Kapaiada Irail Soun Kameleilei kan

Iang ie medewe me ke wia aramas pwulopwul men nan Capernaum, limwahn sehd en Kalili, nan ansou en doadoahk en Sises Krais. Kosoi sang rehn rabbi—sounpadahk men—me pahneki padahk me wahdo pokon ehu. Mehn impomw kan seiloklahng pohn dohl ehu me salahng sehdo pwehn iang rong Ih.

Ke iang Ih mehteikan alualu pohn ahl en Kalili. Ni omw lel wasao, pokon laud o kohpene pwe rehn rong Sises inenen kapwuriamweiukala. Ekei kin mwenginingin kosoia “Masaiah.”

Ke rong. Sapwelime mahsen akan sair omw mongiong. Nan seilok reirei ong omw wasa, ke pilada meleilei sang koskosoi.

Ke medewe sohng kaselel tohto—sohng kan me pil sipelehsang kosonned en Moses. E masanih duwen omw pahn sohpeila oh poakohng omw imwintihti kan. E masanih, “Kapai ong irail soun kameleilei kan: pwe irail pahn kadaniki seri en Koht.”

Ni omw pepehm, ansou me ke kehnda touhtou en rahn apwal akan—me sohte nohn dehde oh kamasepwehk—meleilei kin dohla.

Omw alu kin ukuhla, ke lel la ni ihmwomw o nget. Omw peneinei kan kohpene, omw pahpao idek, “Padahkiong kiht dahme ke rongehr oh dahme ke pehmada.”

Ke ehukiwei me E lukeiuk en mweidohng omw marain en serehda mehteikan, en rapahki pwung kan mendahte ma ke kalokolok ki. Amw kosoi ekis pweiokla ni omw pwurehng kosoia: “Kapai ong irail soun kameleilei kan; pwe irail pahn kadaniki seri en Koht.”

Ke peidengki, “Ih kak wiahla emen soun kameleilei ansou me sampah pahn pingida, ansou me ahi mohngiong oudaudkihda masepwehk, oh ansou me meleilei inenen dohsang ie?”

Omw pahpao kilanglahng omw nohnou oh kosoia, “Ei. Kitail kin tepida sang pah—nan atail mongiong kan. Mwuri nan ihmwatail kan oh peneinei kan. Ansou me kitail kin kaskasukuhl ki, soun kameleilei kak kalohk da nan ahl akan oh wasahn kouson kan.

Kapwurehdo mwurin sounpar 2,000 samwa. Sohte anahne medewe—pwe met nan atail mwehiet. Mendahte sohng koaros en ansou wet ah wekisang irail me pwulopwul kan en nan Kalili—wekipeseng en pwihn riau kan, pali en lamalam, uhpene, pingiping en pohn ahl akan, lingeringer, oh pali en dipwisou en nan wehwe ah kaposeke-da—koaros mehn mahso oh met kin sohpai pingiping en tihak oh koait.

Ih kapingki, neitail pwutak oh serepein pwulopwul kan arail kin patehng ansou en Koudek-pohn-Nahna: iei seminary, tiepene lap en Ohng Kakehlepen me Pwulopwul kan, oh Kohdo, Idawehn Ie. Irail pil kin alehdi songen luhk ohte sang rehn Kauno: iei en mweidohng arail marain en lingan mwohn mehteikan, en rapahki me pwung itarete nan ansou en apwal,oh en poakohng arail imwintihti kan.

Irail pil kin alehdi mahsen mwahu kan sang rehn irail soukohp akan en Kapwurupwurdohu: “Anahnepen soun kameleilei.” Sapwungki ni sohte udahn sapwungki. Weliankihdi uhpene oh pohnmwahsoki mahk oh limpoak. Kawada piris en ehupene oh wehwepene, kaidehn dihd en kadeik de sohte ehupene. Oh songen inou ohte: “Kapai ong irail soun kameleilei kan: pwe irail pahn kadaniki seri en Koht.”

Mongiong kan en mwehi kapw wet audaudkidahr ki kadehde en Sises Krais oh kopworopwor pwehki dahme pahn kohdo mwowe kan. Ahpw irail pil kin peidengki, “I kak wiahla emen soun kameleilei ansou me sampah pahn mwoarongada, ai mongiong et audauhdkihda masepwehk oh meleilei mwomwen doh douluhl?”

Pasapengpe pil duduwehte me ehng! Kitail kin alehda mahsen en Sounkomour o: “I kihong kumwail popohl, pein ei popohl me I kihong kumwail. … Kumwail dehr mweidong amwail mwongiong en nsensuwed, de pil masepwehk.”

Rahnwet, kosonehdi meleilei kin tapida sang wasa me mengei—nan mongiong kan. Mwuri nan wasahn kouson kan oh peneinei kan. Ni atail kin kasukuhl ki wasao, kosonehdi meleilei kin kohpeseng rehn mehn impatail kan oh wasahn kouson kan.

Kitail medewe mahs wasa siluh wet wasa me Souleng en nan-ansou-et kin wiahda ie meleilei.

Keieu o mihmi nan atail mongiong kan. Mwoakid sansal en doadoahk en Krais kasalehda mwomwen seri kan arail karanihla Ih. Wasao mie mehn kadehde. Kilekilang nan mongiong mwakelekel en soun kameleilei en seri men kak wia mehkot kapwuriamwei ehu ong atail mongiong kan. Iet mwomwen seri en praimeri kan ahr sapeng “Ia mwomwen soun kameleilei men?”

Ih ehukiwei arail pasapeng kan sang nan arail mongiong kan! Luke kosoia, “Sewese mehtei kan ansou koaros.” Grace ehukiwei duwen kesempwal en mahkong emen emen, mendahte ma irail me sapwung. Anna Kosoia, “I kilangada emen me sohte mwadong ong emen, eri ngehi kohla mwadong ong.” Lindy medewehda me soun kameleilei emen kin sewese mehteikan. “Eri kowe wie kadkadaurete kohla. E pahn wie kokohlate mwowe.” Liam kosoia, “Ke dehr lemei ong aramas akan, mendahte ma irail lemei ong uhk.” Landon kosoia, “Ma emen kapailokeiuk de lemei ong uhk, ke pahn kosoia, ‘Menlau uhdi.’” Trevor kasawiadahr, “Ma dohnas ehute luhwe eri kowe men ale, ke pahn ehukiong mehteikan.”

Pasapeng kan en seri kan wia mehn kadehde ehu me kitail koaros ipwikihdi pwukoah ehu me iei kitail en mwahu ong oh sewese mehtei kan. Rongamwahu en Sises Krais apwalih oh kihpene doadoahk pwukat, me iangahki soun kameleilei, ong nan atail mongiong kan, kapai kitail da nan mour wet oh pil nan mour teio.

Keriau, kakehlailih soun kameleilei nan ihmwatail sang ni doadoahngki Sapwelimen Kauno karasaras en ehupeneh en emen emen: kangongehki, lokolok-reirei, mwahu, kadek, aktikitik, oh limpok en karakarahk.

Mie soai pwoarda me kasalehda duwen peneinei ehu wiahkihla doadoahk en soun kameleilei pwukoahn peneinei ehu, oh doadoahngki.

Seri en nan peneinei wet kin ahneki kahpwal en ehu ong irail akan me laud pwehki sang ni arail kin kalapw koansop de lipwoar, kin medewe me irail me kesempwal, oh kin kosoi sohte mwahu. Seri kan, kin medekla oh kin insensuwedla, tapiadahr medewe ma ihte ahl en mwo me re kilekilang oh ma irail en kadkadaurete songen mwohmw-lemei wet.

Ehu soutik peneinei o kosoiapene duwen mwohmw oh mwomwen ah doadoahk ehr nan arail peneinei. Eri madamadau ehu pwoarda—kaidehn ire ehu, ahpw irail en koadoahke.

Kaidehn kapwur lokaia de uhwong me pahn wiawi, ahpw seri ko anahne wia mehkot me sohte koasikpe, irail pahn sapeng ni ngihl mwahu. Kaidehn te ni mwahu, ahpw anahne ni keneinei, sang nan mongiong ngihl mwahu en kohsang loale oh madamadau en sawas kan, sohte katepen ma arail wiewiawi ong uhk sohte mwahu nin tapio, Koaros pwungkipenehr en ehute tepida, mwurin arail pahn wiahda pwihn oh kosoiapene,

Ekei irail tepite pweiokla, ahpw irail kosonehdi me irail pahn pilahneda sang nan arail mongiong kan.

Dahme wiawi mwuhr wia mehkot kapwuriamwei ehu.

Mwomwerail en mahso tapidahr sohrala. Sirei weliandahr koansop. Me laud kan, mahso kin sohte ehupeneh, tapidahr pil wekila. Seri kan, kalowehdier arail pilipil kan oh kohwei ni limpoak, diarada popohl nan wekila wet. Wekila wet me inenen kapwuriamwei me kahreda kosondi en tuhpene en tehk-sapahl sohte anahne wiawi. Kadek wiaier ah doadoahk ni meleilei.

Nan ansou kan, ehupene ni mehlel en peneinei wet tapidahr, kak sewesehda koaros. Pwe en wia soun kameleilei kei, kitail kin mahkong mehtei kan oh kin kakelailih mehtei kan sang atail pahn kih irail di.

Kesiluh, soun kameleilei nan atail wasahn kouson kan. Nan pahr apwal en Mahwin en Sampah II, Elder John A. Widstoe padahngki: “Ihte ahl en kawada wasahn kouson meleilei ehu iei en kakelailihda ohl oh lih me kin limpokpene oh soun apwliala meleilei. Emen emen aramas, sang ni mahsen kesempwal akan en Krais … kolokol nan lime meleilei en sampah [pwon].”

Soai me pahn kohdo mwuhr et kasalehda mwekid wet.

Sounpar kei samwalahro, ohl riemen—emen Muslim ah emen pastor en Christian men sang Nigeria—uhpene nan ara palien lamalam kan. Emen emen ahnekida kahpwal laud. Ahpw iet, sang ni manaman en mahk, ira pilada irahn alu nan ahl ehute.

Imam Muhammad Ashafa oh Pastor James Wuye wiahla kompani ehu oh ehupeneh ni meleilei. Ira koaros kawadahr poahson en ara palien lamalam kan. Ira met kin padahkiong emen emen duwen weliankihdi kalohk ki kopworopwor. Ni ahr wia pilipilda pak riau ong Nobel Peace Prize, re pil iang towehla Commonwealth Peace Prize.

Imwintihti en mahs riemen et ansouet wie seiseilokpene kawkawada dahme ohla, kadkadehdeki me Sapwelimen Sounkomouro luhk en wia soun kameleilei kei kaidehn te e kak wiawi—e manaman.

Ansou me kitail kin esehda lingan en Koht, eri kitail “sohte pahn ahneki madamadau en kamedekihla mehteio, ahpw en momouriki meleilei.” Nan atail mwomwodiso oh nan atail wasahn kouson kan, kitail pilada en kilang emen emen nin duwen Sapwelimen Koht seri kei.

Ni oralap, Ih luke iuk. Soun kameleilei anahne mwekid—dahieu mwo, ong emen emen, tepida lakapw? Ke pahn kak wia pak ehu-nan wihk, ire-siluh pilahn en wia soun kameleilei men?

1. Wasahn kouson me sohte-uhpene kin wiawi: Ansou me uhpene pahn tepida, pweiokla oh pwurehng ki lokaia mwahu oh kadek.

2. Kawadahr piris en digital: Mwohn omw pahn kihda, sapeng, de kosoi online, peidek ma, “E pahn kawada piriso? Ma soh, uhdi. Ke dehr kadar. Ahpw, ehukiwei dahme mwahu. Kawada meleilei wasa ehu me kailok mie.

3. Kamwahuehla oh ehupeneh: Emen emen kisehn peneinei kak rapahki duwen ehupeneh pwe kehn kak pekimahk, sawas, kamwahuehla, oh pwurehng ehupeneh.

Sounpwong depe kei mwurin I kehnda duwen pepehm kaselel me I aledier sang padahk wet: “Kapaiada Irail Soun Kameleilei kan.” Ni kaimwsekila, I kak ehukiwei pepehm kapwuriamwei kan me kohiong ie nan ansou pwukat.

Soun kameleilei wia mwekid en Krais ehu. Soun kameleilei kan kin ekei pak kahdaneki weid de luwet—sang pali kan koaros. Ahpw, pwehn wia soun kameleilei men kaidehn kehn luwet, ahpw kehn kehlail ni mwohmw ehu me sampah kak sohte wewehki. Soun kameleilei anahne kehlail oh tengeteng ahpw e sohte anahne tohnmeteikihla mehkot kesempwal. Soun kameleilei iei en kahluwawei ni mongiong mwakelekel, ah kaidehn me samin. En kin ehu ong emen emen ki itipeh kan, ah kaidehn sohte men kin itipeh. Soun kameleilei kaidehn mehkot kapw ehu, de sohte kin mih rehn soun repwoht kan. Sises Krais pein padahngki, nan Pwuhk Sarawi oh Pwuhken Mormon koaros. Soun kameleilei kin padahk sangete soukohp-en rahn pwukat sangete ni tepin Kapwurupwurdohu pil leledo rahn pwukat.

Kitail kin kapwaiada atail pwukoah nin duwen seri en Samatail Nanleng ni atail kin nantihlahte mwowe oh wia soun kameleilei kei. I kadehde Sises Krais, me wia Iehros en Meleilei, Iehros en Koht ieias, ni mwaren Sises Krais, amen.