“O Le Fuafuaga Matagofie,” Uo, Mat. 2026, 4–7.

O Le Fuafuaga Matagofie

Ae tatou te lei o mai i le lalolagi, sa i ai se fuafuaga matagofie a le Tama Faalelagi mo i tatou. O le a tatou fananau mai ma aoao ma tuputupu ae i le lalolagi. E mafai ona tatou mulimuli i Lana ala o feagaiga ma faia filifiliga lelei.

Na silafia e le Tama Faalelagi o le a tatou manaomia se fesoasoani. Sa Ia silafia o le a tatou faia filifiliga leaga ma agasala i nisi taimi. E le mafai ona tatou toe foi atu ia te Ia pe afai tatou te le mamā.

Sa tatou manaomia se tasi faapitoa e fesoasoani ia i tatou ia mamā mai a tatou agasala. O Iesu o le Alo ulumatua agaga a le Tamā Faalelagi. Sa Ia ofo mai e sau i le lalolagi ma laveai i tatou mai a tatou agasala.

Atatusi o le Au Makoi o loo mulimuli i le fetu o le Kerisimasi i kamela

Mo le faitau selau o tausaga, sa faatalitali ai tagata mo le fanau mai o Iesu. Mulimuli ane, sa susulu mai se fetu fou i le lagi e ta’u atu ai i le lalolagi ua afio mai le Faaola.

Ina ua matua Iesu, sa Ia aoao atu i tagata le talalelei. Sa agalelei ma alofa o Ia. Sa Ia faamanuiaina tamaiti.

Atatusi o le Faaola o loo faamaloloina se teineitiiti ma’i o loo taoto i le moega

Sa Ia aoao mai e tatau ona tatou mulimuli ia te Ia ma faia isi e pei ona Ia faia. Sa Ia faamaloloina tagata na mamai. Sa Ia toe aumaia tagata i le ola o e na maliliu.

Atatusi o Iesu Keriso o loo tatalo i Ketesemane

Sa silafia e Iesu ua oo i le taimi mo Lana vavega silisili. Sa alu o Ia i le Faatoaga o Ketesemane ma tatalo ai. Sa Ia lagonaina le tiga o a tatou agasala ma o tatou faanoanoa ma maʻi.

Atatusi o Iesu Keriso i luga o le satauro

O nisi tagata sa feita ia Iesu. Sa latou le fiafia i mea sa Ia aoao atu ma sa lei talitonu o Ia o le Alo o le Atua. Sa pu’e faapagota Iesu ma tu’itu’i i se satauro, lea na Ia maliu ai.

O se vaega o tagata faanoanoa na saunia le tino o Iesu i le tuugamau

Sa faanoanoa tele uo a Iesu. Sa latou faataoto Lona tino i totonu o se tuugamau ma faataavale atu se maa tele i luma o le faitotoa.

E tolu aso mulimuli ane, ae o atu nisi o tamaitai i le tuugamau. Na fuli ese le maa ma sa gaogao le tuugamau! Sa amata ona tagi Maria le Makatala ona ua leai se tino o Iesu. Sa fesili atu se alii agalelei na lata ane ia te ia pe aisea ua tagi ai. Ina ua ia ta’u atu ia te ia, sa ia valaau atu ia te ia i lona igoa. Sa tilotilo atu o ia ia te Ia ma iloa ai o Ia o Iesu! Ua toe ola o Ia!

Atatusi o le Faaola toetu o loo faaali atu ia Maria le Makatala

I le Eseta tatou te faamanatuina ai mea na faia e Iesu Keriso mo i tatou. Ona sa puapuagatia o Ia mo i tatou, e mafai ona tatou salamo ma ia mama. Ona sa toetu o Ia, o le a toetutu foi i tatou! Ona o Ia, ua mafai ai ona tatou toe foi atu i lo tatou Tama Faalelagi ma faatasi ai ma o tatou aiga e faavavau.