“Ika-13 nga Internasyonal nga Kompetisyon sa Art: Usa ka Pagpili sa mga Mananaog sa Purchase Award,” Liahona, Dis. 2025.
Ika-13 nga Internasyonal nga Kompetisyon sa Art: Usa ka Pagpili sa mga Mananaog sa Purchase Award
Ang mga artist nga mga Santos sa Ulahing mga Adlaw sa tibuok kalibotan nagpakita sa ilang pagtuo ug gugma ni Jesukristo pinaagi sa buhat sa art sa nagkalain-laing media.
Ang mga artist nga mga Santos sa Ulahing mga Adlaw gikan sa 26 ka nasod nagsumiter og 584 ka buhat sa art sa ika-13 nga Internasyonal nga Kompetisyon sa Art. Ang tema sa kompetisyon mao ang “Ipataas ang mga Kamot sa Nawad-an og Paglaom” (tan-awa sa Doktrina ug mga Pakigsaad 81:5).
Mga artist nga nagsumiter gikan sa Aprika, Asya, Australia, Uropa, Habagatang Amerika, ug Amihanang Amerika. Ang mga tigtipig sa Church History Museum mipili og 150 ka piraso aron i-eksibit. Ang mga hurado miganti og 10 ka merit award. Laing 14 ka purchase award ang gipanghatag. Lima ka visitors’ choice award ang ipanghatag duol sa kataposan sa pag-eksibit sa Enero 2026.
“Ang atong Langitnong Amahan mipaabot kanato og pagdapit sa pag-apil sa Iyang mamugnaon nga buhat,” mitudlo si Presiding Bishop Gérald Caussé. Siya mipadayon sa pag-ingon, “Ang atong mga kontribusyon mahimong mapakita pinaagi sa paghimo og mga buhat sa art, arkitektura, musika, literatura, ug kultura, nga magdayan-dayan sa atong planeta, makapadasig sa atong sentido, ug makapahayag sa atong kinabuhi” (“Atong Pagkatinugyanan sa Yuta,” Liahona, Nob. 2022, 58).
Ang buhat sa art diha sa kompetisyon nagpadayag sa pagtuo ug balaanong mga tinguha sa mga Santos sa Ulahing mga Adlaw diha sa nagtubo nga tibuok kalibotan nga Simbahan. Kini nga pasundayag ug indibidwal nga mga piraso naghatag og pagsaksi ug pagpamatuod sa pagtuo ug gugma ngadto sa Manluluwas nga si Jesukristo sa mga artist nga mga Santos sa Ulahing mga Adlaw sa tibuok kalibotan.
Mahimo ninyong makita ang pipila sa mga award-winning nga buhat sa art sa mosunod nga mga pahina. Kini gamay nga pagrepresentar sa mas dako nga pag-eksibit—ug debosyon.
Invisible Networks [Dili Makita nga mga Network] (papel)
Susana I. Silva, natawo sa 1976, Argentina
Ang Mycelium nga mga network mga fungi nga makita sa microscope nga nagkonektar sa mga ugat sa kahoy. Pipila ka siyentipiko ang nagtuo nga kini nga mga network motugot sa mga kahoy nga “makapahibalo” ug makaabag sa usag usa aron makapasa og carbon, nitrogen, tubig, ug kemikal nga mga signal. Si Silva nakamugna og usab niini nga kuti nga pagkahimo nga latis nga nagpakita sa pagkomunikar sa mga tanom diha sa humok nga ginunting nga mga papel. “Sa ibabaw sa yuta, kita kabahin usab sa usa ka dako, dili makita, kuti, ug komplikado nga network diin ang matag koneksiyon mahinungdanon ug matag anak sa Dios nakatampo sa hiniusa nga kalig-on ug kaayohan” (Susana I. Silva).
The Garden of the Lord [Ang Tanaman sa Ginoo] (papel)
Pamela Salinas Bernal, natawo sa 1986, Chile
Samtang ang nagpalibot nga talan-awon panas, ang mga indibidwal naghago og maayo aron matabangan ang mga tanom ug mga hayop nga motubo sa disyerto. Sa kilid sa suba mitubo ang mga bugon sa dalag, asul, kahil, lila, rosas, puti, ug pula nga mga bulak. Kadtong wala moturok sa natural nga paagi gibutang sa greenhouse aron maugmad. “Atong dawaton ug higugmaon ang matag usa sa Iyang bililhon nga mga anak, bisan kon sila adunay lahi nga panagway, paagi sa pagsinina, o pagsulti” (Pamela Salinas Bernal).
Fishers of Men [Mga Mananagat og mga Tawo] (oil)
Silvana Alvarez Rhodes, natawo sa 1967, Argentina (nagpuyo sa Utah, USA)
Usa ka mananagat ang milatag sa iyang pukot aron makapundok og mabulokon nga mga nilalang sa dagat. Gihimong inspirasyon ni Rhodes ang iyang amahan, kinsa migahin og daghang adlaw nga magtrabaho sa dagat isip usa ka manlalayag sa Argentine Navy apan kinsa usa ka mananagat og tawo, nangita niadtong nagkinahanglan og kalig-on ug pagkasakop sa Simbahan. “Taliwala nianang unoson, makalibog, ug makahahadlok nga dagat, ang barko sa Ginoo mitumaw isip kahayag ngadto sa kanasoran” (Silvana Alvarez Rhodes).
We Are Our Neighbor’s Keeper [Kita ang Magbalantay sa Atong Silingan] (acrylic gouache, pen, ug canvas)
Gifty Annan-Mensah, natawo sa 1949, Ghana (nagpuyo sa Virginia, USA)
Nagkuptanay nga mga kamot, naggakos, naggunit, nag-andam, nagpakaon, nagkab-ot, nag-amuma, ug nagpakigbahin diha sa hulagway sa managsilingan ni Annan-Mensah. Samtang ang matag pigura nagtinguha sa pagtabang niadtong naa sa iyang palibot, ang gugma sa Dios makita, gitimaan sa usa ka kasingkasing nga nahimutangan sa nagkahiusang konsepto sa mga eksena sa pagserbisyo. “Ang kasingkasing sa [Langitnong Amahan] nagtinguha nga sama nga Siya nahigugma kanato, kita usab kinahanglang maghigugmaay sa usag usa” (Gifty Annan-Mensah).
Consolation [Kahupayan] (acrylic diha sa canvas)
Ernest L. Budu, natawo sa 1989, Ghana
Nagginaksanay sa usag usa, duha ka babaye ang naghatag ug nangita og kahupayan. Ang mga sumbanan sa ilang sinina ug buhok naghulma sa kaluoy ug kapahulayan nga gipahayag diha sa mga panagway sa mga babaye. “Kita mahimong dangpanan sa kahupayan kon kita modasig sa usa ka tawo sa panahon sa kasubo o kadismaya” (Ernest L. Budu).
Together to Gather [Manag-uban sa Pagpundok] (oil)
Sherron Crisanto, natawo sa 1978, Pilipinas
Sa mga probinsya sa Pilipinas, ang kalalakin-an sa usa ka komunidad dili lamang motabang sa pagbalhin sa personal nga mga kabtangan kon ang pamilya mobalhin og pinuy-anan; sila magtinabangay sa pagbalhin sa balay, nagpakita sa espiritu sa bayanihan, o tabang nga gitanyag sa komunidad nga dili magdahom nga adunay ihatag nga balos. Ang “Bayani nagpasabot og ‘hero’: kita mahimo usab nga bayani sa gamay, yano nga mga butang sa pagtanyag og tabang ngadto sa ubang tawo” (Sherron Crisanto).