Ni Mohngiongomw Unsek Wia Ahmw Pali
Likih Sounkomouro oh ieiang, ni kanangamah oh mehlel, en wia ahmw pali sang nan mohngiongomw unsek.
Pahr samwalahro erein ahi seilok nan Iurop, I pwarek ahi wasahn doadoahk en mahso, Lufthansa German Airlines ni Wasahn Sompihr en Frankfurt.
Pwehn kasukuhlih neirail pwailet ko, irail kin katanga wiepen soangen mesihn en sompihr kei me kak wiahki mwomwen sompihr ni ansoun mwahu oh pil ansou me kahpwal pwarada. Nin dokon ahi pahr tohto me I wia kepin sompihr, I kin anahne pweida nan mehn kasukuhl ieu nan erein sounpwong wenou koaros pwe ien kak kolokolte nei laisin en wia pwailet men . I tamante ansou pwuko me udahn kapwunod laud ahpw pil pepehm en pweida I alehda mwurin ahi kanekehla sikengo. Ansouo I pwulopwul oh pereniki soangen doadoahko.
Erein ahi mwemweito, emen kaun en Lufthansa idek ma I men pwurehng song sikengo oh pilehu dake sompihr 747.
Mwohn ahi pahn sapengala peideko, Ih rong ngihl ehu—me duwehte pein ngileio—koasoia, “Ei, I pahn mwahuki mehlel.”
Mwurinte ahi koasoia iren lokaiahu, dir en madamadau kei kohdo nan ahi madamadau et. Udahn wereila sang ansou me Ih dake 747 ehu. Ni ansouo I pwulopwul oh wia kapin ngoang men. Met mie ahi pwukoah en pwurehng duwehte ahi koahiek en mahs ni ansou me I wia kaun en pwailet men. I pahn namenekla mwohn irail semen kan?
Ahpw e pwandehr I solahr kak pweieksang, eri ngehi soandiengehr nan sehr en kapino, kihong pehi ka pohn mehn katanga sompihro, oh kehndahr, pilehu pak, kaperen en e pipihr ni sompihr lapalahu ah tangala pohn ahl en pihrdahu oh pihrdahla nan wasa poh mei.
I inenen perenki ahi kak inda me pihrdahu pweida, sompihro mwamwahute, oh pil iangahki mwomwen ahi pwukoah.
Ahpw, ansou wet kaktikitik iehla. Ansou me I mih nan ahi pwulopwulo, pipihr en sompihr kerenihong wiahla kisehn ahi mour. Met e kihong ie en anahne nantiheng wia soahng kan me mengei.
Tohn Padahk Kan Kin Ale Kaweid
Dahme I esehla nan karasaras en dake sompihr wet wia mehn kataman kesempwal ehu me en mai ni mehkot—mendahte ma ni pipihr en sompihr, seisei, deidei, mwet, de esesehla—kin anahne einger oh kasikuhl ansou koaros.
Ke pahn kakete kaskasukuhlki sounpar kei en esehla soahng ehu de esehla koahiek ehu. Ke mwein kin doadoahk laud pwe en kak wiahla kisehn pali keriau en omw mour. Ahpw ma ke medewe met wewehki ke kak uhdi sang omw ononopiki oh wiewia, ke pahn diarada me dahme ke esehiero wie tikitiklahr.
Met pil iangahki koahiek en esehla lokaia teikan, kesekesengki mehn keseng kan, oh pipihrki ehu sompihr. E pil mehlel pwe en wiahla tohn doadoahk en Krais men.
Ni koasoi mengei, tohn doadoahk men kin anahne apwalih-pein Ih.
Kaidehnte mehkot en seukautihong, oh e sohte pahn pein wiawida.
Pwoson Sises Krais iei kisakis ehu, ahpw en alehda wia mehn pilipil ehu me anahne inou en atail “kehl unsek, madamadau unsek, oh roson unsek.” E wia mehkot me kitail en kin wia rahn koaros. Nan awa koaros. Kitail pahn anahne kin kasukuhlki oh mehlel pwe kitail en inoukihdi teng. Atail pwoson, me iei atail poadidieng Sounkomouro, pahn kehlaila ansou me e pahn kin songosongda pahn kahpwal akan me kitail pahn sohpeiong nan mour wet. E kin dadaurete ma kitail pahn nantihong wie apwapwalih, kitail kin nantihongete mwekid en kolokol, oh kitail kin sohte uhdisang.
Ah, ma kitail sohte pweida doadoahngki pwoson oh ah manaman sang ni atail pahn wia, kitail pahn sohla nohn kamelele dahme kitail ese me sarawi—sohla nohn pwungki dahme kitail kin ese me mehlel rahn teio.
Kasongosong kan me kin sohte kak lelohnger kitail pahn tepida sansalda.
Kehlail en kadehde en aio kak kansenamwahuih kitail uwen ansou kis. E anahne epwel mwahu pwe en kak kolokol ah marain.
Nan Kadehde Kapwo, Sounkomouro padahngki duwen karasaras en kaun men me kihong emen emen nah ladu ko likilik sarawi ehu—uwehn mwohni ehu me kahdaneki toala kan. Ladu kan me nantihong koadoaihada neira toala kan kalaudehla neira kan. Ah ladu me kohla ekihla nah toalahu kahrehieng ah en ahpw salongala.
Padahko? Koht ketikiong kitail kisakis kan—en eripit, en koahiek, en ansou mwahu—oh E kupwurki kitail en koadoahkih oh kalaudehla mehpwukat pwe re en kak kapaikitailda oh kapaiada Sapwellime seri teikan. Met sohte kak wiawi ma kitail kihong kisakis kan pohn dana me ile kan wiahki soahng ehu me kitail pahn kin kilekilang ekeite pak. Atail kisakis kan pahn laudihla oh tohtohla ihte ma kitail pahn kin ale oh doadoahngki.
Mie Ahmw Koahiek
“Ahpw Elder Uchtdorf,” ke kak koasoia, “Ih sohte ahneki kisakis kan de koahiek kan—ahpwe, sohte me nohn kesempwal akan.” Mwein ke kin kilang mehteikan me arail kisakis kan kin kaselel oh kin sansal eri kowe kin ahnekida pepehm me ke sohte kin kak karanih irail. Mwein ke pahn medewe me nan mour mwohn mour wet, rahn en alehdi kisakis oh koahiek me pahrekseli, noumw dahlo sohte mwomwen dir kanenge—ahpw mehlel ni omw kilang dahme kaposokehda oh kadirehda pohn dahl teikan.
Oh, ia uwen ahi men pwoleiukedi oh sewesei iuk en wehwehki mehlel wet: Ke wia aramas en kapai oh marain men; seri en Koht soutuko ni palingehn! Oh ke weuwa mehkot ehu me inenen deilahsang mehkoaros me ke kak medewehda.
Nin duwen soun inting kan ahr intingihdi, ke kohdo sampah “weuwa lingan en depwek kan”!
Pein koasoiepemw inenen kaselel, pil duwehte dahme ke kohdohng wia. Ke kohdo sang nanleng pwe kehn kohdo wasaht, ahpw nanleng sohte keseiukala!
Kowe soahng koaros ahpw pil sohte mwomwe.
Mie omw kisakis kan!
Nan Padahk oh Inou kan, Koht mahsaniher:
“Mie kisakis tohto, oh ong [aramas] koaros kohieng kisakis ehu sang rehn ngehn en Koht.
“Ong ekei kohieng ehu, ah ong ekei pil ehu, [oh] koaros pahn kak kapaidasang.”
Ekei atail kisakis kan sansal nan pwuhk sarawi kan. Pali laud sohte.
Nin duwen Soukohp Moronai mahsanih, “Dehr kahmahmki sapwellimen Koht kisakis kan, pwe kisakis kan me tohto; oh kohsang rehn Kohtohte.” Irail pahn kak sansal ni “sangen wiepe tohto… ; ahpw ihte Kohto me kin ketikihda nan mehkoaros ong aramas koaros.”
E pahn kak mehlel me atail kisakis en ngehn sohte kin kalapw sansalda, ahpw met sohte wewehki me re sohte kesempwal. I kak ehukihong kumwail ekei kisakis en ngehno me I kilangada rehn towe kan wasahseli nan sampah? Medewe mwahu ma ke kapaikidahr ehu de ekei kisakis me duwehte:
-
Kasalehpen limpoak.
-
Kasawihpen aramas akan me kin sehsehla.
-
Didiar kahrehpe kan en perenkihda.
-
Wia soun kamwahu men.
-
Kasawihpen kisin manaman kapwuriamwei kan.
-
Kihda koasoi kamwahu kan
-
Kin mahk.
-
Kin koluhla.
-
Dadaurete.
-
Kawehwehda soahng kan ni sansal.
-
Ehuong serihkan.
-
Kin utung kaun akan en Mwomwohdiso.
Ke mwein sohte kilangada kisakis pwukat ahr kin kasansalada ni kamadipw en ward kan. Ahpw I koapworopworki ke kak kilang uwen arail kesempwal ong doadoahk en Kauno oh ia mwomwen ahmw sair, kapaiada, de pil kapitala emen seri en Koht sang ni ahmw kisakis kan. Tamataman: “Sang ni soahng kan me tikitik oh mengei, soahng kan me lapala kin pweida.”
Wia Ahmw Kisin Pali
Riei souleng ko, kempoakepahi kan, I kapakapki Ngehno en kak sewese kumwail en kasawih kisakis kan oh koahiek kan me Koht ketikihong kumwail. Eri, kitail en, duwehte ladu loalopwoat ko nan Sapwellimen Kauno karasaras, kalaudehla oh katehlapihla.
Rahno pahn kohdo me kitail pahn uh mwohn Samatail Nanleng pwe en kihong Ih wahn atail doadoahk. E pahn kupwurki en ese dahme kitail wiaieng kisakis kan me E ketikihong kitail ehr—me duwehte, mwomwen atail doadoahngki en kapaiada Sapwellime seri kan. Koht udahn mwangih ihs kitail, ihs me kitail mehlel, oh ihs me kitail pahn wiahla, eri dahme E ketin kasik sang kitail inenen laud.
Ahpw e sohte kasik kitail en alehdi mehkot laud, de dehdehkihla, de manamankihla pwe kitail en kak lel wasao. Nan sampah me E kapikadahr, keirda wiewiawi sang ekis ekis oh ni kanengamah—ahpw pil ni pahrek oh e sohte kin uhdi.
Tamataman, iei Sises Krais me wiahier mwekid en aramas manaman men ansou me E kalowehdi mehla oh dihp.
Atail pali iei en idawehn Krais. Atail pali iei en sohpeisang dihp, sohpeilahng Sounkomouro, oh alu pohn Sapwellime ahl, kehndake ehu ni ansou ehu. Ni atail wia met, ni ngoang oh pwoson, kitail kin kesehsang kitail sein en sohte unsek kan oh sapwung kan oh wekiwekidekla, lahu rahn unseko me kitail pahn unsekla rehn Krais.
Kapai kan kerendohr. Inou kan mihmi ier nan dewerail. Wenihmwo ritidahr. Atail pilipil iei en pidelong oh tepida.
Tapio mwein pahn tikitik. Ahpw e MWAHU.
Wasa me pwoson luwet, tepikihda koapworopworki Krais Sises oh Sapwellime manaman en kamwakelehda oh kasarawihala.
Samatailo ketin peki kitail en sohpeihong nannanti en pwoson wet oh atail wia tohnpadahk kei kaidehn nin duwen soun mwemweit kei ahpw nin duwen soun kamehlele kan me sohpeisang oh pweieksang Papilon oh kihong mohngiongarail kan, arail madamadau kan, oh nehrail kan en kohwei nan Saion.
Kitail ese me atail nannanti kelehpw sohte kak wiahieng kitail wehin selesdiel. Ahpw re kak wiahieng kitail en poadidi oh tengeteng ong Sises me Kraiso, oh Ih me kak wiahieng kitail wehin selesdiel.
Pwehki atail Sounkomour kempoake, sohte mehkot mie me duwehte soh-kana. Ma kitail pahn kihdi atail koapworopwor oh pwoson Reh, kitail pahn pweida. E ketin inoukieng kitail Sapwellime kehl, Sapwellime manaman, oh Sapwellime kupwuramahk. Sang ehu kehndake ni ehu kehndake, sang ekis ekis, kitail pahn karanihla rahno me pwuriamwei oh unsek ansou me kitail pahn kousonla Reh oh kempoakepahtail kan nan kilohri soutuk.
Pwe en lel wasao, kitail anahne wia atail pali rahnwet oh rahn koaros. Kitail kapingki kehndake kan me kitail wia aio, ahpw kitail sohte uhdi wasao. Kitail ese me kitail ahnekihte ahl reirei mwowe, ah kitail sohte mweidohng en kaluwet kitailla.
Met iei lingan en ihs kitail—soun idawehn Krais kei.
I kangoangehki oh kapaiada towe koaros en Mwomwohdisoht, oh irail koaros me inengieng en wiahla kiseh, en likih Sounkomouro oh patehng, ni kanengamah oh ngoang, en wia ahmw pali sang ni mohngiongomw unsek—pwe ahmw popohl en direhla oh me, ehu rahn, ke pahn kak alehdi soahng koaros me Sahmo sapwellimanikiehr. Mehpwukat I kadehdeki ni mwaren Sises Krais, ahmen.