Bag-ong Pagsugod

Mag-otso anyos na si Alexandre sa pipila na lamang ka adlaw! Naghinamhiman kaayo siya kay siya ug ang iyang Papa nagplano og espesyal nga snack para sa birthday para iyang kaonon inig pamuhi sa eskwela. Dihang miabot ang mga misyonaryo para sa panihapon, gisultihan sila ni Alexandre bahin sa lamian nga chocolate nga pastry nga iyang gipili.

“Naa ta unya, walo kabuok niana nga dunay kandila kada usa, imbis nga usa ka cake nga dunay walo ka kandila!”

Mikatawa si Elder Lauener. “Nindot kaayo na. Binli ko!”

Human sa panihapon, nagtudlo ang mga misyonaryo og leksiyon bahin sa bunyag. Si Elder Doyon milingi ngadto ni Alexandre. “Kon mabunyagan ka, nagsaad ka nga mosunod ni Jesukristo.” Gisultihan niya si Alexadre mahitungod sa iyang kaugalingong bunyag ug mipakigbahin sa iyang pagpamatuod. “Ang Espiritu Santo mitabang nako nga mobati og dakong kalipay kay nianang adlawa gipili nako nga mosunod ni Jesukristo.”

Naghinamhinam si Alexandre nga moabot na ang adlaw sa iyang bunyag!

Apan sa dihang miadto na siya sa higdaanan nianang gabhiona, naglisod siyag katulog. Ganahan siya sa ideya nga mahimong limpyo ug bag-o. Apan unsaon niya nga magpabiling limpyo human sa bunyag?

Sa pagkasunod buntag si Alexadre milakaw padulong sa eskwelahan uban ni Papa. “Hilom kaayo ka niining buntaga,” miingon si Papa. “Unsay nahitabo?”

Nanghupaw si Alexandre, “Ganahan unta ko nga mabunyagan sobra sa kausa.”

“Ngano man?” Nangutana iyang Papa.

“Unsay laing paagi nga magpabilin kong limpyo human ko mabunyagi?” nangutana si Alexandre. “Malimtanon kaayo ko permi—sama sa pagsulti og hello ug salamat sa mga gulang na ug sa pagpasensiya sa akong manghod nga lalaki. Nahibalo ko nga makahimo gihapon ko og mga sayop. Kausa ra ang bunyag, mao nga dili na gyod ko malimpyo og sama niana pag-usab.”

Mihunong ang Papa ug mitutok ni Alexandre. “Wow. Morag sobra ra kaayo kana kabug-at. Nakahinumdom ka ba dihang naghisgot ta mahitungod sa paghimo og mga pakigsaad atol sa bunyag?”

Mitando si Alexandre. “Murag.”

“Kon mabunyagan ka na, mohimo ka og pakigsaad sa Langitnong Amahan. Mosaad ka nga motuman sa Iyang mga sugo ug mosunod ni Jesukristo. Human niana, matag higayon nga moambit ka sa sakramento, makahinumdom ka ni Jesus ug kon unsaon Niya nga makatabang nimo sa paghinulsol.”

Misiga ang mata ni Alexandre. “Mao ba nga mabati nako nga sama kalimpyo sa dihang mabunyagan ko?”

“Sakto,” miingon ang Papa. “Nahibalo ang Langitnong Amahan nga dili ka perpekto, ug usahay makahimo ka og sayop nga mga pagpili. Apan kon makasala ka, mahimo kang maghinulsol ug kanunay nga maningkamot sa pagsunod ni Jesus. Sa imong hunahuna makahimo ka niana?”

Mipahiyom si Alexandre. “Oo! Murag makahimo ko niana.”

Dihang miabot na ang birthday ni Alexandre, giandam sa pamilya ang iyang snack sa birthday pagkahuman sa eskwelahan. Pagkalami niadto! Ug didto sa iyang bunyag, mibati si Alexandre og sobra ka nindot sa dihang mitunga siya gikan sa tubig. Misaad siya nga mosunod ni Jesukristo, ug nindot kaayo kana nga pagbati!

Nianang semanaha naningkamot si Alexandre kutob sa iyang mahimo sa pagtuman sa iyang bag-ong mga pakigsaad ug sa pagbinuotan ngadto sa iyang manghod nga lalaki. Apan sa dihang miabot ang sunod nga Dominggo, nasagmuyo siya og gamay. Gibati niya nga nakahimo pa unta siya og mas maayo nga mga pagpili nianang semanaha.

Sa dihang gipasa na ang sakramento, gikyugpos ni Alexandre ang iyang mga kamot ug giyuko ang iyang ulo. Hilom siya nga mihangyo sa Langitnong Amahan nga tabangan siya nga makahimo og mas maayo sa sunod nga semana. Naghunahuna siya kon unsa kadako ang gugma ni Jesus para niya ug ganahan kaayo siya nga mahimong mas sama Niya.

Samtang mikuha siya og pan gikan sa tray sa sakramento, mibati si Alexander og kahupay ug kalinaw sa iyang kasingkasing. Mibati siya og sama sa iyang gibati niadtong adlaw sa iyang bunyag! Ang iyang Papa miagbay ni Alexander ug mipahiyom kaniya.

Karong adlawa mao ang sinugdanan sa bag-ong semana, ug buhaton ni Alexandre ang labing maayo nga iyang mahimo—uban sa tabang sa Langitnong Amahan.

Mga paghulagway pinaagi ni Toby Newsome