Duol ngadto ni Kristo ug Dawata ang Iyang mga Gasa

Niana akong nasabtan nga ang ubang mga gasa mas bililhon kay sa uban, ug sa kasagaran, kadto nga mga gasa nagkinahanglan og sakripisyo gikan sa tighatag.

Ang Basahon ni Mormon nagpahayag, “Adunay usa ka butang nga mas mahinungdanon kay niining tanan” (Alma 7:7), ug kana mao ang kinabuhi ug misyon ni Jesukristo. Sa pagkatinuod, ang labing dako nga gasa nga gihatag ngadto sa tawhanong binuhat mao si Jesukristo—Iyang pagkatawo, Iyang hingpit nga kinabuhi, Iyang maulaon nga sakripisyo, ug Iyang mahimayaon nga Pagkabanhaw.

Kini nga gasa miabot pinaagi sa talagsaon nga sakripisyo, ug ang matag mahangtoron nga panalangin nagdagayday gikan Kaniya. Pinaagi sa pagdawat sa Iyang pagdapit sa “pagduol ngadto [Kaniya]” (Mateo 11:28), atong giablihan ang mga gasa nga mas mahinungdanon.

Ang pagtuo labing gikinahanglan kon makita nga mas menos ang paglihok. Mahimong lisod ang pagmintenar sa atong pagtuo atol sa mga panahon sa kalisod. Hinoon, kon kita molahutay, ang Ginoo mopanalangin kanato.

Ang matinud-anong mga Nephita nag-atubang og hulga sa kalaglagan kon ang mga timailhan sa pagkatawo ni Kristo dili moabot. Bisan sa lisod nga mga kahimtang, nagpabilin silang lig-on sa ilang pagtuo. (Tan-awa sa Helaman 14:2–5; 3 Nephi 1:6–9.)

Si propeta Nephi kinasingkasing nga nag-ampo, nagtinguha og kaluwasan sa iyang katawhan. Agig tubag, ang Ginoo mihatag niining makahupay nga kaseguroan, “Ihangad ang imong ulo ug pagmaya; … karong gabii ang timailhan ihatag, ug pagkaugma moabot ako diha sa kalibotan” (3 Nephi 1:13).

Nianang gabhiona, ang kangitngit wala moabot. Pagkasunod adlaw, usa ka bag-ong bitoon ang nagpakita sa kalangitan, nagpahayag sa pagkatawo ni Jesukristo—“ang kahayag, ang kinabuhi, ug ang paglaom sa kalibotan.” Kadtong nanagbarog nga lig-on napanalangingan sa pagsabot nga ang gitagna nga Ginoo moabot.

Si Elder Neil L. Andersen sa Korum sa Napulog Duha ka Apostoles mipasabot nga ang pagtuo diha ni Jesukristo usa ka balaan nga gasa, nga ihatag kon kita mopili nga motuo Kaniya ug magmatinguhaon nga mangita Kaniya. Sa Basahon ni Mormon, si Ether mitudlo nga kon motubo ang atong pagtuo, makalaom kita sa mas maayo nga kalibotan (tan-awa sa Ether 12:4).

Mga tuig ang milabay, samtang dunay buluhaton sa Brazil, milingkod ko tupad sa usa ka tawo sa eroplano nga bag-o lang namatyan sa iyang bugtong anak nga babaye tungod sa aksidente sa sakyanan. Nasakitan kaayo siya ug walay malaoman. Dihang tukma na ang higayon, nag-istorya mi bahin sa sagradong mga butang nga makabugkos sa hangtod sa mga pamilya alang sa kahangtoran. Mipakigbahin ko sa akong pagpamatuod nga pinaagi ni Kristo, siya ug ang iyang anak nga babaye magkauban og usab hangtod sa kahangtoran. Ang iyang kasub-anan nabalhin ngadto sa paglaom, ug mibakho tungod niining bag-ong nakaplagan nga kahibalo.

Wala ko kahibalo kon kadtong tawhana nagpasakop ba sa Simbahan, apan nianang gutloa, nasayod ko nga nakaplagan niya ang paglaom nga anaa lamang pinaagi sa sakripisyo ug mga panalangin ni Jesukristo.

Ang Pagsakripisyo Magpaduol Kanato ngadto Kaniya

Ang labing dako nga sanglitanan sa sakripisyo mao ang kaandam sa Langitnong Amahan nga ipadala ang Iyang Anak, si Jesukristo, dinhi sa kalibotan (tan-awa sa Juan 3:16). Ug si Kristo, sa hingpit nga kamasulundom, misakripisyo sa tanan nga motugyan ngadto sa kabubut-on sa Amahan (tan-awa sa Mateo 26:39, 42).

Kon kita tinuoray nga nahigugma ni Kristo, atong ihalad Kaniya ang kaugalingon natong sakripisyo—usa ka mapaubsanong kasingkasing ug kaandam sa pagsunod Kaniya (tan-awa sa Doktrina ug mga Pakigsaad 59:8).

Si Apostol Pablo mitudlo nga ang balaod mao ang hanas nga magtutudlo nga magdala kanato kang Kristo aron kita mahatagan og kaangayan pinaagi sa pagtuo. Hinoon, kon mahatagan na kita sa kaangayan, dili na kita ubos sa hanas nga magtutudlo, kay mahimo na kitang mga anak sa Dios. (Tan-awa sa Mga Taga-Galacia 3:24–26.)

Kon magtubo kita inubanan sa pagtuo, ang mga sugo mahimo nga kabahin sa atong kinaiyahan. Magtabang kini kanato nga mas mahiduol sa Manluluwas, ug Siya misaad nga mopaduol kanato (tan-awa sa Doktrina ug mga Pakigsaad 88:63). Dugang pa, pinaagi sa kamasulundon, mas mahisama kita Kaniya. Kon kita mobuhat niini, atong giandam ang atong kaugalingon nga modawat sa labing taas nga gasa sa kinabuhing dayon (tan-awa sa Doktrina ug mga Pakigsaad 14:7).

Ang kalibotan anaa sa kasamok, ug si Satanas nagtinguha sa pagbalda kanato pinaagi sa kahadlok ug kawalay kaseguroan (tan-awa sa Doktrina ug mga Pakgisaad 45:26; Lucas 21:26). Hinoon, ang Amahan mihatag og paagi sa pagbuntog: Ang Iyang Anak, si Jesukristo.

Bisan og ang kinabuhi dunay mga hagit, ang pagyugo sa atong kaugalingon ngadto kang Kristo pinaagi sa mga ordinansa ug mga pakigsaad maghatag kanato og akses sa Iyang kalig-on ug makatubos nga gahom. Si Presidente Russell M. Nelson mitudlo nga ang pagkahisakop diha sa pakigsaad magbugkos kanato ngadto sa Ginoo “sa paagi nga makapahimo sa tanan mahitungod sa kinabuhi nga mas sayon.” Mas sayon, dili kay sayon. Ug ang gahom anaa nga magamit niadtong andam nga mohimo ug motuman sa sagradong mga pakigsaad. Kini, usab, kauban sa talagsaong mga gasa sa Dios kanato, nga Iyang mga anak.

Niini nga Kapaskohan, mopamatuod ko nga pinaagi kang Kristo, ang labing dako sa tanang gasa, atong madawat ang tanan nga mahinungdanon gayod—karon ug hangtod sa kahangtoran.