Kalohk en Peneinei—Mahsen kan sang rehn Koht

Kapokon lap en Oakotohpe 2025 wet wia ketemen pen sounpar silihsek en pakairdahn “Peneinei: Kalohk Kesempwal Ehu Ong Sampah.” Sang ni koasoandi en Kauno, kalohk kesempwal wet iangahki mahsen en kokohp kan, wiawidahr pwe en “kolokol oh kakehlailih peneinei nin duwen eh wia pwihn poahsoan en wehi.”

Aramas koaros mie arail peneinei, mendahte ma ke wia nohno men, pahpa men, nein emen serepein, nein emen pwutak, nein emen kahlap seri, pahpa oh nohno kahlap men, emen me pahn nohno kinuhk, emen me pahn pahpa kinihk, pirian pwutak men, pirian serepein men, de emen me pahn rianiki. Me keieu kesempwal, emenemen kitail, nin duwen kalohko koasoia,“iei seri pwutak de serepein ngehn keneinei en pahpa nohno nanleng … [oh] ahniki mwohmw sarawi oh mour en ehu rahn me koasoandi sarwai.”

Ansou me I lukuwerdahr ohng doadoahk sarawi en wahnpoaron nan pahr 2015 [riekid eisek limau], mie kaweid kohieng ie, “Ansouet kalohk kesempwal wet wialahr ahmw. Edomwen [ulahngehr mahsen akan ‘Pwihn en Wahnparon Ehk Riemeno’ ni daidel] mih wasaht. Kehnda oh padahngki me duwehte pein ahmw.”

I poakohng kalohk en peneineio. I kadehdeseli pohn sampah sang Africa lel Australia oh wasa koaros nan pwunge duwen kesempwalpen peneinei ni koasoandi poatopoat en Koht. Kalohk kesempwal wet tepsang rehn Koht, eri kitail pahn apwalihki wahu mahsen pwukat duwehte mahsen sang rehn Koht.

Tamataman riei ohl oh lih akan, ni ahi koasoiahier nan tiepene lap samwalahr sang wasahn padahk wet, “Mahsen kan kesempwal.”

I pahn kihong kumwail ekei kasalepen padahk kesempwal akan duwen kalohk kesempwal wet me kitail kin kamehlele.

Nan pahr 1994 [kid duwopwiki eisek pahieu], sounpar ehu mwohn kalohk kesempwal wet ah kohda, Pwihn en Wahnpoaron Ehk Riemeno mahmahsanih duwen pwihn en aramas oh koapworment akan arail kikihsangehr sapwellimen Koht kosonned akan en peneinei, pwopwoud, oh mwomwen ohl de lih. “Ahpw kaidehn dahme ihmwilahar me se kilang met,” Preseden Russell M. Nelson ahpw kawewehda met. “Se kak kilang nannanti kan en soangosoangen pwihn kei en kasohrala kosonned akan oh mwekid kan me pid tupenehn paliwar. Kitail kilangehr sawehwe me kapingadahr mwomwen ohl oh lih akan. Kitail kak kilang soahng pwukat kokohdo.”

Ehkriemeno koasoanedier en wihda kisin likou manaman ehu, kalohk kesempwal ehu,me pahn pid en Mwomwohdiso koasoandi en peneinei. Nan pahro, Wahnpoaron pwukat, sounkaudiahl me malipilipda sang rehn Koht, kaunopadahr kisin likou ehu me pid peneinei. Preseden Dallin H. Oaks kasalehda me irail anahne sohpeilahng Kauno ong ni “dahme [irail] pahn koasoia oh ia mwomwen [arail] pahn koasoaiahwei.” Irail kasalehiongehr Presedensi Keieu—Preseden kan Howard W. Hunter, Gordon B. Hinckley oh Thomas S. Monson—ong arail madamadau.

Sounpwong kei mwuri, nan Mahs 1995 [kid duwopwiki duweisek limau], Preseden Hunter mehla oh Preseden Hinckley wiahla Preseden 15 [ke ehklimen] en Mwomwohdiso. Kalohk kesempwalo mihmiier nan pehkan. Iahd me pahn wia ansou mwahu en wia kalohk wet ohng Mwomwohdiso? Mwurin sounpwung wenou ansouo ahpw leledo.

Rahn kei mwohn Septempe 23 mihting en lih nan kapokonlap, Preseden Hinckley oh nah sounsawas kan tuhpene rehn Presedesi Lap en Pwihn en Lih. Riatail lih oko, duwehte Wahnpoaron kan, irail pil ahneki madamadau toutou duwen lih akan oh peneinei kan. Irail kilkilenglahngete mihting kohkodohu duwen peneinei kan.

Preseden Hinckley koasoanehdi en kasalehda ni ansou me lih akan pahn kohpene. E medemedewe mwahu dahme e pahn koasoia mwohn ah padahko. Ansou me irail koasokosoia met, e kihong eden kisin likou wet me saik sansalohng koaros “Peneinei: Kalohk Ehu Ohng Sampah.” Mihting en lih wet ansou keieu mwahu en koasoanehdi oh wiahda audepen kisinlikou wet duwen peneinei?

Preseden Lap en Pwihn en Lih Elaine Jack ahpw mwuhr kawehwehdahr: “Se sehse dahme audepen kalohk kesempwal wet me pid peneinei ni ansouo. … [S]e kak ese sang ni daidelo, ahpw se pehm me soahng koaros pid peneinei … pahn mia mehkot mwahu. … I ahniki pepehm mwahu me tohn Pwihn en Wahnpoaron Ehkriemen ko kin alialehdi kaudiahl.”

Mihting en Pwihn en Lih me wiawi Rahnkaunopo miher nan poadopoad. Preseden Hinckley kapehsehki kalohk en peneineio mahsen kesempwal pwukat: “Ni soahng tohto me sapwung kin wekdekiong dene ihme me pwung, ki soahng tohto mehn kesehdi aramas me iahngki kosonned kan oh kamwahupehkan, ki soahng tohto mehn kainangih kitail en wiahda soahng suwed me sampah kin kihong kitail, se ahniki pepehm en keperki oh pil kepkeperki … kosonned kan, padahk kan, oh kaikaiahniki soahng kan me pid peneinei me irail soukohp kan, soun kairoir kan, oh sounkaudiahl kan en Mwomwohdiso wet me kin kopwurpwurieng sangehr mahso.”

E ahpw ketin wadekada soahng koaros me mihmi nan kalohk kesempwal wet. Ni duwen Kauno ketin masanihier, “Mendahte ma sang ni ngilei de ngilen nei sounpapah kan, e duwepenehte.”

Kalohk kesempwal wet me iangahki, “Peneinei koasoandihsang Koht.” I pwungki sansalpen ire wet. Kalohk kesempwal wet kohieng kitail pwe kitail en momourki mour mwakelekel ni kitail medemedewe duwen kepikipik sarawi me mihmi loalatail oh mour poatopoat me mihmi mwohtail. Preseden Nelson padahngkier, “Kumwail udahn wia sapwellimen Koht seri ni pali ngehn. … Kedeh wiahki me e sapwung: Ohmw nantieng inenen kesemwpal. Ni ahmw raparapahki mehlel, Kauno pahn ketkiong uhk kasansal kan en ihs me ke pahn wiahla.”

Ansou me e kasansaldahr, kalohk kesempwal wet sohte kainenehla kamehlel kan en aramas tohto nan sampah. Kaidehn ni ansouo. Kaidehn ansou wet. Mie ekei me sohte pwungki irehkan me pid peneinei, pwopwoud, oh mwomwen lih oh ohl. Ekei nda me Mwomwohdiso en kihsang, wekidala, de pwilikihdi kalohk kesempwal wet.

Kalohk kesempwal en peneinei wet iei, ni Preseden Hinckley mahsanih, padahk mehlel, riei ohl oh lih akan. Padahngkan sohte mih liki ahpw e mih pahrekiong pwung akan en Kauno oh Sapwellime ahl en inou. Padahk kan en kalohk kesempwal wet kasansalda sang rehn Kaun Sises Krais ong Sapwellime Wahnparon kan sang ni ansouo oh leledohr met. Sapwellime Mwomwohdiso met; E ketin koasoanehdi mehlel pwukat pwe kitail en momourki.

Ekei kumwail pahn kilang kalohk kesempwal wet oh nda, “Met e sohte doadoahk rehi.” “E mwomwen sohte katepe.” “Ahi peneinei sohte duwehte met.” “I sohte itarohng wia met.”

Ong kumwail kan me mie amwail kapwunod, ese me ke wia seri en pahpa oh nohno nanleng kan, kisehn peneinei en Semomw Nanleng. Sohte emen ese ihs kowe ni mehlel de kesempwalkin uhk laudsang Ih. Sohpeilahng Ih; kasalehiong Ih audepen mohngiongomw; likih Ih oh Sapwellime inou kan. Ahmw peneinei mihmi rehn ahmw Sounkomour, Sises Krais, me kin ketin poakohng uhk. E ketdo sampah pwe en tomwkihla dipatail kan oh en wahda atail mehn wisik toutou en atail sapwung kan oh rahn apwal akan. E mwangih dahme ke sosohpai oh dahme ke pepehm. Sohpeilahng Ih; likih me E pahn ketin kadaredohng uhk Ngehn Sarawi en ieiang uhk, pwokuhkada, oh kaweid uhk. Pehm Ahr limpoak me “e ketin kihong nan mohngiong en aramas akan; … me keieu anahnepe nan soahng koaros … oh me keieu kaperen ong palingehn.”

Sapwellimen Kauno Wahnpoaron koaros poakohng kumwail mehlel. Se kin kapakap kin kumwail oh rapahki kaweidpamwail sang rehn Kauno. Mihmi reht. Kumwail mihmi nan ansou en kasongsong me tepelo kin raparapahki dahme e pahn wia pwe en nainkinkumwaila. Kumwail dehr pwangada. Oh ma kumwail pwangada, pwurodo. Se onopada en sewesei kumwail, pil duwehte mehteikan me poakohng kumwail.

Kalohk kesempwalo masanih, “Pahpa nohno kan ahniki pwukoa sarwai en apwaliada neira serihkan ni limpoak oh mour pwung.” Pwuhken Mormon kihda kadehde keriau ong ire mehlel pwoatet. Ni ire tikitik keieu en iralaud keieu, kitail wadek, “Ngehi, Nipahi, ipwidisangehr nohno oh pahpa mwahu.” Meh depe kitail me tapiadahr Pwuhken Mormon—oh pil pwurehng tapiada oh pil pwurehng—oh mwuri mahsen kan katengtengdiongehr nan atail mehn ketemen? Katengediong mohngiongomw.

Ire me I keieu mwahuki nan kalohk kesempwalo iei met: “Peren nan mour en peneinei kin keieu kak pweida ni eh poahsoankihda padahk kan en … Sises Krais.”

Ihs me men sohte peren?

Oh dahme padahk kan en Sises Krais? Pwurehng, ni kalohk kesempwalo: “Pwoson, kapakap, koluhla, mahk, waun, limpoak, tetehk mehteikan, doadoahk, oh kemwekid kemweit mwahu kan.”

Ahn ihs mour me sohte pahn mwahukihla ma irail pahn alasang ire mehlel pwukat? Sohte emen kitail me kak wia ni unsek; ahpw kitail kak idawehn mahsen en kaweid kamarain sang Preseden Hinckley, “Wia uhwen omw kak koaros.”

Kitail wadek nan kalohk kesempwalo, “Pahpa kan pahn kin kaunda arail peneinei kan ni limpoak oh mour pwung,” oh “nohno kan pwukoahki keieu en apwalih keirdahn neirail serihkan.” Kaunda sohte wehweki kaun soahng koaros, oh apwalih sohte wewehki me keriau en pwukoah. Koht ketkiong ohl oh lih en wekpeseng ahpw pahrek oh udahn kesempwal ahr pwukoah koaros me kin sawaspene.

Mweidohngie en ehukiong kumwail pein ahi soai.

Ahi pwoud oh ngehi esehla duwen aht pahn doadoahkpene mwahu mwurin ehu rahn me I wiahda pilipil kesempwal ehu oh I sohte wewehiong ih. Ahi wihwiahu kapwuriamweiada ei pwoud, pwe e sohte onopada, me kihong ih nan kahpwal en madamadau. Mwurin mwo, e ahpw pwilikihdi pehkau pohn pwopwoiet oh nda, “Ron, menlau, ke dehpa pwurehng wiaiongie met.” Kiht koaros mihmi ni madamadau ohte sang ansouo kohdo.

Kitail diar nan kalohk en peneineio: “Pahpa kan oh nohno kan ahniki pwukoa en sewese emenemen ni duwen werek pahrek.”

Pahrek wia mahsen ehu me kesempwal. Mwurin sounpar kei, Sister Rasband oh ngehi kin doadoahkpene ni duwen dahme kalohk kesempwal kawehwe aht “pwukoa sarawih [kan],” se kamwahuiala, kapahrekiala, oh katengedi aht pwopwoud. Ni emenemen nait serihkan pwopwoudahr, ngehi oh Sister Rasband kin doulahte kaweidkin irail oh arail pwoud kan mwomwen arail pahn ehupene ni pahrek.

Ni aht kin kilkilengwohte lingan en Koht, se kin wauneki emen emen oh utung emen emen. Kemwekid sarawi en soahng pwung kan kin kaweid oh katengehdi ahn emen emen atail mour kan, atail peneinei kan, oh atail kousahpw kan.

Samatail Nanleng ketkihdo kalohk kesempwal en peneinei pwe en kaweid kitail ong imwatailo Reh, oh seweseikitail en esehla oh audaudkihda limpoak, kakehlail, kahrepe, esehla me mehlelo. Ni palingeni koaros, I peki kumwail en karanih Ih oh Sapwellime Iehros Kempoakehu. I inoukiong kumwail me ni awail pahn wia met, Ngehn Sarawio pahn kaingangih oh kaweid kumwail oh sewesei kumwail en kehn nan mohngiongomwail kan Ahr inou en meleilei me “laudsang uwen atail dehdehki.” Ni mwaren Sises Krais, ahmen.