“Stap Serem Gud Nius.,” Fren, Maj 2026, 36–37.
Stap Serem Gud Nius.
Wan tru stori we i kam long Kenya.
Wan braet Ista Sandei, Ryan i wekap eli mo ron i go long kijin. Hem i save smelem kokonas mo ol spaes we i kam long mahamri(kato) we mama i jes mekem. Ryan i kakae wan kato we i wom, mo i stap long sep blong triangol donat. “!Mama!” !Hem i Ista! ?Yumi save wajem muvi blong Jisas tedei?” hem i askem wetem wan bigfala smael.
Mama i lukluk hem mo i smael. “!O Yes!”
Smol brata blong hem, Liam, i ron i kam aotsaed taem Mama mo Ryan i sidaon blong wajem muvi.
Oli luk Jisas Kraes i mekem ol merikel mo givim seves long ol pipol. Taem ol pipol oli mekem rabis fasin long Jisas Kraes, wota blong ae blong Ryan i fulap.
“Mama, ?from wanem oli mekem hemia long Jisas?” hem i askem wetem harem nogud.
“Hem i jus blong safa from yumi,” Mama i talem. “Hem i lavem yumi tumas, Ryan. Hem i ded blong mekem se bae yumi save laef bakegen.
Taem we muvi i soem Jisas Kraes i Girap Bakegen long Ded, Ryan i smael. “Luk, Mama. “!Hem i bin laef bakegen!”
“Hemia nao,” Mama i talem. !Hem i raesap! Olsem we enjel i talem long Baebol.”
I no longtaem afta, Ryan i go aotsaed blong pleiplei. Hem i luk Liam i stap pleiplei wetem ol stik andanit long mango tri.
“Liam! Mi wantem talem wan naes stori long yu,” Ryan i talem.
Liam i wet taem Ryan i sidaon andanit long mango tri. “?Bae hem i abaot trak?”
“No. !Hemia i moa gud!” Ryan i talem “Hem i abaot Jisas. Hem i ded, be Hem i laef bakegen.”
“?Tru?” Liam i askem.
“!Yes! Wan enjel i talem Hem i no stap, Hem i girap bakegen long ded.” Hemia i minim se bae yumi save laef bakegen tu.”
“!Wao!” Liam i talem. “Jisas i strong.”
Ryan i saksakem hed blong talem yes. Hem i tingting long hamas Jisas Kraes i lavem hem. Hemia i mekem hat blong hem i fulap mo hapi. Hem i serem gudfala nius wetem famli blong hem, mo mekem Ista blong hem i mo spesel.
Ol pikja droing i kam long Margarida Esteves. Oli save mekem kopi blong Jos nomo i yusum.