Problema sa Panaghigalaay

Nagpatid-patid si Matt og bato samtang naglakaw siya padulong sa ilang balay. Wala siya kasabot ngano. Nganong lain kaayo ang iyang gibati?

Dugay na siyang nakig-uban-uban sa iyang amigo nga si Joseph. Apan morag gilaayan si Joseph, ug si Matt mipauli sa ilang balay og sayo kay sa iyang giplanohan.

Basin huna-huna ra ni nako, naghunahuna si Matt. Basin bati lang ang adlaw ni Joseph.

Pagkasunod adlaw dihang miabot si Matt sa eskwelahan, nakita niya si Joseph nga nakig-istorya sa usa ka grupo sa mga higala. Mitawag si Matt niya ug mikamay. Mitan-aw si Joseph ngadto ni Matt, pero wala siya mibalos og kamay. Mibalik siya og atubang ngadto sa iyang mga higala.

Wala lang nakakita nako si Joseph, giingnan ni Matt ang iyang kaugalingon.

Panahon sa klase sa dihang oras na para sa grupo nga pagtinabangay, giduol ni Matt si Joseph. “Ganahan ka nga magpares ta?” Nangutana si Matt.

Murag wala lang makadungog si Joseph niya. “Ali na, Mike,” misulti si Joseph ngadto sa batang lalaki nga naglingkod sa iyang tapad. “Adto ta didto magtrabaho.”

Milakaw ang duha ka batang lalaki. Murag naglain ang tiyan ni Matt. Klaro nga dunay nakahasol ni Joseph. Apan unsa man?

Walay bisan unsang butang nga mahunahunaan si Matt nga iyang nabuhat nga nakapasuko ni Joseph ngadto niya. Tinuod, usahay mapunta sila sa managlahi nga team nga magkakontra sa dula nga baseball panahon sa recess. Apan permi silang mag apir inig ka human. Ngano kaha nga murag mipili man si Joseph sa kontra nga team sa tanang higayon?

Sige lang, basta maistorya lang nako si Joseph panahon sa recess, naghunahuna si Matt.

Panahon sa recess, midagan si Matt aron moapil sa ubang mga bata didto sa dulaanan.

“Oy, Joseph!” mitawag si Matt. “Pwede ta ka maistorya og kadali?”

“Hapit na magsugod ang duwa,” miingon si Joseph.

“OK, mag-outfield lang ko duol nimo ug mag-istorya ta,” miingon si Matt.

“Ulhi ra kaayo ka. Wala nay lugar sa akong dapit,” misulti si Joseph samtang midagan siya aron moapil sa iyang team.

Nagtan-aw si Matt samtang nagsugod na ang tanan sa pagdula. Sa una dili gyod manumbaling si Joseph bisan daghan pa kaayo ang moapil. Kanunay man nga welcome ang tanan.

Apan sa tinuod wala gyod batia ni Matt nga gi-welcome siya ni Joseph. Nganong ingon man niini ang linihokan ni Joseph? Nganong wala man siya nagpaapil niya? Wala may sayop nga nahimo si Matt!

“Si Joseph ang dunay gihimo nga sayop,” misulti si Matt sa iyang mga ginikanan atol sa panihapon. “Dili gani siya makig-istorya nako ug mosulti kon unsay iyang gikalagotan nako!”

“Murag lisod tuod na,” miingon si Mama.

Gibati ni Matt ang init nga mga luha sa iyang mga mata. “Murag gusto lang niya nga dili na makig-amigo nako, ug wala ko mahibalo kon ngano.”

“Mapasigarbohon ko nimo sa pagpaningkamot nga makigsulti niya mahitungod niini,” miingon si Papa. “Basin mahimo nimong sulayan ang pagsulti niya unsay imong gibati ug gusto ka nga motabang.”

Mikibo si Matt. Sa linihokan ni Joseph, wala makaseguro si Matt kon maminaw ba si Joseph niya.

Gigunitan ni mama og hugot ang kamot ni Matt. “Mag-ampo sab mi para nimo, ug para ni Joseph.”

Nianang gabhiona samtang nangandam si Matt aron matulog, naghunahuna siya mahitungod sa gisulti ni Mama ug Papa. Nag-ampo siya para sa iyang mga higala sa una sa dihang naguol sila ug nagkalisod. Apan lahi ni siya, di ba? Si Joseph mao ang naghimo og dili maayo ngadto niya.

Maong ngano man nga nag-ampo ang mga ginikanan ni Matt para ni Joseph? Angay ba usab siyang mag-ampo para ni Joseph?

Miluhod si Matt sa kilid sa iyang katre. “Langitnong Amahan, lisod nga dili masuko ni Joseph,” nag-ampo si Matt. “Nakamatikod ko nga nasuko siya, apan wala siya mosulti kon unsay nakahasol niya.”

Mihunong si Matt. “Gusto ko nga makig-istorya niya, apan dili ko segurado kon mosulti siya nako unsay problema. Palihog tabangi siya kon unsa may nakahasol niya. Ug bisan unsay mahitabo, palihog tabangi ko nga magmabination gihapon ngadto niya.”

Samtang nag-ampo si Matt, nagsugod siya sa pagbati og kalinaw. Nahibalo siya nga ang Langitnong Amahan ug si Jesukristo iyang labing maayo nga mga higala. Makatabang Sila niya nga mohigugma ni Joseph, bisan unsay pilion ni Joseph nga buhaton. Ug anaa Sila para niya bisan kon pilion pa ni Joseph nga dili na sila mag-amigo.

Mipahiyom si Matt. Ang pag-ampo para ni Joseph maayo diay nga ideya.

Mga paghulagway pinaagi ni Mark Robison