Usa ka Pakig-istorya uban ni Emily mahitungod sa Bunyag

Ganahan ko nga mag-painting, magdrowing, magluto og dessert, maghimo og mga butang gamit ang kamot, ug magsayaw ug magkanta kauban sa akong mga igsoon. Ganahan sab ko nga moadto sa ranso sa akong lolo aron mosakay og kabayo.

Atol sa home evening, gitudloan ko sa akong mga ginikanan mahitungod sa pagtuo, paghinulsol, bunyag, ug sa gasa sa Espiritu Santo. Nangandam sab ko pinaagi sa pagbasa sa mga kasulatan, pag-ampo, ug pagtan-aw og mga bidyo mahitungod ni Jesukristo. Mas labing ganahan ko sa bidyo mahitungod sa bunyag sa Manluluwas didto sa Suba sa Jordan. Ganahan ko sa bahin dihang nagpakita ang puti nga pati, nga nagrepresentar sa Espiritu Santo.

Si papa ug ako nagpraktis kon unsaon pagbarog sulod sa font. Nahadlok ko nga ipaunlod sa tubig, apan gitudloan ko sa akong papa unsaon pagpiko sa akong mga tuhod, pagtabon sa akong ilong, pagpiyong sa akong mga mata, ug hinayhinay nga motumba ngadto sa iyang mga kamot. Nagpraktis mi niini og kadaghan, ug sa adlaw sa akong bunyag, sayon na lang kaayo nako ang paghimo niini.

Usa kadto ka adlaw nga para nako dili makalimtan. Ang ubang sakop sa akong pamilya mihatag og mga pakigpulong, misulti sa pag-ampo, ug mibarog isip mga saksi. Mikanta sab ko sa “Kon Ako Bunyagan” pinaagi sa tabang sa among pianista sa Primary. Human ko mabunyagi, gibati nako ang akong Langitnong Amahan ug ang Iyang Anak, si Jesukristo, nga duol kaayo nako. Nakahilak ko og mga luha sa kalipay.

Espesyal usab kaayo kadto kay nakahunahuna ko sa pagdapit sa pipila sa akong mga higala ug mga sakop sa pamilya nga dili miyembro sa Simbahan sa pag-adto sa akong bunyag, ug misugot sila nga moadto. Usa sa akong mga higala nga mitambong mag-adtoan gihapon sa mga kalihokan sa simbahan uban sa iyang mga ginikanan.

Naningkamot ko nga mahinumdom sa akong mga pakigsaad pinaagi sa pag-adto sa simbahan, pag-ambit sa sakramento, ug paghinumdom sa Manluluwas. Ang pagkahibalo nga gihatag Niya ang Iyang kinabuhi mipabati nako nga mapasalamaton. Nag-ampo sab ko kada adlaw, nagbasa sa mga kasulatan, ug nag-alagad sa uban, ug naningkamot nga mahimong maayo nga tawo.

Ngadto sa akong mga higala nga hapit na mabunyagan, manghinaot ko nga mag-anam mo og kaduol sa Langitnong Amahan ug mobati sa Iyang hingpit nga gugma!