw sa Brazil. Ang Manaus, nga anaa sa daplin sa Suba sa Amazon, usa ka semana nga biyahe gikan sa São Paulo. Ang pag-abot sa templo nagkinahanglan og mahal ug taas kaayo nga biyahe latas sa kalasangan pinaagi sa sakayan sulod sa tulo o upat ka adlaw ug dayon dugang nga tulo pa ka adlaw pinaagi sa bus. Atol sa biyahe, ang mga Santos gikan sa Manaus nakasinati og mga kakulang sa pagkaon ug tubig, mga pagkaguba sa sakyanan, ug gani mga pagpanulis, mga babag nga nabuntog lamang pinaagi sa mga milagro ug abag gikan sa isig ka mga miyembro. Alang niadtong nagmalamposon sa pagbiyahe, ang espirituhanong kalinaw nga ilang nadawat mas labaw pa kay sa mga kalisod nga ilang naagian.

Samtang ang sagradong mga pakigsaad sa templo nagkaanam nga maanaa, kini nga mga kasinatian ug uban pa nahimong makahuloganon nga kabilin sa pagtuo alang sa tanang Santos sa Habagatang Amerika.

Ang mga panagna mahitungod sa Simbahan sa Habagatang Amerika natuman nga klaro kaayo sa among panan-aw. Ang gingharian sa tinuod gayod mikatap latas sa kontinente sama sa nakita na daan ni Propeta Joseph Smith. Sobra sa upat ka milyon nga mga miyembro ang nagpuyo sa Habagatang Amerika, ug ang mga kongregasyon makita sa matag nasod didto. Karon adunay sobra sa 30 ka naglihok nga templo, nga adunay daghan pa nga gipahibalo o gitukod pa.

Ang liso nga gitanom ni Elder Melvin J. Ballard usa ka siglo na ang milabay namunga na gayod. Ang South America Mission nga iyang gitag-an nga mabahin sa umaabot nahimong sobra sa 100 ka managlahi nga mga misyon. Sama sa kahoy nga tugas nga adunay lawom nga mga ugat, ang Simbahan sa Habagatang Amerika karon adunay lig-on nga punoan nga mopahimo niini nga mas ipakatap pa sa mga sanga niini. Ang paglingi sa miaging 100 ka tuig sa Habagatang Amerika nagpakita kon giunsa sa Langitnong Amahan pagpadayon sa pagtuman sa Iyang mga saad nga gihimo pinaagi sa Iyang mga propeta.