Sises Krais oh Ahmw Mour Kapw

Sises “ketseli wasa koaros ketin wiahda me mwahu.” Kitail kin wadek ire kesempwal wet nan pwuken Wiewia Kan. Inenen kalaimwun katikalahn kesempwalpen mahsen wet! Sises ni mehlel ketseli kin wia dahme mwahu! Iei Ihte me mour—oh wasa mwahu koaros—tepsang ie! E mehleliong wia me mwahu erein Ah mour sampah. E ketin “diren kalahngan oh kadek, oh me sohte kin mwadang lingeringerda, oh me diren,” limpoak lapalap oh loalopwoat mehlel.

Songosong kan koaros souitar en kawehwehda ia uwen mwahu oh kupwurkalahngan me E Sapwellimaniki! Ni mehlel, nin duwen dahme Wahnparon Sohn songen kasalehda, me ma kitail pahn songen kilelehdi mwekid mwahu koaros en Sounkomouro, ”pil lel sampah pwon sohte kak audaudkihda uwen pwuhk koaros me konehng en ntingdi.”

Karasaras sansalamwahu kan me kitail kin kalapw kilang nan pwuhk sarawi me pid Sises ah ketketseli ”wiahda me mwahu” kin kahrehiong atail kin madamadau loaliki, ahpw mehlel ma kitail kin medewe ia pahn mwomwen ma kitail iang mih wasahu, oh kilangedi Sapwellime manaman kan, alehdi Sapwellime padahk kan, oh iang kehn Sapwellime manaman en kamwahuihala. E mahseniong irail akan me sekeniken, E doahke me soumwahu oh samin kan, E kansenamwahuih irail akan me pwangadahr, E padahki mehlelo, oh E ketin eker me dipan akan en koluhla. E ketikihiong mour kapw rehn me tokitok, ohl maskun, lih kamwahlo; me sohte kak alu, me salengepon, oh me sehse lokaia ; nohno koaros me ahneki pahtou, pahpa me anahne sawas laud kan, oh lihohdi me insensuwed; me dipada kan, me adsuwedlahr kan, oh me wie lokolok; ong me mehla ni paliwar de pali ngehn, dahme E ketin wiahiero iei ketkihda ehu mour kapw. Ei, pilehu me katikala kesempwalpe.

Soahng koaros me E kosoia oh wiahier kihongehr mour kapw rehn emen emen irail ako me E kamwahuihalahr, kapaiadahr, kaskuhliher, oh kamarahdahsangehr nan dihp. E sohte sohpeisang irail, oh E udahn sohte pahn sohpeisang kumwail. Medewehla soangen ansou wet ma ke pahn rongasang Ih soangen kaweid en momour pwukat:

“Kempoakepahi, dipomw kan lapwadahr.”

“Serepein, I ndahiong uhk, pwourda.”

“Mwakelekelda.”

“I sohte pil pahn kadeikuhkada: kohwei, oh dehr pwurehng wiahda dihp.”

“Serepein, omw pwoson me kakehleiukadahr; kohkohwei ni popohl.”

Sapwellimen Sounkomouro mahsen kan ong irail me mwotomwot, ahpw ong irail E ketin kasalehda ahl kapw ehu en mahk, mwahula, kapwurpwurdo, meleilei, oh mour soutuk. Oh rohng kapereno iei me E kin ketkihong kowe oh ngehi mour kapwohte. Kitail koaros kak alehda mour kapw sang, oh pwehki, Sises Krais. Pil duwehte kowe. Mour kapw wia kisehn inoandehn pilahn en Sahmo ong Sapwellime serihkan. Mwomwodisoht iei mwomwohdisohn mour kapw akan! Mwomwohdisoht iei mwomwohdisohn pwurehng tapihada mour kapw!

Sang ni pepdaiski pihl oh Ngehno, kitail kin ”ipwsapahl” oh kak ”aluhwei nan ehu mour kapw.” Ia uwen koapwoaroapwoar me mour kapw wet kin wiahng emen me kin mihla pahn ah katoutou en dihp akan de me lokolongkiher kahpwal akan en mour direki apwal oh ehupene pingiping kan? Sises sohte anahne mahkepen dihp ong Pein Ih de ehu mour kapw, ahpw E ketin pepdaisla, pwehn kasalehiong kitail ni kalahngan ahl ong mour kapw me E ketin kaunopadahr ong emenemen kitail.

Oh atail mour kapw sohte kin wiawi pak ehute. Kitail kin medewe me atail pepdais iei ihte atail ansou mwahu en pilehu tapihada mour kapw. E sto wia. Kitail sohte ahniki ansou mwahu pak ehute. Mour kapw pwukat kak wiawi rahn koaros! Oh ni mehlel nan wihk koaros kitail kin kang kisin pilawa oh nim kisin kepin pihl ehu pwehn kataman kisakispen atail Sounkomour unseko, me pwoulahr pwehn kasalehiong kitail kahrepen Ah ketkihong kitail ansou tohto en pwurehng tapihada mour kapw! Sises kin mweidohng kitail en pwurehng tapihada mour kapw ansou koaros me kitail anahne.

Ni atail inengiong oh perepereniki mour kapw ehu rehn Krais, kitail kak wiahla ”aramas kapw emen,” me dahme mering kin sohrala oh soahng koaros kin kapw la. Ia uwen koapwoaroapwoar me ansou mwahu wet wiahng mour en aramas emen me kin nanantihong, en pilada pwoson Sapwellimen Soundoaro manaman en kamwahuihala oh kapwurehdo, mendahte kaluwet kan en sampah wet? Sounkomouro sohte uhdihsang Ah mehleliong en kapwaiada koasoandien Seme oh kaimwsekala Sapwellime pwukoahn tomwo, mendahte Ah weirek me kahrehiong Ih en rerada, nta kohsang ni pwoahr koaros en paliwere, lokolok ni paliwar oh palingehn, oh kapakapki kep en tomwo en kopwurpwursang ih. Pil ehu, E wie kasalehiong kitail ia mwomwen pwoson Koht ni loaloapwoat duwehte.

Sang ni inou sarawi koaros me kitail kin wiahda oh songosong en wia atail kak koaros en momouriki, kitail kak alehdi ”ehu mohngiong kapw” oh weh unsek en ”ngehn kapw ehu.” Ekis ekis, sang ni atail pahn kalapw luke Sapwelime kalahngan ong nan atail mohngiong kan oh kin kihsang ngihl sohte mwahu sang nan atail madamadau kan, kitail kin wiahla Sapwelime pwehki kitail ni mehlel wiahkihla Ih atail Koht. Sises ketin kupwurki ni mehlel en wia atail Nahnmwarki oh silepen sihpw oh atail Kaun en Meleilei, eri kitail anahne pilada en wiahkihla Ih mepwukat nan atail mohngiong oh madamadau kan.

Koluhla kin retingada wenihmw en mour kapw akan, pilehu tapihada kan, oh ansou mwahu en weliakapw kan. Padahk kan sang atail Preseden Kesempwal Russel M. Nelson kamarainiadahr sawehwe kan me pid kisakis kesempwal en koluhla, oh I leme me kitail tepdahr marainkihla.

E kin kaperen rong neitail me pwulopwul kan arail kin kawehweh dahkot koluhla ong irail. Me keren I rongehr emen serepein pwulopwul kosoia, ni ah sinsirei, ”Ansou mei kin medewe koluhla, koluhlahn ehu ehu rahn, I kin kehn popohl oh koapwoaroapwoar laud. I kin kehn limpoak oh peren en Semei Nanleng oh ahi Sounkomour. I sohte kin masak ien peki rehn Sahm Nanleng ni kapakap Sapwelime sawas ong kahpwal sohte lipilipil mei ahneki. I ese me Ira sohte songosong en diar ahi wiewia dahme sapwung. Limarah kan kohpesengehr. Met iei koluhla ong ie,” e kosoia. Serepein pwulopwul menet wehwehki me pwehki Sises Krais, e pil kak ahneki mour kapw!

Ke anahne ehu mour kapw? Ke kak pilehu tapihada ehu mour kapw, pil kowe? Medewe aramas akan me Sounkomouro sewesehier—aramas akan me E padahkehngehr, kamwahuialahr, kamauradahr, mahkehngehr, oh kapwuredohr. E ketin pil irailda sang ni wen neirail mwohni de mwomwen arail mour? E katohrepeseng nanpwungen me pwung oh me dipan? E kin katohrehla aramas akan me dene irail me konehng de irail me E keieu poakohng? Soh.

Mehkei kohla Reh ni pwoson kehlail, aiahniki koapwoaropwoar en Sapwellime manaman en kamwahuiala aramas—duwehte lih me soumwahu en ntahu, sounpei en Rom me nah laduo kerenieng pahn mehla, me tokutoko, Sairus, oh Pardimeus me maskuno. Irail koaros doadoahngki arail pwoson, kaskasik me kalahngan oh manaman en sounpadahk en Suhs oh me kohsang Nasared kak wekidala arail mour oh arail kamehlele kan. Oh E kapwaiada. E mweidehng Sapwelime manaman en kamwahuiala ni sansal.

Ahpw Sises pil ketin kapaiada irail akan me ahneki pwoson tikitik, me duwehte pahpahn seri me soumwahuo me kosoia, me pil kakete dueiuk,”Maing Kaun, I kamehlele; komw ketin sewese ahi soupwoson.” Oh E pil sewese irail akan me sohte rapahki Ih, me duehte lih me dipikihda kamwahlo, lih ohdi me naneki kisin pwutak mehlahu, ohl me sohte kak alu me mih ni pwarer en Pedehsda, oh ohl me maskuno. Mie pak ke kehn Ah ketketseli pwe en wiahda me mwahu nan ahmw mour mendahte ma ke sohte kin rapahki Ih de ideidawehn Ih?

Ong emen emen irail kan sang nan ire tikitik pwukat, oh koaros me pahn rong oh alehda, E ketikihong irail mour kapw ehu, ma mour kapw ehu me alehdier mahkpen dihp de mour kapw ehu me maiaudasahng soumwahu de mour kapw ehu me pwourdahsangehr mehla.

Ia wehwehn met ong komwi oh ngehi? Sohte imwilahn Sapwellime kalahngan oh mahk oh limpoak-karakarahk. Mour kapw akan wia pali keiou kesempwal ong Sapwellimen Sahmo koasoandio! Pilehu tapihada mour kapw wia Sapwellimen Ieroso pwukoah! Rahn kapw akan, mour kapw akan, oh ansou mwahu kan wia pali keiou kesempwal ong rohng kaperen en rongamwahuo!

Eri, ke wereisangehr ahmw inou sarawi kan pwe ken kak alehdi mour kapw ehu? Soh. Ke wiahier met de mwo pak tohto pwehn kak pilehu ale ansou mwahu en weliakapw? Soh. Ke dohsangehr Krais kahrehda Ah sohte kak seweseiuk ntingiada ehu soai kapw en ahmw mour sang met kohla? Soh. Tepelo kelehpw pereniki me dene ke pwupwilahr. Komw sohte pwupwilahr.

Oh mour kapw kaidehnte ong dipatail kan oh sapwung kan. Sang ni kalahngan oh limpoak en Sounkomouro, kitail kak pilehu tapiada mour kapw me pahn wekidala atail madamadau mering kan, mwekid sohte mwahu kan, keh mwehl kan, madamadau sohte mwahu kan, pepehm en sohte katepe, oh madamadau en kapwopwohniki mehteikan oh soik pwukoah. Komw kak wekidala soahng kan nan ahmw mour me kin kaluweteiuk sangete mahs. Komw kak pilehu tapiada sang ni sawas en Kaun en mour kapw koaros. E sohte kin pwangahkihda kihong kitail mour kapw.

Ong koaros me ahneki kahpwal ong dihp ehute de kasongosong ehute kopwkopwurupwuriong pak tohto, nantihla mwowe. E sainkinte retingehdisang uhk ahlo. E saikinte itehionguhk ahmw ansou mwahu en weliakapw. Wenla mwowe. Nantihla mwowe. Rapahki sawas sang mehn mpomw kan. Oh komw ahniki koapwoaropwoar me pahn mie mour kapw ansou koaros me komw pahn sohpeieng Sahmo ni ineng mehlel. Pwilikihdi dihp me kitail kin inengieng wiahda, kapwkapwurehiong, oh atail aklapalap mwuritail, wasa me re konehng mih ie. Komw sohte anahne momourikihte ahmw mour en mahso. Koledi ahmw mour kapw, ahmw keriaun ansou mwahu de kesiluh de kapahieu—de ke epwiki—en weliakapw, me kohieng uhkehr sang ni tomwpen ntahn Sises Krais.

I ienenen kaping laudki mour kapw akan me kohieng iehier oh me pil pahn kohdo kan.

Sounkomouro kosoaia ehu ire kesempwal kahrehda eh mie koapwoaroapwoar de kaping rahnwet.---------- Mwurin lokolok kan en Kedsemeni oh ni kaimwseklahn kalokolok en pohn lohpwuo, E kosoia, ”E imwiseklahr. ” Kokohp en Mesaiahu pweidahr, oh pweipwand en dipen aramas koaros pweipweilahr. E mahsaniher ”imwseklahr” Sapwelime tohnmetei me sohte imwi oh soutuko. Ahpw Sapwelime Tomwo sohte pahn kak unsekla lau pein Ih ahnekihda mour kapw ni rahn kesiluho, ehu mour kapw, ni Ah linganlahr, iasadahr sang manaman en Sahmo.

Pwehki Ah kin ansou koaros wia dahme kin kaperen ong Seme, oh pwehki Ah ”lokolok ki kupwuren Sahmo nan soahng koaros,” kowe oh ngehi kak ahneki mour kapw. Menlau alehda ahmw mour kapw, rahnwet, ansouet. Sises Krais me wia Tapiada oh kaimwsekala atail pwoson, oh kin kihong kitail mour kapw tohto. Ihme wia Tapi oh Imwi—ididihn atail namenek oh lokolok, oh tepdahn atail mour kapw Reh, mweidehng kitail en alehda Sapwellime kalahngan, pwilikihdi atail mour en mahs, oh tapihada ehu mour kapw ansou koaros, me kitail pahn anahne. Ni mehlel Sapwellime ”kalahngan oh mahk pahn ieiang [kitail] erein [atail mour kan].” Ni mwaren Sises Krais, ahmen.