“Ang Plano sa Dios alang sa usa ka Mahangtoron nga Pamilya,” Liahona, Dis. 2025.
Ang Plano sa Dios alang sa usa ka Mahangtoron nga Pamilya
Ang mga pamilya nga mohangop sa plano sa Dios, mohigugma sama sa paghigugma sa Manluluwas, ug motuman sa ilang mga pakigsaad makapanunod sa umaabot “sa mga panalangin sa kinabuhing dayon ug sa kahingpitan sa kalipay.”
Sa hapit na mahuman ang akong full-time nga misyon, nalipay ko sa dihang natugahan ko ug naselyo ngadto sa akong mga ginikanan sa São Paulo Brazil Temple.
Ang akong mga ginikanan, si Aparecido ug si Mercedes, nagagikan sa lainlaing mga relihiyon, apan ang mga kasinatian sa ilang kinabuhi miandam nila sa pagdawat sa gipahiuli nga ebanghelyo.
Ang akong amahan nagdako sa usa ka maayo nga pamilya apan dili relihiyoso. Bisan pa man, sa batan-on pa interesado siya sa relihiyon. Nagbasa siya sa Biblia, nagtambong og mga klase sa pagtuon sa Biblia, ug nagtuon sa kinabuhi ni Jesukristo. Ang iyang mga pagtuon maoy hinungdan nga dako ang iyang tinguha sa ebanghelyo sa Manluluwas ug sa pamilya, nagbilin niya og tinguha nga magminyo sa usa ka tawo nga sama niya og hunahuna.
Sa pagtandi, ang akong inahan nagagikan sa relihiyoso kaayo nga pamilya. Sila mihangop sa mga baroganan sa ebanghelyo, mitambong sa mga tulumanon sa simbahan, ug matinud-anong nagtuman sa ilang relihiyon. Nagdako niana nga kahimtang, ang akong inahan nahimong usa ka matang sa tawo nga dili mopalta og simba.
Ug mao nga, human sa kaminyoon sa akong mga ginikanan ug miabot ang akong tulo ka igsoong lalaki ug ako, gibuhat nila kutob sa ilang mahimo aron magdako kami diha sa kahayag sa ilang kahibalo sa mga baroganan sa ebanghelyo. Usa ka adlaw ang akong iyaan, kinsa dili aktibo sa Ang Simbahan ni Jesukristo sa mga Santos sa Ulahing mga Adlaw, miingon sa akong amahan, “Ikaw adunay upat ka lalaki, langga. Kon gusto gyod ka nga moamuma og usa ka pamilya nga nakasentro diha ni Kristo ug adunay Dios sa inyong pamilya, kinahanglan ka nga moadto sa akong simbahan.”
Nadungog sa akong amahan unsay iyang gisulti, apan wala molihok hangtod sa adlaw nga ang full-time nga mga misyonaryo nga miabot sa among kasilinganan, nanuktok sa pultahan, ug misugod sa pagtudlo namo. Naamgohan dayon niya nga gikan sila sa simbahan nga giawhag sa akong iyaan niya nga mag-imbestiga.
Kahayag ug Kamatuoran
Usa sa mga butang nga unang nakapainteres sa akong mga ginikanan sa gipahiuli nga ebanghelyo ni Jesukristo mao ang importansya nga gihatag sa Simbahan nganha sa pamilya ug sa pagtulun-an nga “kadaghanan sa buhat sa Dios sa kaluwasan ug kahimayaan matuman pinaagi sa pamilya.” Sa wala pa ang ilang bunyag, ang akong mga ginikanan nakadayeg og maayo sa unsay ilang nakat-onan nga ilang gidapit ang mga silingan nga moapil nila alang sa mga leksiyon sa mga misyonaryo.
Usa sa mga butang nga unang nakapainteres sa akong mga ginikanan sa gipahiuli nga ebanghelyo ni Jesukristo mao ang importansya nga gihatag sa Simbahan nganha sa pamilya.
Samtang nakigkita sila sa mga misyonaryo, ug nagpadayon sa pagtuon sa ebanghelyo human sa ilang bunyag, ang akong mga ginikanan nakakat-on sa mga paagi “sa pag-amuma sa [ilang] mga anak sa kahayag ug kamatuoran.” ug kon unsaon sa espirituwal nga paaagi sa “pagpahimutang sa kahusay sa [ilang] kaugalingong balay,” (Doktrina ug mga Pakigsaad 93:40, 43).
Ilang nakat-onan nga “ang pamilya mahinungdanon sa plano sa Tiglalang alang sa walay kataposan nga destinasyon sa Iyang mga anak” ug nga “ang kalipay dinhi sa kinabuhi sa pamilya labaw nga makab-ot kon gipasikad sa mga pagtulun-an ni Ginoong Jesukristo.”
Ilang nakat-onan nga “ang malamposon nga mga kaminyoon ug mga pamilya natukod ug napadayon diha sa mga baroganan sa hugot nga pagtuo, pag-ampo, paghinulsol, pagpasaylo, pagtahod, gugma, kaluoy, buhat ug maayong makalingaw nga mga kalihokan.”
Ilang nakat-onan nga ang mga pamilya mahimong mahangtoron ug nga ang “sama nga pakigrelasyon ngadto sa uban nga atong gitagamtam dinhi magpadayon kanato didto, gawas nga kini ubanan sa mahangtorong himaya” (Doktrina ug mga Pakigsaad 130:2).
Ug ilang nakat-onan nga “ang tumong ug tuyo sa matag pagtulun-an, matag kalihokan sa Simbahan mao nga ang mga ginikanan ug ang ilang mga anak magmalipayon sa panimalay, maselyo sa mahangtorong kaminyoon, ug masumpay ngadto sa ilang mga kaliwatan.”
Tungod niana nga kahibalo, sila nagtinguha nga maselyo isip usa ka mahangtorong pamilya.
Usa ka Panglantaw Paingon sa Kahangtoran
Human mabunyagan ang akong mga ginikanan, ilang gibuhat ang unsay ilang nakat-onan, nagsugod sa pagtutok sa espirituhanong mga butang. Naningkamot sila aron mahiusa ang among pamilya pinaagi sa paghimo og home evening ug pamilya nga pagtuon sa kasulatan, matinud-anong pagtambong sa mga miting sa Simbahan, ug sa paghimo sa buhat sa family history. Pinaagi niana nga mga paningkamot ngadto sa panaghiusa, naglaom sila nga makaugmad og usa ka pamilya nga nakasentro sa plano sa kaluwasan uban sa usa ka panglantaw paingon sa kahangtoran.
Niadtong 1965, ang tuig nga nabunyagan ang akong mga ginikanan, ang labing duol nga templo sa São Paulo, Brazil, mao ang Mesa, Arizona, hapit 6,000 ka milya (9,650 km) ang gilay-on. Ang pagbiyahe mahal kaayo alang sa among pamilya, mao nga ang akong mga ginikanan kinahanglan nga maghulat hangtod sa mapahinungod ang São Paulo Brazil Temple niadtong 1978 una nila madawat ang ilang mga ordinansa sa templo ug maselyo. Nianang higayona, nagserbisyo ko sa misyon sa Rio de Janeiro.
Mga duha ka bulan sa wala pa ko mahuman sa akong misyon niadtong Pebrero 1980, ang akong presidente sa misyon mitugot sa akong kompanyon ug nako nga mobiyahe sa tibuok gabii uban sa mga miyembro sa stake gikan sa Rio de Janeiro paingon sa templo sa São Paulo aron matugahan ko ug maselyo ngadto sa akong mga ginikanan. Sama sa akong mga ginikanan, naghulat ko og pipila ka tuig alang sa gisaad nga mga panalangin sa mga ordinansa ug mga pakigsaad sa templo.
Kana nga kasinatian nakapausab sa akong panglantaw sa umaabot ug nakahatag nako sa akong unang panglantaw sa katinuod sa bag-ohay lang nga mga pulong ni Presidente Russell M. Nelson: “Ang panahon sulod sa templo motabang ninyo nga maghunahuna og celestial ug sa pagsabot kinsa gayod kamo, unsa ang inyong maabot, ug sa matang sa kinabuhi nga inyong maangkon sa kahangtoran.”
Ang akong mubo nga panahon didto sa templo nianang higayona lawom nga nakaimpluwensya sa nahibilin sa akong misyonaryo nga pagserbisyo. Pinaagi nianang bag-o nga panan-awon, ang pagpamatuod bahin sa templo ug sa kaimportante sa plano sa Dios alang sa mga pamilya adunay malungtaron usab nga epekto sa akong kinabuhi.
Sa dihang ang akong asawa, si Rosana, ug ako naminyo duha ka tuig human sa akong misyon, naselyo kami sa templo inubanan sa panglantaw sa pagpadako sa among kaugalingong mahangtorong pamilya. Sa paghimo niana, nagtinabangay kami sa pagmugna og mga tradisyon sa pamilya sama sa gitudlo sa among mga ginikanan kanamo, ang tanan nakatutok sa Manluluwas, sa Iyang mga pagtulun-an, ug sa mga pagtulun-an sa Iyang mga propeta sa moderno nga panahon.
Karon ang among mga anak nagpadako sa ilang mga anak sa sama nga mga baroganan sa ebanghelyo sa kalipay. Alang namo, ang pamilya mao ang labing importante sa tanan tungod kay among nasabtan ang kamahinungdanon sa pamilya diha sa plano sa Dios.
Isip Kinatibuk-ang Awtoridad, ako napanalanginan sa pagselyo sa akong tulo ka anak ngadto sa ilang mga kapikas diha sa templo. Ang pagtan-aw sa ilang mga mata sa higayon nga nagluhod sila sa altar diha sa templo usa kadto ka matahom nga kasinatian. Nakita nako ang akong kaliwatan nga napanalanginan sa sama nga mga baroganan sa ebanghelyo nga gitudlo sa akong mga ginikanan kanako ug gitudlo ni Rosana ug nako ngadto kanila. Nakita nako nga kadto nga mga panalangin magpadayon sa umaabot nga mga henerasyon. Ug napahinumdoman ko kon kinsa ang naghimo niini nga posible.
Usa ka Pahinumdom sa Pasko
Ang pamilya mahinungdanon sa plano sa Dios alang sa kalipay, apan kon wala ang Manluluwas nga si Jesukristo, kana nga plano dili mahimong posible. Ang iyang Pag-ula ug ang mga ordinansa ug mga pakigsaad nga makita diha sa Iyang ebanghelyo nakapahimong posible sa saad sa kahimayaan.
Si Presidente Nelson namahayag: “Ang kahimayaan usa ka kalihokan sa pamilya. Pinaagi lamang sa makaluwas nga mga ordinansa sa ebanghelyo ni Jesukristo nga ang mga pamilya mahimaya. Ang kataposan diin kita maningkamot mao nga kita mahimong malipayon isip usa ka pamilya—na-endowed, nabugkos, ug naandam alang sa kinabuhing dayon diha sa presensya sa Dios.”
Kon mobisita ko og mga lugar nga wala pa nako maadto, maningkamot ko sa pagpangita og gamay nga Belen nga mopahinumdom ni Rosana ug nako sa Manluluwas. Naghimo ko og ubay-ubay nga koleksiyon.
Samtang naghunahuna niadtong mapaubsanong mga senaryo sa Belen, ang akong asawa ug ako makausa namalandong, “Unsa man gayod kanang labing mahinungdanon sa atong kinabuhi?” Ang tubag, siyempre, ang Manluluwas, Iyang ebanghelyo, ug atong pamilya. Aron mapahinumdoman kita sa gugma sa atong Langitnong Amahan alang nato ug nga pinaagi kini sa Manluluwas nga ang saad sa mahangtorong pamilya nahimong posible, sa wala pa ang Pasko pipila ka tuig ang milabay gibutang namo ang tanan namong Belen sa duha ka dagkong estante sa among panimalay—ug pasagdan ra namo imbes hiposon human sa Pasko. Kana nga tradisyon nakatabang namo nga magpabilin ang diwa sa Pasko sa among panimalay sa tibuok tuig.
Matag adlaw samtang magtan-aw kami sa Belen, kini mopahinumdom namo sa mahinungdanong tahas sa Manluluwas sa among kinabuhi. Kini mopahinumdom namo nga ang kalinaw sa yuta karon (tan-awa sa Lucas 2:14) ug ang mahangtorong kalipay sa sunod nga kinabuhi magdepende diha sa Manluluwas ug sa pagtuman sa mga pakigsaad nga atong gihimo ngadto Kaniya. Ug kini mopahinumdom namo “nga siya mianhi sa kalibotan, gani si Jesus, aron ilansang sa krus alang sa kalibotan, ug aron mag-antos sa mga sala sa kalibotan, ug aron balaanon ang kalibotan, ug aron limpyohan kini gikan sa tanang dili matarong;
“Nga pinaagi kaniya ang tanan unta maluwas kadtong mga gihatagan sa Amahan sa iyang gahom ug gilalang pinaagi kaniya” (Doktrina ug mga Pakigsaad 76:41–42).
Sama nga kami nakakat-on niini nga mga kamatuoran gikan sa among mga ginikanan, si Rosana ug ako naningkamot nga mapasa kini ngadto sa among mga anak. Karon ang among mga anak nagtudlo niining sama nga mga kamatuoran ngadto sa ilang mga anak. Ang mga liso nga gitanom sa mga kasingkasing sa akong mga ginikanan 60 ka tuig ang milabay sa among gamay nga panimalay sa Brazil mibuswak ug namunga og bunga “nga bililhon kaayo, nga labing tam-is sa tanang matam-is, ug labing puti sa tanang maputi, oo, ug labing putli sa tanang putli” (Alma 32:42).
Ako mopamatuod nga kadtong mohangop sa plano sa Dios alang sa mga pamilya, mohigugma sama sa paghigugma sa Manluluwas, ug motuman sa ilang mga pakigsaad makapanunod sa umaabot “sa mga panalangin sa kinabuhing dayon ug sa kahingpitan sa kalipay” uban sa ilang mga minahal ug uban sa Amahan ug sa Anak.