Հիշելով՝ ինչու եմ ապրում ավետարանով

Ամեն տարվա սկզբին ես սիրում եմ վերագնահատել իմ հոգևոր նպատակները՝ գրելով Ամանորի որոշումները: Եթե ​​դուք նաև մի քիչ ինքնավերլուծություն եք կատարում և մտածում եք, թե ինչպես եք ցանկանում բարելավել ձեր հարաբերությունները Քրիստոսի հետ այս նոր տարում, ինքներդ ձեզ տվեք այս հարցը.

«Ինչո՞ւ եմ ես սիրում Հիսուս Քրիստոսի ավետարանը»:

Քույր Էն Մ. Դիբը՝ Երիտասարդ կանանց գերագույն նախագահության նախկին երկրորդ խորհրդականը, բացատրել է, որ «ավետարանի հանդեպ մեր սերն աճում է, երբ մենք զգում ենք մեր Երկնային Հոր սերը և Փրկչի կողմից խոստացված խաղաղությունը, երբ ցույց ենք տալիս Նրան, որ պատրաստ ենք հնազանդվել և հետևել Նրան»:

Իմանալը, թե ինչու եք սիրում ավետարանը, կօգնի ձեզ զգալ և ճանաչել այն սերը, որը Երկնային Հայրը և Հիսուս Քրիստոսն ունեն ձեր հանդեպ: Այս մտածելակերպը նաև կօգնի ձեզ ավելի քիչ ծանրաբեռնված զգալ, երբ ձգտում եք ձեր հոգևոր նպատակները դնել և հասնել դրանց:

Հիսուս Քրիստոսի ավետարանն ապրելու և սիրելու իմ «ինչու»-ն ներառում է գիտելիքը, որ ընտանիքները կարող են հավերժ միասին լինել և այն խաղաղությունը, որը ես զգում եմ Երկնային Հորն ուղղված խոցելի աղոթքից հետո:

Ինչ էլ որ լինի ձեր «ինչու»-ն, հավատարիմ մնացեք դրան, դա ձեզ կտա այն հոգևոր թափը, որն անհրաժեշտ է Հիսուս Քրիստոսի ավելի լավ աշակերտ դառնալու համար:

Հենց որ ճանաչեցի ինչու էի ես ապրում ավետարանով, փոխվեց իմ հոգևոր նպատակները դնելու ճանապարհը: Ես դադարեցի մտածել այն մասին, թե ինչ էի թերանում անել և ավելի կենտրոնացած դարձա այն ամենի վրա, ինչ ես կարող էի անել: Ես հիշեցի, որ ապրում եմ ավետարանով, քանի որ սիրում եմ իմ Փրկիչին:

Տասներկու Առաքյալների Քվորումից երեց Դիտեր Ֆ. Ուխդորֆն ասել է. «Մենք պետք է ընդունենք, որ Աստծո պատվիրանները պարզապես լավ գաղափարների երկար ցուցակ չեն: … Դրանք աստվածային խորհուրդներ են՝ հիմնված հավերժական ճշմարտությունների վրա, որոնք տրված են՝ բերելու «խաղաղություն այս աշխարհում և հավերժական կյանք գալիք աշխարհում» [Վարդապետություն և Ուխտեր 59.23]»:

Իմ հոգևոր նպատակներին հետևելը ինձ հիշեցնում է, թե ով եմ ես՝ երկնային ծնողների աստվածային զավակը: Այդ սկզբունքն ինձ քաջություն է տալիս դիմակայելու իմ անհանգստություններին և թուլություններին Հիսուս Քրիստոսի միջոցով (տես Եթեր 12.27).

Նախագահ Ռասսել Մ. Նելսոնն ուսուցանել է. «Տերը մեր հավերժական առաջընթացի այս ժամանակահատվածում չի ակնկալում կատարելություն: Սակայն նա ակնկալում է, որ մենք գնալով ավելի մաքուր լինենք»: Այսպիսով, ես ամեն օր գործադրում եմ իմ լավագույն ջանքերը՝ մնալու Հիսուս Քրիստոսի հետ և հիշել, թե ինչու եմ ընտրում հետևել Նրան: