Faasoa Atu o le Tala Fiafia

I se tasi Aso Sa susulu o le Eseta, sa alapo ai Ryan ma tamoe atu i le umukuka. Sa mafai ona ia sosogia le popo ma mea faamanogi mai le mahamri na faatoa uma ona fai e Tina. Sa u e Ryan se tasi o tonati tafatolu mafanafana. “Tina! O le Eseta! E mafai ona tatou matamata i le ata tifaga o Iesu nei?” sa ia fesili atu ai ma se ataata lapoa.

Sa tepa atu Tina ia te ia ma se ataata. “Ioe!”

O le uso laitiiti o Ryan, o Liam, sa tamoe i fafo a o saofafai i lalo Tina ma Ryan e matamata le tifaga.

Sa la vaai ia Iesu Keriso o faia vavega ma auauna atu i tagata. Ma ina ua faatiga tagata ia Iesu, sa maligi loimata o Ryan.

“Tina, aisea na latou faia ai lena mea ia Iesu?” sa ia fesili atu ai ma le faanoanoa.

“Sa Ia filifili e puapuagatia mo i tatou,” o le tala lea a Tina. “E alofa tele o ia ia i tatou, Ryan. Na maliu o Ia ina ia mafai ona tatou toe ola.”

Ina ua faaali mai e le ata tifaga le Toetu o Iesu Keriso, sa ataata Ryan. “Vaai, Tina! Ua toe ola mai o ia!”

“Sa’o lelei,” na fai atu ai Tina. “Ua toetu o Ia! E pei lava ona fai mai ai le agelu i le Tusi Paia.”

Mulimuli ane, sa alu Ryan i fafo e taalo. Sa ia vaaia Liam o loo taalo i fasilaau i lalo o le mago.

“Liam! Ou te fia faamatala atu ia te oe se tala manaia,” o le tala lea a Ryan.

Sa faatalitali Liam a o nofo ifo Ryan i lalo o le mago. “E faatatau i taavale?”

“Leai. E sili atu!” Na fai atu ai Ryan. “E faatatau ia Iesu. Na maliu o Ia, ae na toe ola mai.”

“E mo’i?” O le fesili lea a Liam.

“Ioe! Na fai mai le agelu, “E le o iinei o Ia, a ua toetu!” O lona uiga e mafai foi ona tatou toe ola.”

“Oka!” Na fai atu ai Liam. “E malosi mo’i a Iesu Keriso.”

Na lue atu le ulu o Ryan. Sa ia mafaufau i le tele o le alofa o Iesu Keriso ia te ia. Sa lagona ai le tumu ma le fiafia o lona loto. Sa ia faasoa atu le tala fiafia i lona aiga, ma o lena mea na atili faapitoa ai lana Eseta.

Tatala le PDF

Ata na tusia e Margarida Esteves. E mafai ona kopiina mo na o le faaaogaina e le Ekalesia.