Kuchagua Hekalu

Hekalu lililo karibu nami linapatikana katika kisiwa kingine. Ili kufika huko, lazima tupande ndege kwa dakika 45 au safari ya boti ya masaa 12. Sikuwahi kwenda hekaluni hapo awali, na katika mwaka wangu wa mwisho wa shule, mama yangu aliweka mipango kwa ajili yetu kwenda. Alikuwa ameweka akiba ya pesa kwa mwaka mmoja ili familia yangu iweze kwenda pamoja.

Kwa bahati mbaya, tungerudi nyumbani baada ya shule kuanza, jambo ambalo lilinitia wasiwasi. Ilikuwa muhimu daima kwangu kuwa na wastani mzuri wa daraja (GPA) shuleni ili niweze kupokea udhamini wa chuo. Nilifikiria kutokwenda hekaluni, kwa sababu kutokuwepo kwangu shule kungeweza kudhuru GPA yangu ya mwisho. Kisha mama yangu akasema, “Kwa nini usisali na kuomba msaada wa Bwana?”

Nilisita kidogo kwa sababu nilikuwa na hofu, lakini niliamua kusali. Baba wa Mbinguni aliniongoza, na nilichagua kwenda hekaluni. Kwa wiki nzima tuliyokuwepo huko, tulikwenda hekaluni kila siku. Ilikuwa ya kustaajabisha! Kufanya ubatizo ilikuwa ni uzoefu wa kupendeza; Niliweza kumhisi Roho kwa nguvu sana.

Mwishowe, niliweza kumaliza shule nikiwa na GPA nzuri. Kudumisha uhusiano wa karibu na Mwokozi kulinisaidia kuwa na tumaini wakati huo. Nilijua Alikuwa pamoja nami, akinipa nguvu. Bwana anafahamu juhudi zetu, na tunapoweka mambo mikononi Mwake, tunaweza kuamini kwamba kila kitu kitakuwa sawa.

Nina shukrani kwamba dada yangu alikuwa na ujasiri wa kuwaalika wamisionari nyumbani kwetu. Yeye na mimi tulikuwa wa kwanza katika familia yetu kubatizwa—nilikuwa na umri wa miaka 13 na yeye alikuwa na miaka 15. Ninajua mimi ni mtoto mpendwa wa Baba yetu wa Mbinguni. Baba yangu wa duniani hakuwahi kuwepo katika maisha yangu, lakini inanisaidia kujua kwamba tunaye Baba wa Mbinguni na kwamba nimeumbwa kwa mfano Wake. Ninahisi upendo Wake kwangu; Ninajua kwamba katika nyakati ngumu sana, Yeye yuko kando yangu.