Tabu Wik Blong Mia

Mama mo Papa tufala i ridim stori blong Pam Sandei insaed long ol skripja. Taem Jisas Kraes i go long Jerusalem, ol pipol oli leftemap ol branj blong pam tri mo muvmuvum sloslo i go antap mo singaot, “Hosana!”

Sista blong mi Lucy i holem wan pikja blong Jisas we i stap antap long wan dongki. Mifala we i stap, mifala muvmuvum sloslo i go antap ol pepa branj blong mifala. Mi filim glad taem mi stap pikjarem se mi stap welkamem Jisas.

Jisas i harem nogud from ol pipol oli stap salem ol samting insaed long tempol, mekem se Hem i sakemaot ol samting ia. Mifala i pikimap ol toti long ol bus raon long jos. !Mi glad se mi save help blong tekem kea long haos blong God!

Mama i ridim ol stori we Jisas Kraes i bin talem long ol pipol. Mifala i lisin mo yusum ol smut graon ia blong mekem ol sep we oli stap long ol stori ia. Lucy i bin mekem wan sipsip from Jisas i Gudfala Man Blong Lukaot Long Sipsip. Mi bin mekem wan smol karasin laet. Hemia i helpem mi tingbaot blong kipim hat blong mi i fulap wetem fet.

Papa i talem abaot olsem wanem Meri i givim wan spesel oel long Jisas Kraes blong leg blong Hem. Smel blong oel ia i fulumap haos ia.

Mifala nogat spesel oel ia. Be, mifala yusum sinamon blong mekem wan swit kaekae. Mama i talem taem yumi smelem sinamon ia taem yumi bekem swit kaekae ia, yumi sud tingbaot wanem yumi save givim long Jisas Kraes.

Mifala i laetem ol kandel mi singsing wan singsing, olsem Jisas Kraes mo ol disaepol blong Hem oli singsing long Las Sapa. Mifala i kakae flat bred we i no gat is mo dring jus blong grep blong tingbaot fas sakramen. Mifala dring pomkrenet jus tu blong rimaenem mifala abaot blad, mo ol olif blong garen blong Getsemane

Taem mifala i stap kakae tanda i faerap aotsaed. Mi filim sef mo glad tumas blong save se Jisas i bin winim ol bigfala hariken blong tudak.

Mifala ridim abaot olsem wanem Jisas Kraes i ded from yumi. Taem mifala i tekem emti flaoa pot i go long garen mo putum i slip wan saed, olsem wan emti tumb. Mifala i putum graon mo ol ston raon long hem be mifala lego i open nomo i stap. Mama i givim long mifala wan simbol we i ripresentem bodi blong Jisas. Mifala kavremap wetem respek simbol ia long wan waet kaliko mo putum i go insaed long flaoa pot ia.

Iven hem i jes wan flaoa pot nomo, mi stap filim filing ia blong harem nogud, taem mifala kavremap doa wetem wan ston.

Mama i talem se afta we Jisas Kraes i ded, Hem i setemap misinari wok long spirit wol. Mekem se long wei ia ol pipol we oli no save abaot gospel blong Hem long wol ia bae oli save lan tu abaot Hem. Insaed long ol tempol, yumi save mekem baptaes long bihaf blong olgeta we oli ded be oli no bin kasem baptaes.

Lucy mo mi i no bigwan inaf yet blong go insaed long tempol, be mitufala i help blong katem aot ol nem long ol kat we oli printim. Mama mo Papa i go wan afta narawan blong mekem tempol wok blong ol pipol long ol kat ia mo stap wokbaot wetem mitufala raon long tempol. Iven aotsaed nomo yumi save filim save se tempol i olsem smol pat blong heven.

Long Ista moning ston we i stap long fored blong flaoa pot ia i lus mo waet kaliko ia i emti. I gat wan kat we i talem, !Hem i laef bakegen!

Mi save finis se Jisas Kraes Hem i risen blong Ista. Afta we mifala selebretem Tabu Wik, mi filim se mi kam blong save Hem smol moa.