Auā Ua Faapea Lava Ona Alofa Mai le Atua i le Lalolagi

E alofa tele le Tama Faalelagi ia i tatou uma na Ia auina mai ai Lona Alo, o Iesu Keriso, e fesoasoani ia i tatou e toe foi atu ia te Ia.

Sa silafia e Iesu o le a i ai taimi i o tatou olaga o le a tatou lagona ai le faanoanoa, tiga, ma le tuuatoatasi. O le a tatou faia ni mea sese ma e oo lava i le fefefe i nisi taimi. I le Faatoaga o Ketesemane, sa filifili ai Iesu Keriso e lagonaina na mea uma ina ia mafai ai ona Ia malamalama ma fesoasoani atoatoa ia i tatou. Sa Ia totogiina foi a tatou agasala ina ia mafai ai ona tatou salamo. (Tagai i le Alema 7:11–13.)

Sa silafia foi e Iesu a oo mai le taimi, o le a tatou feoti uma lava. O le oti o se vaega natura ma masani o le olaga. Ae sa lei finagalo le Atua e avea le oti ma iuga o la tatou tala. Ona sa tuuina mai e Iesu Keriso Lona soifua ma sa toetu, o le a tatou toe ola uma foi. O le mafuaaga lena na Ia filifili ai e maliu mo i tatou.

Tatou te ta’ua le mea na faia e le Faaola o le Togiola a Iesu Keriso. Sa faia lenei meaalofa paia mo i tatou i le alofa. Ia manatua, ua alofa tele le Atua i le lalolagi na Ia aumai ai lona Alo Pele e Toatasi (tagai i le Ioane 3:16). Ma sa alofa tele Iesu ia i tatou na Ia ofoina mai ai Lona soifua ina ia mafai ai ona tatou toe foi atu e mau faatasi ma le Atua.