Profet Moses

Moses i Man blong Isrel, be gel blong king blong Ijip nao i lukaotem hem. Moses i harem nogud taem i luk we Ol Man Ijip oli no kaen long Ol Man Isrel mo oli mekem olgeta olsem ol slef.

Wan dei Moses i luk wan Man Ijip i stap kilim wan Man Isrel. Moses i faet blong protektem Man Isrel.

Taem Fero i faenemaot, hem i wantem kilimded Moses, be Moses i ronwe aot long Ijip.

Moses i kam long wan ples we oli singaotem Midian, long ples we hem i mitim wan woman we nem blong hem Jipora. Tufala i mared, mo gat ol pikinini.

Taem oli stap laef long Midian, Moses i luk wan bus we faea i stap laet long hem, be faea ia i no bonem bus ia. Lod i bin kamkamaot long faea ia mo i toktok long Moses.

Lod i talem se Hem i save se Ol Man Isrel oli stap safa long Ijip. Hem i givim oda long Moses blong gobak long Ijip mo talem long Fero blong lego Ol Man Isrel oli go fri. Lod i talem se bae Hem i helpem Moses blong mekem Ol Man Isrel oli go fri mo lidim olgeta i go long wan graon blong promes.