Pagtugot sa Kahayag ni Kristo nga Modan-ag Pinaagi Kanato—Mga Pagpamalandong bahin sa Akong Amahan

Paghulagway pinaagi ni David Green

Tingali adunay usa ka tawo nga mitaliwan na ngadto sa laing kalibotan—usa ka tawo nga gahinan nimo og gamayng sobra nga oras nga hunahunaon sa Disyembre ug panahon sa Pasko.

Alang nako, kana ang akong papa. Disyembre ang iyang adlawng natawhan. Namatay siya human gayod sa Pasko dul-an sa 18 ka tuig na ang milabay.

Ang akong papa adunay trabaho nga magkinahanglan nga mobiyahe kanunay.

Mobiyahe siya nga mag-eroplano niadtong mga panahon nga wala pay mga headphone o mga earbud. Walay screen sa likod sa lingkoranan nga anaa sa iyang atubangan. Walay online nga kalingawan. Walay mobile phone, tablet, o laptop nga kompyuter.

Niadtong panahona, sa pagpalabay sa oras samtang magbiyahe ka, ikaw adunay tulo ka kapilian: matulog; magbasa og libro, magasin, o newspaper; o makig-istorya sa tawo nga naglingkod tupad nimo.

Ang akong papa kanunay nga mopili sa ikatulo.

Mopauli siya sa balay gikan sa matag biyahe nga magdala og istorya mahitungod sa iyang katupad. Ang istorya sa kinabuhi sa tawo nga iyang nakahinabi!

Wala ko kahibalo kon kapila kini gibuhat ni papa. Apan siya adunay talagsaong abilidad, usa ka gasa sa tigpaminaw. Ang mga tawo komportable niya. Komportable kaayo nga mopakigbahin sa ilang personal nga mga istorya—mga kasakit ug mga kalamposan ug ang tanan tali niini.

Ug tungod kay ang akong papa positibo og panglantaw, usa ka tinuod nga disipulo ni Jesukristo, nasayod ko nga ang mga tawo mibiya sa ilang mga biyahe nga nailhan, gipaminaw, gihigugma, malipayon, ug mas nahimong positibo og panglantaw kaysa wala pa sila mobiyahe.

Ang akong amahan mituo sa usa ka butang nga gisulat ni Elder Neal A. Maxwell (1926–2004) sa Korum sa Napulog Duha ka Apostoles: “Ang sama nga Dios nga mipahimutang nianang bituon sa tukma nga kahimtang sa liboang katuigan sa wala pa kini makita sa Betlehem sa pagsaulog sa pagkatawo sa Bata ang naghatag og samang atensyon sa paghan-ay kanatong tanan sa tukma nga tawhanong kahimtang aron kita, kon atong itugot, mopahayag sa atong tagsa-tagsa nga kinabuhi, aron ang atong kahayag dili lang mogiya sa uban apan mopainit usab kanila.”

Sa laing higayon, si Elder Maxwell mipahayag og ideya niini nga paagi: “Ang pagplano ug katukma sa [Dios] may kalabotan dili lamang ngadto sa kahimtang sa kawanangan apan usab sa tawhanong kahimtang. … Sama sa bituon sa Pasko, matag usa nato, kon magmatinud-anon, adunay gi-orden nga kahimtang.”

Mohatag ba kamo og pagtagad ngadto sa mga tawo nga anaa sa inyong tawhanong kahimtang?

Kinsa gipahimutang mismo sa Dios sa uniberso diha sa inyong dalan?

Isip usa ka disipulo ni Jesukristo, sa unsang paagi nga kamo mas tinuoray nga makalamdag ug makahayag sa ilang dalan?

Ang tinubdan sa tanang kahayag—ang atong Manluluwas, si Jesukristo—naghangyo nato sa pagtugot sa kahayag nga atong nakuha gikan Kaniya nga modan-ag pinaagi nato (tan-awa sa Mateo 5:14–16; 3 Nephi 12:14–16). Usa ka paagi nga kita makahimo niana mao ang paghatag og pagtagad ngadto sa mga tawo sa atong palibot. Pag-ila nila. Pagpaminaw nila. Paghigugma nila. Ang atong kahayag labing mosanag kon kita mohigugma sama sa paghigugma ni Jesus.

Niini nga panahon nga kita nagsaulog sa pagkatawo Niya kinsa mao ang tinubdan sa tanang kahayag, ako mopakigbahin sa akong kombiksiyon nga Siya nakaila nato sa tagsa-tagsa, ug Siya nahigugma sa matag usa nato. Siya dili lamang modan-ag sa dalan apan usab, pinaagi sa Iyang walay kinutoban ug sa personal nga paagi nga Pag-ula, naghatag og dalan pauli.