Pagserbisyo pinaagi sa Ngalan ni Jesukristo

Paghulagway pinaagi ni Caitlin Droubay

Ang akong lola mao ang labing maayo nga tighatag. Ang iyang mga regalo mahunahunaon ug personal, ang matag usa giputos sa usa ka matahom nga papel ug gihigtan og nindot kaayo nga laso. Ang iyang regalo sa Pasko mao ang usa ka butang nga imong kahinaman nga madawat.

Sa ulahing bahin sa 2016, si Lola nahiling nga adunay kanser. Kini nga babaye nga nagpakigbahin og hilabihan nga kalipay sa Pasko anaa sa ospital sa iyang paborito nga holiday sa tuig. Samtang naghunahuna niya, naghunahuna ko kon sa unsang paagi nga ako makatabang sa paghimo sa panahon sa Pasko nga malipayon. Nakaila na ni Lola, tingali dugay na siyang naghimo sa iyang mga plano alang sa mga regalo ug masagmuyo gayod og maayo kon dili kini mabuhat.

Si Lolo miingon nga mao gayod kana ang mahitabo. Sa pagtanyag og tabang, gihatagan ko og buluhaton sa pag-andam sa mga regalo alang sa matag usa sa 13 ka apo, ilang mga asawa ug mga bana, ug sobra sa 27 ka apo sa tuhod. Naningkamot ko sa pagputos sama sa gihimo ni Lola. Mainampingon nakong gipili ang mga sudlanan sa regalo, tisyu, ug mga sobre.

Pinaagi sa pag-scan sa usa ka kard sa miaging tuig, gilakip nako ang iyang tinuig nga mensahe: “Mahangtorong naghigugma, Lola ug Lolo.”

Gusto nako nga mahimong hingpit ang tanan—sa pagbuhat sa mga butang sama sa iyang buhaton. Sa dihang mga tunga-tunga na ko sa pagbutang sa mga regalo sa mga sudlanan, sa pag-adorno og gilaw-gilaw [glitter], ug pagtaod sa mga kard, ang Espiritu mihunghong kanako, “Kini kabahin sa unsay gipasabot sa pagdala sa ngalan sa usa ka tawo nganha kanimo. Kini ang unsay ipasabot sa paglihok pinaagi sa ngalan sa usa ka tawo.”

Nianang halawom nga personal nga gutlo, mas natudloan ko sa unsay ipasabot sa pagdala sa ngalan ni Jesukristo ngari nako.

Matag semana samtang kita moambit sa sakramento, kita mosaksi nga kita andam sa pagdala sa atong kaugalingon sa ngalan ni Jesukristo ug sa kanunay mohinumdom Kaniya (tan-awa sa Moroni 4:3; Doktrina ug mga Pakigsaad 20:77). Mas gipersonal nako kana nga pagdapit karon. Mas nakasabot ko kon sa unsang paagi nga ang pagdala sa ngalan ni Kristo ngari kanako naglakip sa pagpakabuhi sama sa Iyang pagpakabuhi.

Nasayod ko kon sa unsang paagi nga si Lola mohatag tungod kay ako nahimong tigdawat sa iyang gugma ug kamanggihunahunaon sa daghang higayon. Nasayod ko kon sa unsang paagi nga ang Langitnong Amahan ug si Jesus mohigugma ug mohatag tungod kay ako nakasaksi sa Ilang tabang sa akong kinabuhi. Usa ako ka tigdawatan sa grasya ni Kristo. Gusto nakong buhaton ang unsay Iyang buhaton. Gusto ko nga ang kinabuhi nga akong gipuy-an, ang serbisyo nga akong ihatag, ug ang gugma nga akong ipakigbahin mahisama sa Iyang kinabuhi, serbisyo ug gugma—aron mabati nga ingon og kini nagagikan Kaniya.