Mensahe sa Unang Kapangulohan alang sa Pasko

Kita nagmaya sa paghinumdom sa atong Manluluwas, si Jesukristo. Siya natawo sa ubos nga mga kahimtang. Ang langitnong mga anghel mipahibalo sa Iyang pagkatawo. Siya misangyaw sa ebanghelyo sa paghinulsol, paglaom, ug kinabuhing dayon.

Siya miayo sa buta, miayo sa bungol aron makadungog, miayo sa tanang matang sa mga sakit, ug mibuhi sa patay. Siya ang Bugtong Anak sa atong Amahan sa Langit, ang Unang Natawo sa espiritu nga mga anak sa Dios. Pinaagi sa Iyang sakripisyo ug walay kinutoban nga Pag-ula, kita mapahiuli ngadto sa Dios pinaagi sa pagkamasulundon ug paghinulsol.

Niini nga panahon sa kahayag ug panagdait, kita nagmaya diha ni Jesukristo ug sa Iyang mahangtoron nga plano sa kalipay. Kami nagdapit kaninyo sa pagtinguha Kaniya ug sa mga panalangin sa Iyang kalinaw. Malipayong Pasko!

Ang Unang Kapangulohan