Ista Rol Plei

Ol disaepol oli stanap long wan stret laen blong mekem rod blong man we bae i holem pikja mo blong oli muvmuvum i go antap ol lif blong olif.

Nareta: Sandei bifo Ista we Jisas Kraes i ded, Hem i kam long Jerusalem long wan dongki. Nao taem Jisas i kam, olgeta man blong hem we oli plante tumas, oli stap harem gud, nao oli stat presem God. Olgeta oli stap singaot bigwan, oli stap presem hem from ol merikel we oli bin luk.”

Man we i holem pikja i wokbaot long medel long laen mo holem pikja 1(Jisas Kraes long dongki). Ol disaepol oli singaot “Hosana!” sam moa taem mo muvmuvum i go antap ol lif blong olif.

Disaepol 1: “Hae God, yu blesem King ya we i kam long nem blong yu: Long heven, i gat pis. Long heven antap we antap, olgeta oli stap leftemap nem blong yu.”

Nareta: mo taem Hem i kam insaed long Jerusalem, evri man insaed long siti oli sek, mo askem se ?Huia man ia?”

Disaepol 2: “Hemia i Jisas profet blong Nasaret blong Galili.”

Evriwan i singsing nambatri ves blong “Beautiful Savior” (Children’s Songbook, 62–63).

Nareta: Long Tasdei, Jisas Kraes i karem i kam tugeta ol disaepol blong Hem mo givim long olgeta sakramen.

Man we i holem pikja i holem pikja 2 (Jisas Kraes long Las Sapa). Ol disaepol oli sidaon raon mo lukluk long pikja blong Jisas.

Nareta: “ Mo taem we oli bin stap kakae, Jisas i bin tekem bred mo i bin brekem bred, mo i blesem bred, mo i bin givim long ol disaepol blong hem, mo i talem: Yufala i tekem, yufala i kakae; hemia bodi blong mi.”

Kwaet nomo, wan long ol disaepol i holem bred i go antap.

Nareta: Mo hem i tekem kap, mo afta we hem i talem tangkyu, hem i givim kap ia long olgeta; mo evriwan i bin dring long kap ia. Hem i talem: “from we hemia blad blong mi, we i blong mekem promes* blong God i stanap. Blad blong mi bambae i ron blong tekemaot ol sin blong plante man ”

Kwaet nomo, wan long ol disaepol i holem kap i go antap.

Nareta: Jisas i tijim olgeta wan samting we i impoten. Hem i talem: “Wan niufala komanmen mi givim long yufala, blong yufala i lavlavem yufala; olsem we Mi mi lavem yufala, blong yufala i lavem ol narafala man tu.” “Nao from we yufala i stap lavlavem yufala, bambae olgeta man oli luksave se yufala i man blong mi.”

Evri wan i singsing “Love One Another” (Children’s Songbook, 136).

Nareta: “Afta Jisas i kam long wan ples we oli singaotem Getsamane, mo talem long ol disaepol, stap ia mo wet, bae mi go prea mo tingting hevi.”

Ol disaepol oli sidaon tugeta wan saed long saed blong stej. Man we i holem pikja i stanap long narasaed mo holem pikja 3 (Jisas Kraes i stap prea long garen).

Nareta: “[Jisas] i wokbaot smol moa i go, i foldaon, i slip long fes blong hem blong i prea. I talem: ‘Papa sapos yu save mekem, plis yu tekemaot ol samting ia we i stap mekem mi mi harem nogud, be yu no mekem olsem we mi mi wantem, yu mekem olsem we yu nomo yu wantem.”

Ol disaepol oli ledaon mo giaman se oli silip.

Nareta: Taem we Sevya i stap prea, ol disaepol blong Hem oli silip. Jisas i safa Hemwan long garen. Jisas i filim evri soa bodi mo harem nogud blong yumi mekem se Hem i andastanem yumi mo helpem yumi. Hem i safa blong pemaot praes blong sin.

Evriwan i singsing “Gethsemane” (Hymns—For Home and Church, no. 1009).

Nareta: Afta we Jisas i finis prea, ol soldia oli karem Hem i go mo fasem Hem. Hem i talem se Hem i no mekem wan samting i rong, be ol lida oli disaed blong kilim Hem i ded.

Man we i holem pikja i holem pikja 4 (Sevya long kros). Ol disaepol oli nil daon, mo stap lukluk long pikja ia.

Nareta: Taem Hem i stap hang long kros, Jisas i talem, “ Papa, plis yu fogivim olgeta ya, from we oli no save samting ya we oli stap mekem. ” Iven long bigfala harem nogud blong Hem, Jisas i wan stret eksampol blong lav mo fasin blong fogiv.

Evriwan i singsing “I Gat Wan Hil I Stap Longwe” (STSP, no. 24).

Nareta: Afta we Jisas Kraes i ded, bodi blong Hem i stap insaed long tumb blong tri dei. Long namba tri dei, Meri Makdelen mo ol narafala woman oli kam blong visitim tumb ia. “Mo oli faenemaot se ston we i kavremap tumb i kamaot. Be taem oli go insaed long tumb ia, oli no luk bodi blong Jisas, Masta blong yumi.”

Meri mo ol narafala woman oli wokbaot long stej harem nogud mo lukluk raon, konfius.

Nareta: Tu(2) enjel i kamaot mo toktok long ol woman ia

Enjel 1 mo Enjel 2 kam long stej stanap kolosap long Meri.

Enjel 1: “ Yutufala i no fraet. Mi mi save we yutufala i stap lukaot Jisas, man ya we oli nilim hem long kros.”

Enjel 2: “Hem i no stap long ples ia. Hem i girap bakegen long ded.”

Nareta: “ Nao kwiktaem nomo, tufala i aot long ples ya, we tufala i fraet, be tufala i glad tumas tu. Nao tufala i resis blong go talemaot nius ya long ol man blong Jisas.”

Meri mo ol narafala woman oli ron aot long stej wetem glad blong serem gudfala nius ia long evriwan

Meri: !Hem i raesap! !Jisas Kraes i stap laef!

Man we i holem pikja i holem pikja 5 (Sevya we i girap bakegen long ded). Evriwan i kambak long stej.

Nareta: Sevya blong yumi i bin girap bakegen long Ista moning. From Jisas Kraes, evri samting i bin jenis. Yumi save gat hop, pis, mo stap glad. From se Hem i stap laef, Hem i stap wetem yumi naoia mo oltaem.

Evriwan i singsing “Jesus I Girap” (Fren, Epril. 2025, 18–19).