Tala o le Eseta

E tutu le au soo i se laina e fausia ai se auala mo le tagata e uuina le ata ma talotalo atu a latou lau pama.

Faamatala: I le Aso Sa a o lumanai le maliu o Iesu Keriso, sa tietie atu ai o Ia i Ierusalema i luga o se asini. “Ma ina ua afio mai o ia .… , sa amata ona olioli le motu o le au soo ma vivii atu i le Atua ma le leo tele mo galuega mamana uma sa latou vaai i ai.”

E savali le tagata o loo umia le ata i le auala o loo uuina le ata 1 (Iesu Keriso i luga o le asini). E alalaga leau soo “Osana!” i ni nai taimi a o talotalo atu a latou lau pama.

Soo 1: “Ia manuia le Tupu o loo afio mai i le suafa o le Alii: o le manuia i le lagi, o le viiga foi i mea aupito a luga.”

Faamatala: “Ma ina ua afio mai o Ia i Ierusalema, sa ofo uma le aai, ua faapea mai, O ai lenei?”

Soo 2: “O Iesu lenei le perofeta a Nasareta o Kalilaia.”

E usu e tagata uma le fuaiupu lona tolu o le “Beautiful Savior” (Tusipese a Tamaiti, 62–63).

Faamatala: I le Aso Tofi, sa faapotopoto ai Iesu Keriso ma Ona soo ma avatu ia i latou le faamanatuga.

O le tagata uu ata e uuina le ata lona 2 (Iesu i le Talisuaga Mulimuli). E nonofo faataamilo le au soo ma tilotilo i le ata o Iesu.

Faamatala: “O loo latou aai, a e tago Iesu i le areto, ua faafetai, ona tofitofi ai lea, ma avatu i le au soo, ua faapea atu, Ina tago ia, ina aai; o lo’u tino lenei.”

Ma le migao, e uu i luga e se tasi o le au soo le areto.

Faamatala: “Ma sa ia tago foi i le ipu, ma ina ua uma ona ia tuuina atu le faafetai, na ia tuu atu ai ia te i latou; ma sa latou feinu uma i ai. Ona fetalai atu lea o ia ia te i latou, O lo’u toto lenei o le feagaiga fou, ua faamaligiina mo le toatele.”

Ma le migao, e uu i luga e se tasi o le au soo le ipu.

Faamatala: Sa aoao atu foi e Iesu ia i latou se mea taua. Na Ia fetalai atu, “O le poloaiga fou ou te tuu atu ai ia te outou, ia outou fealofani; faapei ona ou alofa atu ia te outou. … O le mea lea e iloa ai e tagata uma lava o o’u soo outou, pe afai ua outou fealofani.”

E usu e tagata uma le “Ia Fealofani” (Tusipese a Tamaiti, 74).

Faamatala: “Ona maliu atu ai lea o Iesu faatasi ma i latou i se nofoaga e igoa o Ketesemane, ma sa ia fai atu i le au soo, Ia outou nonofo iinei, sei ou alu atu iila ou te tatalo.”

E nonofo faatasi le au soo i le tasi itu o le tulaga. O le tagata uu ata e tu i le isi itu o le tulaga, o loo uuina i luga le ata 3 (O Iesu o loo tatalo i le faatoaga).

Faamatala: “Ua maliu faaitiiti atu [Iesu] i luma, ona faapa’ū faō ai lea o Ia ma tatalo, ua faapea atu, Lo’u Tama e, afai e mafai, ia ave ese lenei ipu ia te a’u: ae ‘aua le faia lo’u loto, ao lou finagalo.”

O le au soo ua taooto i lalo ma faafoliga ua momoe.

Faamatala: A o tatalo le Faaola, sa momoe Ona soo. Sa puapuagatia Iesu i le faatoaga na o ia lava. Sa Ia lagonaina o tatou tiga ma faanoanoaga uma ina ia mafai ona Ia malamalama ia i tatou ma fesoasoani mai ia i tatou. Sa puapuagatia o Ia e totogi le tau o a tatou agasala.

E usu e tagata uma le “Gethsemane” (Viiga—Mo le Aiga ma le Ekalesia, no. 1009).

Faamatala: Ina ua uma ona tatalo Iesu, sa aveese o Ia e fitafita ma saisai o Ia. E ui lava e leai se mea sese na Ia faia, ae sa tonu i taitai e fasioti o Ia.

O le tagata uu ata e uu i luga le ata 4 (o le Faaola i luga o le satauro). E tootutuli le au soo ma tilotilo atu i le ata.

Faamatala: A o tautau o Ia i luga o le satauro, sa fetalai Iesu, “Lo’u Tama e, ia e faamagalo atu ia te i latou; aua ua latou le iloa le mea ua latou faia.” E oo lava i Lona tiga tele, o Ia o le faataitaiga atoatoa o le alofa ma le faamagalo atu.

E usu e tagata uma le “E I Ai se Mauga Lanu Vao” (Viiga, no. 108).

Faamatala: Ina ua maliu Iesu Keriso, sa taoto Lona tino i se tuugamau mo aso e tolu. I le aso lona tolu, na o mai ai Maria le Makatala ma isi fafine e asiasi i le tuugamau. “Ma sa latou maua ai le maa ua faataavale ese. … Ma sa latou ulu atu i totonu, ma latou le maua ai le tino o le Alii o Iesu.”

E savavali ma le faanoanoa Maria ma tamaitai i luga o le tulaga ma tilotilo solo, ma le le mautonu.

Faamatala: Na faaali mai ni agelu se toalua ma talanoa atu i tamaitai.

Agelu 1 ma le Agelu 2 e laa atu i luga o le tulaga i autafa o Maria.

Agelu 1: “Aua le fefe… aua ua ou iloa ua outou saili Iesu, o le na faasatauroina.”

Agelu 2: “E le o iinei o Ia: a ua toetu.”

Faamatala: “Ma sa vave ona latou o ese atu … ma le fefe ma le olioli tele; ma sa taufetuli atu e aumai [i isi] soo le upu.”

Ua tamomoe ese fiafia Maria ma tamaitai mai le tulaga e faasoa atu le tala fiafia i tagata uma.

Maria: Ua toetu o Ia! O loo soifua Iesu Keriso!

O le tagata uu ata e uuina i luga le ata 5 (o le Keriso toetu). E toe foi tagata uma i le tulaga.

Faamatala: Sa toe tu mai lo tatou Faaola i le taeao o le Eseta. Ona o Ia, na suia ai mea uma. E mafai ona tatou maua le faamoemoe, filemu, ma le fiafia. Ona o loo soifua o Ia, o loo faatasi o Ia ma i tatou i aso nei ma aso uma.

E usu e tagata uma le “Ua Toetu Iesu” (Uo, Ape. 2025, 18–19).