Vaiaso Paiaa Mia

Sa faitau e Tinā ma Tamā le tala i le Aso Sa o le Pama i tusitusiga paia. Ina ua afio atu Iesu Keriso i Ierusalema, sa talotalo atu e tagata ia lala pama ma alalaga, “Osana!”

Sa uuina e lo’u tuafafine o Lusi se ata o Iesu o loo tietie i se asini. O isi o i matou uma sa talotalo atu a matou lālālaau pepa. Sa ou lagonaina le fiafia i lo’u mafaufau sa ou faafeiloaia Iesu.

Sa lē fiafia Iesu ona sa faatau atu e tagata mea i totonu o le malumalu, o lea na Ia togiina ai na mea i fafo. Sa matou pikiina lapisi mai pupulaau faataamilo i le falesa. Ua ou fiafia ua mafai ona matou fesoasoani e tausia le maota o le Atua!

Sa faitau e Tinā tala na ta’u atu e Iesu Keriso i tagata. Sa matou faalogologo ma faaaoga le omea e fai ai ni mea mai tala. Sa faia e Lusi se mamoe ona o Iesu o le Leoleo Mamoe Lelei. Sa ou faia se tama’i lamepa suau’u. Sa fesoasoani ia te au e manatua le tumu o lo’u loto i le faatuatua.

Sa ta’u mai e Tamā ia i matou le ala na avatu ai e Maria ia Iesu Keriso se suau’u faapitoa mo Ona vae. O lona manogi na faatumulia ai le fale atoa.

Matou te le’i mauaina lenei suau’u faapitoa. Nai lo lena, sa matou faaaogaina le tinamoni e fai ai se meaai manaia. Fai mai Tinā ina ua matou sosogiina le tinamoni a o taoina le meaai, e tatau ona matou mafaufau i mea e mafai ona matou avatu ia Iesu.

Sa matou faamumuina moligao ma usu se pese, e pei lava ona pepese Iesu Keriso ma Ona soo i le Talisuaga Mulimuli. Sa matou aai i le falaoa pita ma inu le vai vine e manatua ai le faamanatuga muamua. Sa i ai foi a matou pomegranates e faamanatu mai ai ia i matou le toto o Iesu, ma olive mo le faatoaga o Ketesemane.

A o matou aai, sa pāpā faititili i fafo. Sa ou lagona le saogalemu ma le faafetai i le iloaina ua uma ona feagai Iesu ma le afā aupito pogisa.

Sa matou faitau e uiga i le ala na maliu ai Iesu Keriso mo i tatou. Ona matou aveina lea o le apa toto laau avanoa, ma faataatia faaautafa, e pei o se tuugamau. Sa matou tuuina iai palapala ma maa faataamilo ae tuu i le gutu e lē ufiufiina. Na tuuina mai e Tinā ia i matou se faatagata e faatusa i le tino o Iesu. Sa matou afifiina ma le migao i se ie paepae ma tuu i totonu o le apa toto laau.

E ui lava sa na o se apa toto laau, ae sa ou lagona lava le faanoanoa i le ufiufiina o le faitotoa i se maa.

Fai mai Tinā ina ua mavae le maliu o Iesu Keriso, sa Ia amataina le galuega faafaifeautalai i le lalolagi o agaga. O lena auala e mafai ai e tagata e le’i aoaoina Lana talalelei i le lalolagi ona aoao pea e uiga ia te Ia. I totonu o malumalu, e mafai ona papatisoina i tatou mo tagata e le’i papatisoina a o le’i maliliu.

E le’i lava lo ma matutua ma Lusi e o ai i totonu o le malumalu, ae sa ma fesoasoani e oti ese kata o igoa na lolomiina. Sa feauauai Tinā ma Tamā i le faia o galuega faalemalumalu mo tagata i luga o kata ma savavali faataamilo i le lotoa faatasi ma i maua. E oo lava i fafo, sa lagonaina sina lagona e faapei o le lagi le malumalu.

I le taeao o le Eseta sa leai se maa i luma o le apa toto laau ma ua avanoa le ie. Sa i ai se kata na faapea mai, Ua toetu o Ia!

Ua uma ona ou iloa o Iesu Keriso o le mafuaaga lea o le Eseta. Ina ua uma ona faamanatuina le Vaiaso Paia, ua ou lagona e pei ua ou iloa atili foi o Ia.