Kasansalda oh Kehlaila rehn Krais

Riei ohl oh lih kesempwal kan, I kehn Sapwellimen Kauno limpoak nan atail tuhpeneht. I kalahnganki ahi kak koasoiong kumwail. I kapakapki me Ngehn Sarawi pahn kiheng nan amwail mongiong kan dahme Kauno kupwuriki kumwail en rong, me pil siklahsang dahme I pahn koasoia.

Mahso I song en esehla duwen physics oh wahntuhke ni ahi mihmi nan college. Udahn I toutoukihla. I medewe me I songosong en esehla mehkot me laudsang dahme I kakehng. Ansou koaros me ikin kehn ahi toutou, e kin kahrehieng ahi sohla men nantiheng. Ahi sawehwe kahreieng ien medewe me ahi nannanti kan pahn sohte katepe. I tepier medewe ien uhdi sang, oh uhd wia mehkot me mengei.

I kehn ahi luwet. Ni ahi kapakap, I kehn Sapwellimen Kauno meleilei. I kehn Ah mahsen eng ie nan ahi madmadau, “I kaskasaleieng uhk, ahpw I pil ketiket te rehmw.”

I sohte ese ni ansouo wehwehn mahsen pwuko. Ahpw I ese dahme I anahne wia—oh I tepida wia.

Sang ni madmadaulaud oh doadoahk mei ahneki pahr kan mwurin ansouo, i wehwehkihda mwahu iren kaweid wet me mih nan pwuhk sarawi kan: I kak wia soahng koaros sang Krais me wia kakehlepei.”

I esehla me ahi kahpwalo me I ahniki nan physics wia kisakis ehu sang rehn Kauno. E kaskasukuhlikinie me sang Sapwellime sawas, I pahn kakohng soahng kan me apwal ma I ahniki pwoson me E pahn ketin sewesei ie. Sang ni kisakis wet, Kauno wie doadoahk pwe en kasaleieng ie oh kakehlailih iehda.

Lepin lokaia kasalehda ahniki wehwe tohto. Pwe en kasalehda mehkot kaidehn en mehn song te. Ahpw en kalaudehla ah kehl. Pwe en kasalehda lepin meteh ieu iei en pwilikidi pahn mehn katoutou ehu. Karakar, toutou, oh idaid patehng, lao udahn mwomwehu pahn kehlailda oh pahn sansalada. Metehu sohte luwetkihla ah kasansalo. Mehlel, e wiahla mehkot me likilik, mehkot me kehlail pwe en kak kolada katoutou kan.

Kauno kin kasalehieng kitail ni soangen mwomwohte pwe en kakehlaka kitail. Kasansal wet sohte kin wiawi ni ansou en saledek de insenamwahu. E kin kohdo ni ansou me kitail kin ahniki touhtou me kitail medeweier me kitail sohte kakehng. Kauno kin ketin padahngki me kitail en nantihengete kekeirda oh dehr pwangahkihda atail nannanti kan, kitail en dehr pwangada, kitail en nantihlahte mwowe.

Ni atail kin doulahte ahniki pwoson Sises Krais—mendahte ma mie mehkot me apwal nan ansouo—kitail kin kehlaila ni palingenitail akan. Pwuhk sarawi pil kadehde ire mehlel wet.

Ni karasape, soukohp Moronai, kasansalda oh kehlaila ni soangen mwohmw ohte. E wie kelekelehpw erein eh mour. E ntingihdi me sohla kempoakepah kan, ah pahpauh kamakamala, ienge aramas akan kamwomwala. Aramas kan me men kemehla ih kin pwakipwakih.

Ahpw Moronai sohte pahtoula. E uhd, ntingidi ah kadehde pen Sises Krais pohn pileit kei ohng aramas akan me e sohte pahn kilangedi, me iangahki kadaudoken aramas ako me men kemehla ih. E ntingkihdi ong kitail. E ese me ekei pahn kawe ah koasoai kan. E ese me ekei pahn soikala ah koasoai kan. Ahpw e doulahte inting.

Pwe en sasansal, en Moronai pwoson kasarawialahr oh pil kehlailla. E mwakelekella. Ah koasoai kan wahdo manaman en emen me kolokolete ah pwoson lel ni imwio. Kitail kak pehm manamano ni atail pahn wadek ah kadehde:

“Met ngehi, Moronai, ntingihdier mehkot me I medewe me kesempwal; oh I ntingwehng riei kan, Mehn Leimen kan; oh I men irail en ese me sounpar epwiki rieisek dauliher ahnsou me kilel en ketidohng Kraiso wiawi.

Oh I pahn katengepene poadoapoad pwukat, mwurin ei pahn kangoangehkin kumwail ekei kisin koasoia kan.

“Kilang, I pahn kangoangehki kumwail me ahnsou me kumwail pahn wadek mepwukat, ma iei eripit en Koht me kumwail pahn wadengki, me kumwail pahn tamataman ia uwen kupwurkalahngan en Kauno ong aramas akan, sangete ni kepikipikdahn Adam kohdo lao lel ahnsou me kumwail alehier mepwukat, oh medemedewe nan amwail mohngiong kan.

“Oh ahnsou me kumwail pahn alehdi mepwukat, I pahn kangoangehkin kumwail en peki rehn Koht, Sahm Soutuk, ni mwaren Krais, ma mepwukat sohte mehlel; oh ma kumwail pahn peki sang nan mohngiong mehlel, ineng mehlel, pwoson Krais, e pahn ketin kasalehiong kumwail mehlelo, sang ni manaman en Ngehn Sarawi.

“Oh sang ni manaman en Ngehn Sarawi kumwail pahn esehla mehlel en soahng koaros.”

Ahn Moronai kadehde sarawihala nan loaloid, ahpw met e wiahla marain ehu me kin kaluwa keinek kan koaros en rapahki Samatail Nanleng oh Sounkomouro Sises Krais.

Pil emen soukohp nan Pwuhk en Mormon, Seikop, pil kasansalda oh kakelailla ni ah wia seri men me esehier kahpwal akan oh pahtou laud kan. Ahpw ah pahpao, Lihai, padahkiong me Koht pahn ketin kapaiada ih nan ah kahpwal akan.

“Oh kilang, ke lokolongki apwal akan oh pahtou laud ni ahmw pwulopwul, pwehki lemei en riomw pwutak kan.

“Ahpw, Seikop, nei seri me tepin ipwidi nan sapwtehno, ke wehwehkiher duwen lapalap en Koht; oh e pahn kasarawihla ahmw lokolok kan pwe en wiahla kamwahupemw.

“Eri, palingenomw pahn kapaiada, oh ke pahn koukousoan rehn riomw pwutak, Nihpai, nan popohl; oh erein ahmw mour ke pahn kin papah ahmw Koht. Eri, I ese me ke pahn komourla, pwehki ieias pwung en ahmw Soundoaro; pwe ke kilangehr me ni unseklahn ahnsou e pahn ketido pwe en ketkihong aramas komourparail.”

Soukohp Sosep Smith esehier duwen kasansal oh kakehlail wet ni ansou me e mihmi nan Imweteng en Liperdi. Nan ansou me e ahneki lokolok laud, soukohp Sohsep kapakap oh nda:

“O maing Koht, ia komwi? …

“Ia uwen werein limomwi eh sohte pahn seweseie?”

Kauno mwangih nan an Sosep lokolok me e nanatieng dadaur mwahu sang ni Ah sapengki:

“Nei pwutak, ahneki popohl ong palingenomw; ahmw kasongosong oh ahmw lokolok kan pahn mimiki kisin ansou kis;

“Oh eri, ma ke pahn dadaurete mwahu, Koht pahn ketin pwok uhkada wasa ile; ke pahn kak powehdi ahmw imwintihti kan koaros.”

Karasaras me keieu mwahu ong kasansal oh kakelail wiawi sang ni Tomwpen Sounkomouro. E alehdier dihp en sampah pwon. E alehdahr atail medek kan oh pahtou kan. E ketin nimala kep katiko. E loalopwoat ni ahnsou koaros.

Pwehki Sapwellime Tomw lapalapo, Sises Krais kak kakelailih kitailla nan atail ansoun kahpwal. E kin mwahngi mwomwen ah pahn ketin sewese kitail pwe E mwahngiher soangen kahpwal akan koaros me kitail pahn sohpeiong nan mour wet. “E pahn ketin alehda medek koaros oh soumwahu koaros me sapwellime aramas akan pahn tungoalenki … pwe en mwahngi nin duwen paliwar mwomwen eh pahn ketin sewese sapwellime aramas akan nin duwen arail luwet akan.”

Kitail esehla me nan Mwetuwel en Ketsemeni, Sounkomouro peki rehn Sahmo ma lokoloko kak kohsang Reh—ahpw mwuhr E pil mahsanih me ma iei kupwuren Seme, eri Sounkomour pahn wia. De ni pil ehu lepin koasoi, Sounkomouro pil alehda peikasal oh pwunod, ahpw E ketin pwoson Seme Nanleng.

Rieiko, amwail kasansal oh kehlaila mwein sohte pahn duwehte ahn Moronai de Seikop de pil ahn Soukohp Sosepo. Ahpw e pahn kohdo. E nek kohdo ni meleilei, sang ni kahpwal akan en mour en peneinei. E kak kohdo nan ansou en soumwahu de sawehwe de insensued de loaloid.

I kadehdehki me ansou pwukat sohte wia dehde me Kauno soik kumwailahr. Ahpw, e wia dehde me kasalehda me uwen E ketin poakohng uhk iei en kasarawihala oh kakehlaka kumwail. E ketin kakakehlaka iuk pwe ken kak wah toutou en mour soutuk.

Ma kitail loalopwoat nan atail doadoahk, Kauno pahn ketin kasarawih kitailla. E pahn ketin kakehlaka kitail. Oh ehu rahn, kitail pahn kilengla mwuri oh diarada me soangen kahpwal pwukoah wia kadehdehpen Sapwellime limpoak. Kitail pahn kilang me E ketin sewsewesei kitail en kak kesihnen Reh ni lingan. Sapwellimen Kauno wahnpoaron Paul mahsanih ni keimwseklahn ah mour, “I wiahier uwen ei kak nan mour wet, me rasehng weirentang, I kanekelahr weir wet, oh I pil kolokolete pwoson.”

I kadehdehki me Kauno mwahngih uhk. Eh ketin mwahngih kahpwal akan me ke sohpeihong. E kin ketin ieiang uhk. E sohte pahn keseiuhkala. I kadehdehki me Sises Krais iei Sapwellimen Koht Iehros. Ih me iei atail kehl, atail Soundoar, atail koapwoaroapwoar. Ma kitail pahn kamehlele Ih, Eh pahn ketin wiaieng palingenitail kan manaman en kakehng kapwal akan me kin kohieng kitail. I kadehde mepwukat ni mwahr sarawi en Sises Krais, ahmen.